蕭平治老師 台文冊櫥

  阿里山懷舊影像之旅  第11站「水社寮(Chuí-siā-liâu/水車寮Chuí-chhia-liâu) 驛」： 水車寮（ Chuí-chhia-liâu ）驛離嘉義驛 34.9 Km 水社寮古早號做水車寮， Chuí-siā-liâu 驛 1910-1945 日語名 Suisharyo ，譯做英文是 Water wheel ， to̍h 是咱講 ê 水車，所以水社寮古早名是水車寮， Chuí-siā-liâu 驛古早名是 Chuí-chhia-liâu 驛。 記得結婚前一年歇熱， bat 去水車寮 thit-thô 3-4 工，可惜 tn̄g-tio̍h 落雨天，大兄 ê 集材工作歇睏，無去現場，工人 kui 日 tiàm 工寮閒仙仙無 tāi-chì 做，有人相招去巡 chúi-kéng-á （水筧）， sūn-sòa bán 野生香菇 kap sî-kiat-kó （トケソ），無 goā 久 to̍h 挽一布袋轉來， ta̍k-ê 食 kah 真 kàu-khùi 。 聽工人開講， lóng mā 講水車寮，無講水社寮。 水車寮海拔 1186 m ， sui-bóng 熱天，天氣 mā 是感覺涼冷涼冷，古早 chia 是 m̄ 是有水車， to̍h m̄ 知影 --à 。 水社寮驛造林所苗圃，看 he 山頂 mā 是種竹 khah-chē ， chia ê 徛家厝 mā 是和交力坪驛 kāng-khoán ê 竹管厝。

  阿里山懷舊影像之旅  第13站「多林 (To-lô-ian/To-lîm/To-nâ) 驛」： 多林（ To-lô-ian/To-lîm/To-nâ ）驛離嘉義驛 50.9 Km 。 To-lô-ian 驛，海拔 1516 m 。 To-lô-ian ， Cou （鄒 Cho͘ ）語 Ngungutu ，日本時代號做 トロエン 驛 ， 在地工人講 To-lô-ian 驛， 1964 年改名多林（ To-lîm ）站。 To-lô-ian 驛，有二股鐵枝路， mā 有食水水鶴設備。 1966 年做兵期間， bat 來 chia 休假三工， tòa 驛頭邊工寮，可惜無去大兄集材現場。 Kah 24 號機關車翕相。 Su-tong-sî 是四嫂來 chai 煮飯，三個囡仔猶未讀冊，翕 chit 張 kó͘-chui 相片，大姊 āiⁿ 小弟，囡仔 āiⁿ 囡仔，見證做工出外人 ê 艱苦生活。 To-lô-ian 驛邊 chhèng 煙 ê 水煙機關車。 多羅焉（ To-lô-ian ）廣葉杉苗圃。 主要集材是柳杉。 蕭輝虎、蕭順華、蕭平治、四兄蕭順強。 大兄和叔伯小弟蕭順華 tī 集材現場。 Tī 36 號磅空口翕相。 To-lô-ian 驛附近翕相。 To-lô-ian 驛附近 ê 客車。 To-lô-ian 驛附近 ê 崩壁。 To-lô-ian 驛附近 ê 崩壁。

