蕭平治老師 台文冊櫥

  工寮 tòa 3 禮拜： 工寮起 tī 山坑仔邊， 2 排 4 落枋仔厝，柴枋壁堵，厝蓋 khàm 杉仔瓦，獨身仔睏總舖，翁某有翁某房，有客廳灶腳有火爐，算是方便四是。 he 坑溝仔流水聲有聽 ìⁿ 聲無 khoàiⁿ 影， m̄ 敢 tham 頭看。 Hit-chūn 大嫂 leh 煮食，除了大兄四兄和 2 個查某孫仔，猶有幾個工人倚阮食，工人若 soah 工，寮仔 to̍h 真鬧熱。 1956 年 7 月底萬達風颱侵入，透風落雨，規暝 pi-pi-po̍k-po̍k 活 boeh 驚 -- 死， siáⁿ 知天光踏出門外， iáu-siū ，寮仔頭前  pìⁿ-chiâⁿ 1 條溪流， ùi 頂山割對寮仔厝邊落坑崁， mài 想 m̄ 知驚， ná 看 ná 恐怖， hó-ka-chài ，山神有保庇，寮仔前 2 欉大欉樹，橫 1 箍足大箍 ê 樹木， chiah hō͘ 山水斡對寮仔邊去，聽 tòa 邊仔間 ê Ian-á 兄講， in 翁仔某透暝拆壁堵 nǹg 過隔壁間， ta̍k-ê 看一下真，寮仔下 lóng 是土沙，頭擺見證 siáⁿ-mih 是土石流，原來是 chhū 山 chò-chiâⁿ 。 風颱過後，山路災害，運搬困難，工人 mā 歇睏，只好 khut tiàm 寮仔內 phò-tāu 話仙，有人去巡水梘仔 sūn-sòa 挽香菇 khau 山茼蒿仔。集材機恢復鉤柴作業，大兄 chhōa 阮去看現場， peh 崎山路歹行，無張持跋一倒去 hôe 著路邊草仔，隨時感覺手盤 sio-jia̍t 疼， ná 剌毛仔蟲 loah--tio̍h ，四兄講 he 是咬人貓，趕緊提萬金油 kā 我抹，隔轉工 chiah siau-hông--khì 。 工寮生活真單純，日 -- 時大人出門做穡，大嫂無閒厝內煮食 kā 囡仔洗蕩，我 kah 孫仔 thit-thô m̄ 敢烏白走，工人歇睏轉 -- 來，咱 to̍h tiām-tiām sîn 話鬚，聽大人 hap-sian phò-tāu ， 3 禮拜時間真緊 to̍h 過 -- 去，大兄 to̍h chhōa 阮轉去 Chhân-tiong-ng ( 彰化縣田中 ) 。

  第一擺來楠仔仙溪： 1956 年歇熱，大兄轉去 Chhân-tiŏng chhōa 讀國校二年級蕭輝虎、讀初中蕭平治 kap 妹婿陳瀧來楠仔仙溪 thit-thô 。 Hit-chūn 大兄 tī 楠仔仙溪工作站 8 號機做 ku-lí-thâu ，組頭是 A-teng 伯（陳萬忠， mā 是井仔頭人），另外有陳清廷組頭 ê 9 號機（ Pâng-á 伯後生）。 Hit-tang-chūn 嘉義 boeh 去阿里山，小火車 2 日 chiah 有 1 pang 車（ chi̍t-chōa ），行 siang-khia 日， khia 日上山，雙日落山。阮前一工 tī 嘉義驛驛頭前玉山旅社販仔間隔暝， hit 暝組頭 A-teng 伯請阮酒家食飯，頭擺知影白醋蝦料理。 隔轉工 tī 嘉義驛坐阿里山線到阿里山， hit 暗 tòa A-teng 伯 in-tau ，隔轉工 chiah ùi 阿里山到東埔到楠仔仙溪。 Chit chōa 阿里山 thit-thô ， tī 散文〈阿里山縣長〉有精彩 ê 紹介。（ https://chhantionglang.blogspot.com/2012/11/19580800-20111109lah-jih.html ） 〈阿里山縣長〉截取：「 1 956 年 Lah-jih 讀初中二年，輝虎 mā 已經轉來家鄉讀國校二年，歇熱期間，大兄 thiau-kang 轉來 chhoā 輝虎、 Lah-jih kap 大姊夫去楠仔仙溪 chhit-thô （渡假），田中→嘉義→阿里山→東埔→楠仔仙溪→工寮， 1-choā 路 lò-lò 長， ùi 散赤庄腳到都市， ùi 鬧熱都市深入到恬靜深山林內， 2 暝 3 工路途，經驗從來 m̄-bat 有 ê 經驗，第一擺到嘉義都市，第一擺 toà 旅社販仔間，第一擺 chhàm 酒家，第一擺坐登山火車……算 bē 了 ê 第一擺。」 「 Su-tong-sî 阿里山線火車車班（ pang ）雙奇日無仝， khia 日上山，雙日落山， 1 日 1 班，第一暝 toà 嘉義販仔間， hit 暗，大兄 ê 頭家（組頭）阿丁伯招待去酒家食飯， 1 個日本查某打扮 ê 查某人 phâng 菜 -- 入來，「あいうえお」講 saⁿh 聽無， kan-nā 知影「たなか」是講阮 toà 田中，坐 ...

東埔楠仔仙溪眠月線懷舊影像之旅（前言）   前言： 大兄蕭顏淵， 1940 年 18 歲， tòe 阿媽外家井仔頭（赤水） Pâng-á 伯（阿里山耆老陳清祥先生老爸）來阿里山做工趁食， Ùi 集材工做到 ku-lí-thâu ，阿里山、こだま、水山線、東埔線、眠月線、楠仔仙溪 lóng 有伊 ê 腳跡。 Lah-jih tòe 大兄來楠仔仙溪有 2 pái ， 1 pái tòa 3 禮拜， 1 pái tòa 半冬，對東埔、楠仔仙溪有較熟似 mā 有真深 ê 感動，對 Chiáu-pêng （沼平）到こだま到東埔到楠仔仙溪沿路 mā 真有記智。