Tâu-á（骰仔）：Poa̍h-kiáu kang-kū

10月 14, 2024

撚骰十八骰： 20241012 Lahjih

Tâu-á（骰仔）：Poa̍h-kiáu kang-kū 20241012 Lahjih

Tâu-á有二款，一款si̍p-pat-tâu-á（十八骰仔），一款lián-tâu-á（撚骰仔）。

Si̍p-pat-tâu-á是li̍p-hong-thé（立方體）6面；lián-tâu-á是la̍k-kak-thiāu（六角柱）8面，中心chhng一枝ē使得kō͘ nn̄g-cháiⁿ指頭仔lián hō͘ tńg ê kha。

Si̍p-pat-tâu-á、lián-tâu-á lóng是poa̍h-kiáu ê工具。

下面紹介三款阮崁頂庄poa̍h-kiáu方式：

一、Lián-tâu：lián-tâu是kiáu ê名，lián-tâu-á是工具名。

Lián-tâu-á一粒、平底盤仔一塊、骰仔碗一塊，土腳chhu一張大張牛皮紙，頂面畫六格寫一、二、三、四、五、六。

內場tiàm盤仔lián撚骰仔，然後kō͘ 碗khàm tiâu，外場kiáu-kha開始hē-tù（下注），若無人koh teh-tù，內場to̍h喝「掀」，然後teh無tio̍h--ê「咬」，有tio̍h--ê「賠」。

Teh心：Kā錢khǹg tī格仔內，1賠4。

Teh岸：Kā錢teh tī兩格中間sûn頂，1賠2。

扛：kā錢khǹg tī 一、二、三；二、三、四；三、四、五；四、五、六頂面，1賠1。

Poa̍h lián-tâu，內場phiⁿ 6分之1。假設每點teh心lóng teh 1 kho͘，內場ē-tàng咬5 kho͘ 賠4 kho͘，穩趁1 kho͘。

Chit種無公平ê poa̍h-kiáu，ná-ē足濟人ài poa̍h，實在想bē-hiáu。而且lián-tâu-á ē-tàng做手poa̍h pháiⁿ-kiáu，有人lián-tâu-á內面灌鉛pìⁿ鉛骰（iân-tâu），有人掛電仔kō͘ khip-chio̍h控制lián-tâu-á面，m̄-chiah時常有人tn̄g-tio̍h kun-kiáu輸kah褪褲。

二、Iô saⁿ-liap-á：

Che是一種poa̍h-kiáu擔仔位，一隻桌仔，頂面khǹg一張畫六格寫一、二、三、四、五、六 ê紙枋，khah大粒ê si̍p-pat-tâu-á 3粒，搖三粒仔ê圓形鉛鉼盒仔chi̍t-kâi，盒仔蓋lēng-lēng。

3粒tâu-á khǹg-tiàm a̍p-á lāi，搖搖chhe̍k-chhe̍k--leh khǹg tiàm桌頂，外場kiáu-kha sûi-lâng選號teh錢，然後內場「掀」，無tio̍h「咬」有tio̍h「賠」。

3粒骰仔出現3面lóng sio-kāng，1賠3。內場咬5賠3，thàn 2。

3粒骰仔出現2面sio-kāng，1面bô-kāng，1賠2+1賠1。內場咬4賠3，thàn 1。

3粒骰仔出現3面lóng bô-kāng，1賠1。內場咬3賠3，無輸無贏。

結果（罔參考）：Poa̍h 3 pái，內場thàn 3，平均poa̍h 1 pái thàn 1，內場穩thàn無liáu，phiⁿ 6分之1。

Chit種poa̍h-kiáu擔仔位，時常出現tī年節、冬尾戲、廟會鬧熱時，輸贏無濟，sim-sek趣味，算是一種娛樂擔仔位seng-lí。

三、La̍k-kâu：La̍k-kâu mā有講si̍p-pat-á。la̍k-kâu、si̍p-pat-á是kiáu ê名。

1隻桌仔、1-kâi大碗公、4粒si̍p-pat-tâu-á to̍h ē使得poa̍h。2人ē使得對poa̍h，5-6個做伙poa̍h上sim-sek koh鬧熱。

內場輪流做siāng公平，poa̍h運氣無sio-phiⁿ，骰仔看現現bē做手--tit。

骰仔pōng碗公ē khiang-khiang叫，內場外場互相chhiàng-tù，me--ê喝「si̍p-pat」，kiáu-kha喝「píⁿ-chi」，人聲碗公聲鬧熱滾滾，tn̄g-tio̍h過年時chiâⁿ有歡樂氣氛。

Me骰仔姿勢百百款，有人骰仔輕輕la̍k輕輕hē，有人ùi碗公底me--khí-lâi 大大下摔--lo̍h-khì「si̍p-pat lah！」，siāng-gâu表演--ê，thiau-kang kā一粒骰仔giap tī bóe-chéng-cháiⁿ-á，先tàn 3粒試手氣，輕輕仔「khiang」兩三下，而尾chiah kā 4粒出力tàn落碗公內「si̍p-pat lah！」花樣有夠chē有夠心適。莫怪「kóng-tio̍h poa̍h-kiáu góa to̍h khì.」。