1959年第二擺來楠仔仙溪靜養、做工：

 1959年第二擺來楠仔仙溪靜養、做工：

1959年師範學校休學，大兄chhōa我來楠仔仙溪靜養身體，是第二擺來到阿里山。

初中出業考tiâu師範，m̄-koh命運chhòng-tī人，Lah-jih tì-tio̍h TB（Kekkaku肺癆）休學半冬。1959咱人過年後，大兄chhōa Lah-jih來楠仔仙溪靜養，講內山涼冷空氣較好，對身體有好無bái。

Chit-pái算是舊地重遊（têng-iû），雖罔鬱卒，總--是看著沿路面熟面熟景緻，好奇歡喜心情tī khi-khi-khok-khok火車聲中，已經來到阿里山，kāng-khoán tòa A-teng伯in-tau，大兄kāng-khoán chhōa leh四界chhōe朋友開講，隔轉工坐東埔線到土場，chiah koh坐載柴貨物仔車到楠仔仙溪土場。集材作業hām工寮to̍h tī山頂尾溜，需要peh 2點鐘彎彎斡斡細條山路，tī土場看人坐流籠直接上山，看kah腳尾ē冷，看he流籠載人kah載柴相閃有影足心適，Lah-jih tòe大兄hām幾位工人行路上山，行到溪仔邊，soah無khoàiⁿ橋，kan-nā有he鉛索仔掛一kâi柴箱橫tī溪流頂面，下面溪水chheⁿ-lin-lin hē-hē-kiò有夠驚人，chit時有人giú一條索仔kā柴箱giú到面頭前，2人peh起lih坐，然後chiah kā索仔ûn-ûn-á放，放到溪中央所在，chiah koh出力giú，giú到對岸擋tiām hō͘人落來，chiah koh kā柴箱lūi轉來chit-pêng，繼續換人坐換人giú。換我坐到溪中心時，àⁿ頭看he青綠色坑仔水kah he白水波，有夠súi，m̄-koh聽he hì-hè-kiò ê掣流聲，實在足恐怖，想講萬一⋯⋯已經到岸頂。

Peh來到山頂，tang-sî-á工寮已經徙來到頂山，經過2年外，寮仔徙位，紅毛土橋變lūi-á（輕便纜車），lóng是風颱水災造成，莫怪大嫂對做牙（農曆初二、十六，祭拜土地公，祈求平安ê民俗）ē hiah-nī虔誠重視。

寒天時，內山冷sih-sih，暝時hām工人做伙睏，頂下mî-chioh被軟sìm-sìm足sio-lo̍h，一暝到天光，天光後看人chah飯包出門做工，原來大嫂已經早頓、飯包chhoân好勢，Lah-jih tiàm門外厝邊bóng行踏，siàn寒sih-sih山風，凍kah腳手冷ki-ki，大嫂無閒soah，趕緊叫Lah-jih入來食飯，豬肉魚臊kah青菜，加食真ē loeh，tī故鄉厝--裡罕得有chit款ê羹頓。Tiàm-chia無冊thang看，逐日閒仙仙，m̄是kah查某孫仔耍to̍h是tòe大嫂附近山坪bóng se̍h，bóng看大嫂leh種菜蔬，有時大嫂ē chhōa我過家紹介厝邊頭尾，新工寮順山坪起幾若落，tòa bē少人，因為chia有兩隻水煙集材機leh運作，閣有pōng-pōng-á車載柴到流籠頭放落山腳土場。

下晡時，大嫂教我hiâⁿ フロ/Furo水，he浴間仔足大間，一擺ē-tàng 5、6 個大人做伙洗，フロ桶3尺半闊6尺長，一擺ē-tàng 浸3個。每日下晡3點kha-tau開始hiâⁿ火，大柴是免本免料，工人集材現場khioh to̍h有，隨在咱一直hiâⁿ lóng無要緊，フロ水nā燒，大嫂to̍h叫我先去洗身軀浸燒水，フロ桶下火ná hiâⁿ，フロ水溫度ná chhèng-koân，身軀nā tòng-bē-tiâu to̍h繼續làu冷水，抑是peh起來小歇睏chiah koh浸，浸boeh 20分鐘，身軀ē chhèng煙，皮膚tńg âng-gê感覺足燒烙，咱kan-nā穿短褲節仔to̍h行出フロ間搧山風，氣溫3、4度，一屑仔to̍h無感覺寒，欣賞山腳風景，雖罔無聽著鳥聲，看he soaⁿ-bông（山雺）ùi楠仔仙溪溪底一chhop一chhop出現、一蕊一蕊chhèng-koân、變大，然後滿山坪lóng是雺霧無khoàiⁿ山景，hō͘我看kah無nih目sîn-sîn-sîn，m̄知經過外久，身軀開始感覺涼涼起畏寒，大嫂to̍h叫我較緊入去厝內穿衫，m̄-thang去hō͘感--著。

Chit種日子khi-mo͘-chih put-chí-á spring giang，有時mā-ē出現有海湧ê雲海，好天無雲霧ê暗暝，向西南pêng順楠仔仙溪溪流方向，ē-tàng看著m̄知Tá-káu抑是A-kâu ê燈光，實在新奇。

