親身ê經驗----1999.9.22上午寫921集集大地動

 【親身ê經驗】 (1999.9.22上午寫921集集大地動)（白話字校對版廖淑鳳）

「啊！？啊！？哪會按呢？」睏夢中感覺眠床那leh gô，聽見牽手雄雄mo͘h倚--來喝出驚嚇ê聲音，警覺著...「啊！地動！地動！」ê恐怖。

「bôa-á緊，bôa-á緊！免緊張，免緊張！」緊張中家己心內嘛已經清醒--過來，m̄-nā是地動--niā-tiāⁿ，是大、非常大ê地動、從來都m̄-bat拄著--ê，思想kap目睭仝一時精神peh金，「tio̍h鎮靜，m̄-thang驚惶」，心內提醒家己，tī微微ê燈光中，影著眠床邊ê電腦桌仔，chhū來chhū去，越頭看眠床頭ê鬧鐘仔，時間是午夜1點50分。(1999.9.21零晨)

thèng-hāu牽手清醒知影是啥物代，隨時kah伊同齊離開眠床，一時間電火突然失去了光明，進入完全是烏烏暗暗ê世界，好佳哉，「張持無蝕本」，眠床頭不管時都有準備手電仔，無khà穿外衫褲，隨時sa起手電，嘛趕緊喝咻三樓頂ê如芳(第三查某囝)趕緊落樓跤，chit時才聽見有 phi-phi-phia̍t-phia̍t ê窗仔門聲kap khin-khin khong-khong相pōng ê雜錯聲，警覺著確實是非常大非常大ê大地動，m̄是滾笑--ê，客廳ê中心點上安全，三人手牽手，chim-mi̍h交待一定m̄-thang驚，一 定著鎮靜，家己心神嘛著掠hō͘在，等tiàm厝內，抑是疏開外口？無電，頭前門是電動門，用手giú是無hiah-ni̍h緊開，著ùi後壁門，隨時吩咐行到灶跤，又閣一chūn搖搖hiáⁿ-hiáⁿ，bē使衝碰（chhong-pōng），按呢，離開一定危險，小sìm--一下，幾秒間後，拍開後門，一爿斟酌地動ê狀況，一爿注意頭前ê路，死--à！kap厝邊石先生ê隔間鐵門煞拍bē開，後紐kit-tiâu--leh，緊張萬分，若閣搖--khit來beh按怎？趕緊閣入來厝內，攑摃槌仔，用敲--ê，吩咐in tiàm 內面，摃槌仔攑--leh，趕緊到門邊，輕輕仔兩三下，好佳哉有效，「khah緊--出來」，死--à，石先生in ê後尾門出口，仝款kit-tiâu--leh，閣敲兩三下，有效，感謝神佛保佑，家己ê鎮靜，離開可能有危險ê厝內，來到厝邊ê hit片空地，緊張氣氛小可放落，注神一看，空地已經集聚一大陣ê厝邊隔壁，逐家ê驚惶攏寫tī喙裡kap 無話無句ê恬靜中，驚惶、驚嚇、刺激、恐怖、無奈、無助...遮ê恐怖電影才有ê災難鏡頭，已經深深印tī一生ê記持內，永遠bē消失。

長ló-ló ê暗暝！

離開厝內，來到外面，緊張恐怖ê心，已經tiâu-chāi記持，kek-tī胸坎，無悲傷無笑容，『凝聚』『停住』，時間忽然變慢，攑頭看天，滿天星，gia̍p-gia̍p爍，m̄知影外久m̄-bat看見，怨嘆哪會chit時出現，阮都無心情欣賞，阮chit-chūn上蓋tì重--ê是土地ê受氣，m̄知tī時天公伯--à才會心平氣和mài受氣，歡歡喜喜。

地牛猶leh繼續翻身，地leh搖，人ê心就tòa-leh chhoah ，三不五時就hō͘你心肝íⁿ-á tiuh三下，一分鐘！五分鐘！十分鐘，giōng-beh無時間ê記持，想動就動，beh chhoah就chhoah ，chhoah kah人 ê心bē自在，chhoah kah hō͘人bē記得喘氣。

「又閣leh搖--ā！」

「ó͘？he啥物聲？li̍h-lia̍t叫？」

「khah緊雙手合十，趕緊唸阿彌陀佛，拜託佛祖著保庇！」tòa對面ê高先生看in hit棟四層樓tī地動中搖咧搖咧，緊張中khah緊交待伊ê後生新婦孫仔tàu求佛祖保佑。

「哪會按呢？哪會按呢？食chiah大漢就m̄-bat拄著，有夠恐怖to-tio̍h！」林先生家己ngāu-ngāu唸，是leh講hō͘逐家聽。

「o͘-bah-sáng ！你bat tn̄g著--無？」

「m̄-bat--à，會記得細漢阮老爸bat kā我講--過，唉！bē記得啥物所在--ā，hit擺可能真大ē...」

阿婆--ā已經八十幾歲。

「啊！恁看，東北爿遐哪有火光？」

「m̄知佗位leh火燒？」

「敢會是hit間加油站？」

「m̄是，無可能，he離咱遮真遠--leh，上無嘛tī八卦山脈hit爿？」

雖然有人ê聲說，不過肅靜稀微，無半點燈光，kan-nā有天頂ê星光，tī恬靜、時間停睏中，鼓吹家己提出勇氣，第一遍進入充滿危機ê厝內，天氣涼冷，無hiahⁿ幾領衫褲禦寒bē使--chit，猶有止渴ê茶水...心意掠定，小心衝入，sa衫褲，kōaⁿ水，順紲巡Gas，趕緊提一粒收音機，馬上離開...

拍開收音機，「tú-chiah ê大地動，發生tī日月潭東爿11 Km集集ê所在，7.3級...」