家譜序文：向祖先交代 對囝孫負責

 《崁頂蕭姓肇基祖朝宰公世系大房廷光公派下家譜》序：

2014/8/8是Lah-jih 74歲頭一工，出版《崁頂蕭姓肇基祖朝宰公世系大房廷光公派下家譜》家己慶祝：

序：向祖先交代 對囝孫負責 Lah-jih蕭平治20130808

【蕭家家譜世傳世：蕃薯落土代代湠 釘根旺欉振家聲】

編寫家譜ê意義：

1、 慎終追遠，懷念祖先：食果子拜樹頭，飲水思源頭。

2、 感恩祖先建立chit-ê家，感恩父母，生我、養我、chhiâⁿ我。

3、 家己編寫家己歷史，hō͘囝孫數念。

4、 家己讀家己歷史，了解先人ê奮鬥。

5、 了解家己身世，堅持家己尊嚴：我to̍h是我，無人會當改變我ê身份。

6、 朝宰公是唐山過台灣ê徙台祖？

7、 朝宰公是被滿化（漢化）ê阿立昆族（Arikun）大武郡社在地人？

8、 認識祖媽，重視母親女性：父系社會kap母系社會ê平衡。

9、 認識族親，連絡感情：天腳下上親是朝宰公派下囝孫。

10、 兩性平等，m̄-thang閣重男輕女：生囝是天賜，飼囝chhiâⁿ囝是責任。

時代變遷真緊，ē記得1948年囡仔時代，咱 兜外圍是刺竹模、燈籠花欉做籬笆，大門是柴造門樓，三進三落，非常氣派，從大路peh三坎上平台，chiah koh落三坎入門口埕；厝間無夠40間，人口無夠60人，經過1甲子後ê今仔日已經是人丁旺盛，頂埕、下埕、正身、護龍，攏是厝間兼疊樓仔，kap原本ê 厝宅改變真濟。

出外人常常想起故鄉，老歲仔人較捷是想起細漢囡仔時，趁頭殼猶清醒猶有氣力，趕緊編寫家譜，共【戶籍謄本記載】kap一寡記智寫--落來，一--來 解心悶，回想人生，二--來 也thang做蕭--家歷史，hō͘後代囝孫數念追思。

根據大旺公遺留〈1899年蕭朝宰公復興大租 均分䦰書〉記載，肇基祖朝宰公傳下有五大房，建置「復興館大租」，1冬收租粟大約有110石，算是好額人，傳到第六代日本人來時，大旺公、大趾公 chiah參詳將此大租均分拈䦰為定照䦰掌管。古早人早婚，按朝宰公到大旺公有五世代（9祿朝10廷11輝12志13正14大），一世代若以25年計算 （25x5=125），建置「復興館大租」到大旺公時代已經有125年久，1899－125=1754，ē-tàng斷定朝宰公出世tī 1754年進前（2013－1754=259），用按呢推算，肇基祖朝宰公年紀到2013年大約有300歲（259+50=309）。

另外根據志榮公遺留〈1819年蕭輝騰公竹圍 厝地䦰書〉記載，輝騰公傳下有五大房，竹圍厝地有三處，可惜現此時只有志榮公傳下囝孫kap崁頂庄竹圍厝地。2013－1819=194，ē-tàng證明 崁頂庄竹圍厝地至少超過200冬。聽講蕭--姓 奮公派下第四世團圍公ê祖厝本來起tī小紅毛社，咱祖 朝宰公有可能本來是tòa-tī小紅毛社hit爿。朝宰公傳五大房，大房廷光公囝孫tòa崁頂，是siáⁿ-mih時陣搬徙來崁頂，建置現此時「坐西向東」ê竹圍厝地，已經無法追查。若根據志榮公ê墓園（大墓）是tī崁頂庄南爿第三公墓邊來思考，崁頂祖家應該有200年以上ê歷史。

咱祖廷光公、輝騰公、志榮公ê厝宅規模是崁頂庄上闊上大範上蓋有「兜」ê感覺，正身護龍，前有頂、下埕，後有古井，四箍圍有刺竹模kap燈籃仔花籬笆，siōng特別--è是大門有門樓仔，三進三 落，非常氣派。厝宅是坐西向東起，東爿大門外是崁頂巷（崁頂路），西爿kap水溝為界，北爿是頭前庄，南爿是日性、清俊內底kap阮兜水田。較早崁頂庄有 公埕、荖宅仔、竹圍仔、榕仔跤、頭前庄、後壁厝kap咱兜幾個角頭地號名，咱兜ê正身護龍竹圍厝地，人攏講做「瓦厝底」抑是「門樓仔內底」。

