人生75歲感言 20160807_Lah-jih

 人生75歲感言       20160807_Lah-jih

人生像peh山，tsiūⁿ山充滿新奇向望，m̄驚跤酸手軟，喉乾喙渴，總--是跤步踏在勻勻仔peh，sè-jī khàng，小歇了後繼續行，目標明顯，著是欲peh-tsiūⁿ山尖，享受phah拚流汗ê爽快。落山to̍h無仝款，忝頭經過，tsiah知落崎輕鬆，ná開講ná聽鳥聲，有體力有趣味，感覺人生實在bē-bái有價值，siáⁿ知落崎落一半，發現跤頭食力閣bē堪。

俗語講了上實在，「年驚中秋，人驚四十。」中秋一下過，過年liâm-mī到，tsiūⁿ-siap to̍h bē liap，日後ná有可能「老馬展鬃」。若用現代營養、醫學、休閒、運動來看，已經bē通，mài講40是當青春，5-60活龍一尾，7-80歲出門旅行滿世界，人驚四十已經是無影無 一跡。

記得70歲生日寫一篇〈70歲生日感言〉tsiah ta̋ⁿ--過，ná-ē tsi̍t-ba̍k-nih-á又閣是爸爸節我ê 75歲生日。生日tsiah一工，有啥乜thang歡喜，過日輕鬆tsiah是重要，日日過了有合心，m̄-tsiah感覺日子ná飛，飛過電腦，飛過乒乓桌頂，飛過山林海邊，飛過高空降落外國，猶有上重要--è to̍h是tī心內飛倒轉去囡仔世界，不知不覺到無煩無惱到入學讀冊，師範讀到教冊，然後娶某生囝為生活phah拚。然後--nē？渡過一世人。

是一个機緣，50歲hit年踏入台語文世界，從此phah死無走到tsit陣。70歲到75歲是人生落崎ê尾流，tshū-tshū叫快速ná飛，可惜是欲飛落地，最後入土回歸大自然。

趁猶閣ē行ē走，ē想ē寫，著繼續活、繼續動，繼續思考、繼續寫作，當然老人不比少年時代，家己著規定，穿hō͘燒、食hō͘ tú好，代誌寬寬仔是，工課m̄-thang貪做，「我做--è已經有夠濟，mài做 無差我一个。」這是放慢跤步leh提醒家己，常kap人講耍笑，「tshun-ê日子無濟，m̄-koh一工ê時間有夠濟。」講是滾笑，實情mā是按呢，老人若m̄家己揣空課做，一日閒仙仙，敢bē較緊去做仙。心意huāⁿ-tiāⁿ，繼續運動，繼續tshit-thô，繼續耍影音唱KTV，繼續kap電腦、手機仔、iPad輸贏，運動身體，kap朋友交陪，繼續寫作。

講著寫作，ùi 2011爸爸節到今，〈老人囡仔性閒閒罔話仙http://chhantionglang.blogspot.com/〉總共寫過300外篇，日常感觸，教學報告，輸入法紹介，kap台文朋友群組phò-tāu討論，上kah意回憶囡仔時代記智to̍h寫〈滾地龍ê年代〉：Siang-kóng--è in兜ê寶貝、Tiak珠仔 ī ばんざい、跳箍仔kap拍球、一年仔生放屎糊房間、狀元、人生第一張しゃしん、搧牌仔、Cho̍k窟仔、Ī 鼠牛虎兔kap硩撚骰仔 、唱歌ê啟蒙老師(懷念二兄)、Phah kan-lo̍k 、將本土語言教學帶往資訊化世界_經驗交流。

2012年tsiah寫22篇，2013年寫38篇，無疑悟2014年寫102篇，2015年寫120篇，2016到stit-mái已經寫55篇。為啥乜tsit三年來ē大量寫，一方面是受張教授學謙兄鼓勵，閣有彰化縣前文化局長陳慶芳兄提供真濟古物仔hō͘我翕相，hō͘我寫bē少ê「古物仔」紹介，有圖有台語文，得著bē少朋友欣賞討論。