  阿里山懷舊影像之旅  第12站「 Pùn-ki-ô͘ 驛」： 畚箕湖 (Pùn-ki-ô͘) 驛離嘉義驛 45.8 Km Pùn-ki-ô͘ （畚箕湖）是一個 pùn-ki 形 ê lap-o-á 地『窪地』， m̄ 是『湖泊』。山坪 chhē-o ê 小盆地號做「 ô͘ 」， m̄ 是水窟 ê 『湖』。 Pùn-ki-ô͘ 驛設站 tī 海拔 1403 m ê 山窩 lap-o-á 地，腹地 chiâⁿ 闊親像畚箕形，號做 pùn-ki-ô͘ （畚箕湖），徛家厝足 chē ，是一個真鬧熱 ê 庄頭。 Pùn-ki-ô͘ 驛是阿里山鐵路大站、中間站，寄貨去阿里山，載山產落嘉義，生理人 tī chia  落貨、起貨、運搬足 ka-ia̍h 。 火車來到 Pùn-ki-ô͘ 驛，車母 tio̍h 食水添塗炭， ē 歇睏較久， chit-ê 時陣無論嘉義上山 a̍h-sī 阿里山落山人客，來到 pùn-ki-ô͘ 驛已經中晝，坐 2 點外鐘久，人 thiám 腹肚 iau ， tio̍h 趁機關車去食水添炭時間，買 chit 粒飯包食一寡點心， koh ē 使得落來行行 --leh  較 bē 無聊。 等火車 tòng-tiām 停睏好勢， kui-ē 驛頭人客 chiâu 振動，在地生理人隨時出洞，「べんとう   便當」「 bán-thô 饅頭」「 liâng--ê liâng--ê 」 gô͘-khî-kā-kap ê hoah 賣聲 hán-hoah 聲有夠鬧熱。 記得 1956 年熱 -- 人，大兄 chhōa 我去楠仔仙溪 hit 擺，沿路大兄 ē 買果子 sì-siù-á hō͘ 我食，已經食 kah 歡喜 but-but ，想 bē 到來到 Pùn-ki-ô͘ 食 hit 粒用柴片仔飯包觳仔貯 ê piān-tong ，滋味到 chit-kú 猶原 kì-tiâu-tiâu ， he 柴片仔飯包觳仔飯包，清米飯 kah 一塊瘦豬肉，真正食 kah giōng-boeh 流目屎，讀三冬初中從來 m̄-bat 食 tio̍h chiah-nī 好食 ê 飯包。 Che是 古早 Pùn-ki-ô͘ 驛，有六股鐵枝路，有車庫、有水鶴，站內真濟車囝、鐵枝仔 kap 斬木仔， lóng 是提供調度、修護よび用 --ê 。 Pùn-ki-ô͘

  阿里山懷舊影像之旅  第10站「 Ka-le ̍ k-pê ⁿ /Kau-le ̍ k-pê ⁿ 驛」： 交力坪 (Ka-le ̍ k-pê ⁿ /Kau-le ̍ k-pê ⁿ ) 驛離嘉義驛 34.9 Km 火車來到Ka-le̍k-pêⁿ，hō͘旅客小歇睏，在地人趕緊phâng在地山產出來賣，mā是chiâⁿ鬧熱。 交力坪，日本時代號做 Jiaoliping/ Chiaolipeng ，因為漢字，咱 kā 叫做 Ka-le ̍ k-pê ⁿ /Kau-le ̍ k-pê ⁿ 。 Ka-le ̍ k-pê ⁿ 出產竹， kui 山坪 lóng 是桂竹仔林，庄頭人家厝 chiâⁿ chē ， lóng 是桂竹仔厝，chit張相片無 khoàiⁿ 驛頭。 Kui-chiah 厝 lóng 是竹仔起造，柱仔、楹仔（ ê ⁿ -á ）用大管 ê  bâ-jî-tek 『孟宗竹』，壁堵厝頂用桂竹仔，砛簷用石材，壁堵無糊塗有 khah 特別，真正是竹管厝。

  阿里山懷舊影像之旅  第9站「 Lê-hn ̂ g-liâu 驛」： 梨園寮 (Lê-hn ̂ g-liâu) 驛離嘉義驛   31.4 Km Lê-hn ̂ g-liâu 驛，漢字寫做梨園寮驛，其實 kap 「梨」「犁園」無關係，聽講古早 chit-ê 所在出產竹，在地查某人 mā tio̍h tàu 做穡頭， to̍h tī chia 搭一間寮仔，方便歇睏 kap hō͘ 囡仔食奶， to̍h 號做「奶寮」； Lê-hn ̂ g-liâu 驛出發 to̍h 隨 koh nǹg 入 20 號磅空，所以有人 kā 叫做「二十號仔」。 Lê-hn ̂ g-liâu 驛海拔 904 m ，氣溫 khah 涼冷，需要加 tha̍h 一領衫 chiah-bē 寒。   Lê-hn ̂ g-liâu 驛 ， m̄ 是大站， m̄-koh 有山產，特別出產竹仔，竹仔是建材， mā 是家具農具編 ut 材料，相片看著 ê 部份是貨運倉庫，驛頭 tī 西爿面 。