編寫《崁頂蕭姓肇基祖朝宰公世系大房廷光公派下家譜》對2010年開始到今，用bē少時間kap精神調查、推論、對照、查證、編輯，chiah有舊年hit本初版家譜印出，非常感謝逐家提出意見、校正kap提供戶籍謄本資料。家譜編寫用語，盡量用祖先ê語言「台語」書寫，台語書寫採用漢羅文，to̍h是漢字和羅馬字合寫ê方式。

編寫家譜以公媽牌肇基祖朝宰公為第一代、第二代廷光公、第三代輝騰公、第四代志榮公…。當初冊名是《第四代祖志榮公家譜》，因為發現鬮書chiah知，輝騰公是傳下五大房，可惜其他四大房並無發現後嗣，所以chiah將冊名改做《崁頂蕭姓肇基祖朝宰公世系大房廷光公派下家譜》。附錄《開基祖朝宰公身世研究》部份是Lah-jih個人研究報告，依照1奮2永3伯4團5文6仕7元道8德世9祿朝10廷11輝12志 13正14大15光16昌17興18家19輔20國21奕22世23聯24芳 字輩編寫。為著走揣咱祖朝宰公ê身份，是唐山過台灣心肝結規丸ê徙台祖？抑是本來to̍h tòa tī chia徛起ê平埔族洪雅族（Hoanya）/阿立昆族（Arikun）大武郡社在地人？經過看冊、看戶籍謄本、網路搜尋資料文獻，用信仰、風俗、語言各方面去推論，親像刺竹圍厝地、拜地基主、老母叫ī--ā、墓牌堂號寫「皇清」無寫「書山」，戶籍謄本種族欄hō͘人用烏墨抹烏，攏是事實，敢講這kap咱是在地平埔族有siáⁿ-mih牽連？特別《書山蕭氏族譜》內容tī徙台祖進前ê資料，有足濟錯誤懷疑。因為年代遙遠，查證無容易，當然m̄敢大主大意去確定咱祖朝宰公是唐山來ê徙台祖，抑是被清化ê在地平埔族後代。總講一句，《書山蕭氏族譜》印證含糊錯誤，欠缺科學文獻證據，m̄-chiah提出一寡懷疑。祖先是咱ê祖先，來源遙遠不可知，為著認祖歸宗，若無細膩，變成認賊做老爸，按呢to̍h大不孝對不起祖先。Ē-tàng安慰ê是咱祖肇基祖朝宰公派下ê真實歷史已經得著印證，300年ê蕭--家歷史，有字為證，值得驕傲，若是boeh閣進一步追查，to̍h需要較有能力有意願ê囝孫，去做科學性、學術性ê調查研究。Lah-jih才疏學淺，kan-nā研究到chia，提供參考、思考，若有無妥當所在，攏是Lah-jih該當負責。

前年2011年4月1日已經將志榮公媽靈骨遷徙彰化縣田中鎮第七公墓聚賢堂服祀（埔頭仔埔公墓納骨塔）。舊年2012年清明前，興燦整理房間時發現2張鬮書（文書），1張1819年嘉慶年代輝騰公傳下五大房厝地分掌鬮書；1張1899年明治時代朝宰公傳下五大房均分大租鬮書，內容所寫祖先名字，kap公廳公媽牌所題祖先名字完全符合，這ē-tàng證明志榮公有2013－1819+20＝224歲，而且tòa-tī崁頂庄現此時厝地，肇基祖蕭朝宰公已經將近300冬ê歷史。這是值得安慰驕傲ê歷史，ē-tàng講《書山蕭氏族譜》內容所寫ê【徙台祖】蕭朝宰，to̍h是咱兜肇基祖朝宰公，伊傳下ê囝孫名字輩份攏是精確歷史，有字為證。

編寫家譜是向祖先交代，對後代囝孫負責ê事工，chit幾年來，耳孔邊時常傳來祖先ê叮嚀交代：「你tio̍h用心，你tio̍h kā咱ê歷史記錄落來hō͘囝孫知！」咱有將近300年有根據有源頭ê歷史，雖罔無siáⁿ-mih輝煌ê家業，但是咱有腳踏實地，誠實做人ê家教，這是值得驕傲安慰 遵循ê傳統。畢竟咱是普通人，難免厝內有互相誤會互相計較ê代誌，但是he攏是小事，並無影響咱家族和諧ê親密互動互助，人講「拍虎掠賊親兄弟」，兄弟叔孫若團結，to̍h-ē形成真大力量，bē hō͘別人看輕。求真求善求傳承，向望逐家ē-tàng kā頂一輩ê是非誤解放水流，兄弟叔孫互動、互諒、互相sio-kēng支持，認真拍拚，歡喜過日，chiah是hō͘先人安歇上大ê安慰kap期待。祝 福逐家快樂！祈求逐家平安！ 

朝宰>廷光>輝騰>志榮>正養>大毛>光振>平治 

                             Lah-jih蕭平治 寫tī 2013/11/12