幾冬前想起家己身世，是唐山過台灣ê中國華人，抑是在地hō͘滿清賜姓ê平埔族？hō͘我真懷疑mā真好奇，ùi 2010年用4冬時間編寫一本阮家族ê《崁頂蕭姓肇基祖朝宰公世系大房廷光公派下家譜》，thang-hō͘後代囝孫數念參考。

詳細了解家族史，tsiah-koh想著有需要寫一本家己ê歷史，因為蕭平治ê歷史家己來回想，家己來書寫一定真實無虛，極加參一寡味素增加趣味，『家醜不可外揚』，這to̍h bē使得怨嘆作者ê避嫌無用心，所以〈看相片回想人生〉是leh描寫Lah-jih ê記智，mā是leh紹介70外冬來ê生活一點一滴，講古兼敨放心思，目前已經寫到娶某，家己獨立phah拚。

早期受著師傅呂興昌教授鼓勵兼背書，寫〈台灣俗語鹹酸甜〉有600-tshiám，兩年前完成《崁頂蕭姓肇基祖朝宰公世系大房廷光公派下家譜》，寫俗語hō͘我再思考台灣俗語ê意涵，窮真有好mā有m̄好，好--è用來鼓勵家己鼓勵別人，bái--è警戒家己mā ē使得提醒別人，m̄-tsiah我ê師傅呂興昌教師按呢鼓勵：「平治兄ê生活經驗非常豐富，五花十色ê社會動態、mê-mê kak-kak ê 人情世事，攏tī伊利劍劍卻不失溫柔ê筆下，展現出值得咱進一步思考ê問題意識，這佮現代其他有心ê文學書寫仝款，攏有歷史見證ê價值。最後，平治兄ê台語書寫──這是伊這本冊穴脈ê所在──，上大ê 特色就是盡量將咱台語特有ê 語彙佮用法記錄--落來。除了俗語本身無話講ê suí以外，伊mā真拍拚寫出會當佮俗語水準相當ê話語，所以整个看--起來，這本冊suah 無輸是提供hō͘台語bē siáⁿ liàn-tńg ê少年家一个重再認bat母語ê機會，伊ê教育意義非常ê深遠。」

經過4冬收集族親戶口抄本kap詢問加我歲數ê族親印證，tsiah編寫出這本200外頁ê《崁頂蕭姓肇基祖朝宰公世系大房廷光公派下家譜》，彩色印版無料送hō͘每口灶一本收藏。

付出to̍h有受益，編寫〈台灣俗語鹹酸甜〉hō͘我重新認bat做人道理kap習俗、義理，改變道德人生認知；編寫《崁頂蕭姓肇基祖朝宰公世系大房廷光公派下家譜》，ùi開基祖蕭朝宰1751年寫到2014年朝、廷、輝、志、正、大、光、昌、興、家、輔、國，共11世代字輩、名字、婚姻、住所、人丁、事跡⋯種種，根據戶籍謄本ē記載【戶籍謄本記載】，聽講--è ē kā 人名交代，若是編者所研究、推論、印證，仝款標明負責。11世代將近300冬有文字文獻(鬮書、公媽牌、墓牌)ê歷史，各房各口灶人丁盛衰，好額散，歲壽長短種種變化，hō͘我深深了解「無定數ê人生」tsiah是真理，家己價值家己感覺，有一好，無兩好；有是ló͘，無是叫艱苦⋯種種ê道理也m̄是絕對--è。看佛經Arahant/arahant 阿羅漢：「我生已盡 梵行已立 所作已作 自知不受後有」ê內涵有小可參悟，siàu想bueh行「無功用行」完成人生路，一去不再回。

舊年熟似中央研究院士老番Kaim Ang洪佳音教授，得著「野生思考」ê研究方向，重視在地語言ê書寫，閣較加強寫作方向ê信心，只是m̄知5年後敢猶有法度閣來寫一篇「80歲ê人生路--bò͘？」