經過2 kó͘月食好做輕可ê消遙日子，面容春風已經pìⁿ-chiâⁿ phòng-phôe phòng-phôe îⁿ-lau-îⁿ-lau，大兄看小弟恢復勇壯，to̍h kau-tài四兄明仔再chhōa Jih--ê（Lah-jih）去集材現場做工。現場離寮仔20分鐘久，四兄hōaⁿ機器（水煙集材機）tī鐵枝路邊，Lah-jih tòe工人上山坪peh 10外分鐘看著1堆柴箍，工人先khioh雜柴hiâⁿ火薰蠓仔，thèng-hāu集材機水螺tân 1聲，工作開始，鉤柴鋼索走來1 kâi鉤柴ê機械，放落鉛索仔，工人倚去kō͘鉛索仔縛柴，柴箍足大箍kui大堆，工人sè-jī專業kā柴箍縛好勢，退轉來火烰仔（hóe-pû-á）邊，iāⁿ手，我看頭前面有一個人gia̍h旗仔iāⁿ旗仔，然後he柴箍ûn-ûn-á升koân giú tiàm ē山去，工人開始歇睏、烘火、phò-tāu，教Lahjih tàu khioh柴hiâⁿ火、看人按怎做工、注意安全，無外久鉤柴鉛索仔koh到位，koh-chài 1 pái鉤柴，水螺聲、iāⁿ手、iāⁿ旗仔1-20分重複1 pái。11點gōa-á，ta̍k-ê開始tháu飯包kā飯包觳仔khǹg-tiàm火炭頂烘，12點kha-tau，水螺tân 1聲，ta̍k-ê歇睏食晝兼bìn中晝到點外chiah koh做穡。

Kō͘火炭火hang--過ê飯包，he豬肉油臊ê汁sia̍p入米飯，thàn燒食，滋味比Pùn-ki-ô͘阿里山飯包重倍好食。食飽愛睏神隨到，隨人tok-ku bìn--一時仔，等水螺聲koh tân，繼續做工，做到日頭boeh落山chiah結束1工khang-khòe，轉去寮仔洗身軀、食飯、phò-tāu、hōe明仔再進度，然後chhàng入棉被o͘ⁿ-o͘ⁿ睏。

Kó͘-gōa月後，大兄叫我去做liû-lông工，流籠頭離寮仔無外遠，有兩條鐵枝路連結7號8號水煙集材機，負責搬運木材到流籠頭kō͘流籠放落山腳土場，chiah koh用トラック載到東埔東埔線土場轉運到阿里山到嘉義。

疊柴車囝是簡單粗勇車架掛4 kâi車輪，用pōng-pōng-á車『蹦蹦車』拖，Lah-jih ê khang-khòe是負責看頭看尾，hō͘工人差遣，有時坐pōng-pōng-á車去載柴箍，he pōng-pōng-á車需要經過一座2、3樓深ê柴橋，咱是徛tī pōng-pōng-á車ê腳踏仔，下面是深無khoàiⁿ底ê山坪，有一擺hō͘四兄看--著，害伊驚kah一直kau-tài m̄-thang koh坐。

集材工、流籠工雖罔做boeh 3 kó͘外月，thàn-tio̍h運動身體健康kah淡薄仔工錢，咱mā無學著siáⁿ-mih技術，總--是了解大兄四兄in來山場趁食是lōa艱難無奈leh過日，Lah-jih若無兄嫂ê疼痛照顧，to̍h無後日做老師ê機緣，感恩tī心內。

日出日落、chiūⁿ工hioh工，過日ná飛，復學日子tit-boeh到，siáⁿ知8月初7落大雨，liân-sòa siàng 3暝3日，親像面桶水kui桶tò leh cha̍k，厝頂杉仔瓦pi-pi-pia̍k-pia̍k連人聲to聽bē清楚，hiau-hēng--ò͘，幾工後chiah有人chah來消息，講鐵路害liú-liú，楠仔仙溪林道mā崩kah chiâⁿ嚴重，小火車自動車lóng bē走--得。Chit聲無停工--bē使得，有人決定boeh回鄉，大兄kau-tài Lah-jih tio̍h tòe人轉去讀冊。

大概7、8個工人pō͘-lián 2工到彎橋cha̍h tio̍h鐵牛仔車到嘉義驛，chiah koh坐バス/basu轉到厝。Chit chōa路有夠thiám頭有夠心適，阮ùi工寮落山cháⁿ旱路仔行楠仔仙溪林道，hoa̍h-kòe鐵枝路到阿里山歇暝，隔轉工順阿里山鐵路行，過橋nǹg磅空，tn̄g-tio̍h災害崩山bē得過to̍h chhōe旱路，he磅空烏烏暗暗koh滴水，kō͘電塗火chhiō光，旱路仔彎彎斡斡kham-kham-khia̍t-khia̍t有夠歹行，真正行到kha-sng撐腿到彎橋。半路聽人講彰化災害chiâⁿ嚴重，濁水溪大水chhiâng害鐵橋，火車停睏，hō͘咱心肝驚惶不安。