蕭平治老師 台文冊櫥

1974年 眠月線、眠月下線集材記智：蕭輝虎記智kap相片  1974年阿里山眠月下線： ​ 20200415        ​ Lahjih  1974年 前後幾冬，大兄 tī 阿里山眠月下線 45 、 46 林班 hit-tah 做集材鉤柴作業，大兄是 ku-lí-thâu （工頭）， chhōa 一陣工人 tī chia 做機器工仔， kā 伐木工人剉斷kui山坪 ê 木材，用機器、人工集集做伙， thia̍p-chiūⁿ 阿里山火車載出去嘉義。 眠月下線是眠月線落崎大約千外公尺遠 ê 運柴支線，懸低落差將近 6-700 米，非常崎， ùi 眠月下線上山到石猴站 chit 段有 peh 山友挑戰 ê 好漢坡， 50 外冬前是青年大學生『溪阿縱走』上 ngē-táu 路站。眠月下線 tī 日本時代有鐵枝路，用 pōng-pōng-á 車載柴，日本人轉 -- 去了後，撬（ kiāu ）掉鐵枝路改換卡車路，用トラック / truck 載柴，大兄 tī chia 鉤柴時，已經無 pōng-pōng-á 車 mā 無卡車，是用汽油集材機（えんじん）、chhāi  はしら（集材柱）、an鋼索、鉤柴工具⋯，母機 chhāi-tiàm 眠月線石猴站鐵枝路邊。剉柴林班範圍闊莽莽，需要分做幾若站集材，上尾 chiah 鉤柴到石猴站鐵枝路邊，等待運柴火車來載。 聽大兄後生蕭輝虎講，林班伐木工人剉 ê 樹木，主要是柳杉 kap khêng 一寡松蘿原木樹頭。日人時代已經 kā chia ê  ひのき / 檜木剉了了，留落來 chiâⁿ 米懸 ê 樹頭 kap 無夠格柴頭柴尾， lóng 是高級木材，無提bô-chhái，siáⁿ-mih是水土保持，無人重視。原木剉了，日本人有種柳杉， chia-ê 柳杉林已經大欉有經濟利益，長度有夠長 --ê ē 使得做電火柱仔，若是樹頭有夠大，剉較貼底 --leh ， he 樹頭 hiàn-hiàn 真適合做棺木棺柴蓋，聽講外銷香港真搶市。 輝虎講， Hit-tang-chūn 做機器工仔，逐日眠月頂線下線來來去去，若 tī 鐵枝路邊做穡，中晝時時常 peh-chiūⁿ 石猴肩胛歇睏，若是落去下線做工，有時 ē 去眠月神木行行看看 --leh ，原來 hit 欉神木 mā...

 東埔線鐵路舊相片回憶： 阿里山鐵路Tataka哆哆咖線終點位置。（Lahjih蕭平治1959記智） 阿里山鐵路 Tataka哆哆咖線1934完成， Tataka哆哆咖線mā講東埔線， ùi  Chiáu-pêng（沼平）驛到東埔土場約20？/21.6 Km。1968年年底停駛，tī 1977-1978拆除改造 台18號 新中橫公路。Ùi  Chiáu-pêng（沼平）往東埔線約1.6 Km 因為tī阿里山森林遊樂區內，chiah保留落來，tī  1.6 Km所在連接 18線新中橫公路，一直到東埔土場前約1 Km位置chiah koh 連接 18線新中橫公路。所以 ùi離 沼平 1.6 Km所在到 東埔土場前約1 Km  chit段是 舊鐵路路基 ， 1978年拆除，已經無khoàiⁿ鐵枝路、柴橋、chúi-ho̍h水鶴影跡，hō͘人無限心悶數念。 根據網路資料：Chiáu-pêng（沼平） 8公里 →こだま(自忠)→2.7公里新高口→9.3公里東埔。古早ê Tataka哆哆咖線是ùi新高口到東埔土場9.3公里，後--來kā  Chiáu-pêng（沼平）到 東埔土場講做東埔線，所以 Tataka哆哆咖線、東埔線是kāng一條 鐵路。 東埔線Lahjih tī 1956年kah 1959年，ùi阿里山bat坐1擺火車入山，阿里山→東埔，東埔→阿里山，bat和大兄行過2-3擺，不過記智無濟，kan-nā知影山坑真曠闊柴橋真深，鐵枝路順山壁彎來se̍h去，看是近近，行路soah-tio̍h行真久。 （感謝劉明財先生提供日本時代相片） 蜈蚣車囝，載大箍siông-lô（松蘿）原木。 Tǹg集材機ê工作寮。 載原木貨車1載1載載去Chiáu-pêng（沼平）驛chiah koh轉運出嘉義。 Chúi-ho̍h水鶴食水。 Làu蜈蚣車囝boeh去載原木，sūn-sòa掛客車車箱載人。 已經裝車原木kap thèng-hāu裝車蜈蚣車囝。 土場集材機tng-leh裝車。 已經裝車好勢，準備載出阿里山Chiáu-pêng（沼平）驛轉運。 土場えんじん 引擎集材機吊掛裝車現場，工人tng-leh chhiâu位置。