阿里山懷舊影像之旅 第2站 北門驛

阿里山懷舊影像之旅 第2站「Pak -mn̂g驛」：

北門驛離嘉義驛1.6 Km，ùi嘉義驛頭前林森路行，需要30外分鐘路程，少年時代bat和大兄坐三輪車到附近。

北門驛是古早阿里山線貨運大站，chia有修理工場、車庫、三角線鐵枝路，鐵枝路線路複雜，除了機關車、車箱、車囝調動，分道Switch特別chē。

北門驛是阿里山線貨物採買運送上重要ê驛頭，阿里山、畚箕湖、十字路、竹崎和其他小站ê生理人、在地人，lòng tio̍h來嘉義hak貨採買，á-sī kā山產運送來chia賣hō͘嘉義生理人。

看相片ē-tàng了解，古早ê北門驛是lŏa ka-ia̍h鬧熱--leh，有人、有火車、有牛車、有鐵馬行踏，mā有精牲，ná像無nâ無cha̍h隨在人出入。

為著機關車se̍h頭換方向，站內有三角線軌道施設。三角線（三角線軌道）是鐵枝路路線一款型式，是三條鐵枝路交接所在設分道，hō͘火車向前、倒吞來改變火車路線、方向，達成火車機關車se̍h頭ê鐵枝路舖設。

嘉義發車到北門，北門鬧熱足心適，無boeh落車繼續行，koh去hit站是彎橋。

北門驛正面，坦橫路應該是chit-má ê林森路。

北門驛內面，ùi改札門入去驛頭內。

北門驛車庫kap 13號直立式汽缸機關車。

月台、15號機關車、客車kap電話柱，。

15號機關車kap客車、電話柱，驛頭內面koh有鐵馬kap白色羊meh-á（狗仔？）。

1963年開始營運ê 柴油車中興號，旅客tit-boeh 上車。

北門驛頭內鐵枝路幾若線，調動火車、火車母徙位、se̍h頭，分道（pun-tō）chiâⁿ-chē，看bē出三角線ê款式生做siáⁿ款。

驛夫仔指揮車輛調動，有12號機關車、客車車廂、載貨平板車。He火車母chhèng烏煙大bong。

戴帽、穿鞋、phāiⁿ冊揹仔（bookbag），應該是日本時代ê高校生。

火車母tit chia添thô͘-thòaⁿ（煤炭），koh有載原木ê車囝，ē-sái講是貨車停車場。

25號機關車，tī chia落thô͘-thòaⁿ-sái「煤渣」。

15、16號機關車tī chia添水。

Mā有人kōaⁿ ka-chì-á來khioh土炭屎。（土炭火力kài強，hiâⁿ無完全ê土炭屎，比hiâⁿ木材koh-khah炎。）

有人買木材直接牽牛車來載，人、鐵馬、牛、牛車、雞、車廂、平板車台chhap-chhap-cha̍p-cha̍p，kài心適ê古早光景（狀況）。

火車裝貨。

若boeh配達貨物，tio̍h先包裝送到運送店，經過磅仔磅重，登記品名、個數、斤量、 運賃（運送料運金）、運送店店名kap配達店名，然後縛牽仔kap寫收據。

Hit-chūn ê運送店店名點名logo（標識）時行khong一個圓箍仔，內面寫一字漢字，號做まる㊣。

13號機關車載原木，he平板車柴箍疊koân-koân，需要車杙仔ki̍t-tiâu。

Chia ê原木lóng是ùi阿里山來--ê。

18號機關車。

車囝thia̍p柴箍tn̄g-tio̍h無方便kō͘車母拖，to̍h用人工sak。

道班修護鐵枝路ê苦夫車，用人工sak，車身和車輪是活動--ê，ē使得pak落來khǹg tiàm鐵枝路邊。

鐵枝路邊ê徛家。

16號機關車tī郊外。

16號機關車拖客車tī郊外，chhèng烏煙足大葩尾。

機關車ばっく 倒退lu，其實是拖客車向前行，看烏煙to̍h知。