阿里山懷舊影像之旅 話頭

 阿里山懷舊影像之旅        Lahjih 20240410

阿里山懷舊影像之旅---話頭

咱nā來阿里山thit-thô，請你tiāⁿ-tio̍h來Chiáu-pêng（沼平車站）參觀Chúi-ian（蒸汽）集材機kap hit枝koân拄天ê はしら（集材柱），而且閱讀說明，了解阿里山開發歷史。

Chúi-ian集材機，是集材工鉤柴動力（power）。

伐木作業伐木工人kā樹欉剉倒裁剪tī山坪了後，chiah換集材作業施設集材作業。

集材工作施工，代先tī運材鐵枝路邊安設集材機，然後chiah利用集材機動力chhāi はしら（集材柱）、牽kemu鋼索、nimong鉤柴鉛索仔kap各種絞ân固定等等khang-khòe，然後chiah ē使得開始鉤柴作業。

Khǹg tī沼平舊驛展示chit台是七輪捲筒（リール Reel）水煙集材機，火鼎（鍋爐ボイラーboiler）是hiâⁿ柴m̄是hiâⁿ塗炭。伊ê鉤柴半徑大約7-800 m遠。

Chhāi-tī沼平舊驛chit-kiはしら（集材柱）koân tú天，ùi日本時代khiā到taⁿ，bat khoàiⁿ 1車1車êひのき、ベニヒ各種原木，ùi各山區搬運到chia， chiah koh轉運到嘉義，創造嘉義繁華幾十冬，mā看盡阿里山林場ê起基、chhia-iāⁿ、沒落。

阿里山森林鐵路ùi 1912通車了後開始伐木、集材，到1964年停止剉樹，1965年結束殘材整理，chit期間沼平是阿里山林場木材轉運站，嘉義chiâⁿ做阿里山林場木材集散地。

阿里山山林劫數難逃，1912到1945有33年是日本人ê損蕩；1945到1965有20年是咱政府ê破壞，53冬ê剉柴，二萬坪到阿里山、眠月下線、水山、こだま、東埔、楠仔仙溪各山區kui山坪ê大欉樹to̍h án-ne消失。

蕭顏淵是我ê大兄，16歲去山頂井仔頭阿媽外家kā舅公做長工，做穡牽牛車，1940年18歲tòe Pâng-á伯去松蘿山阿里山林場做集材工，後來升做ku-lí-thâu（工頭），bat tīこだま、水山、東埔、楠仔仙溪、眠月下線、Tolôian做集材工作，身份證職業欄登記是 玉山林區管理處乙技技工，一直到60外歲退休chiah轉來田中崁頂庄。

將近50年阿里山來來去去，盤山過嶺發落集材工作，算是老阿里山人，伊ê後生蕭輝虎bat kin-tòe伊身邊工作6-7冬，mā有翕一寡現場相片。

1956大兄chhōa我頭一擺坐阿里山火車到阿里山、東埔、楠仔仙溪thit-thô三禮拜，1959師範休學期間koh來到楠仔仙溪休養半冬，mā有做過集材工kap流籠工，後--來tn̄g-tio̍h八七水災soah用步輦行路轉去到Lo̍k-moâ-sán（嘉義縣竹崎鄉鹿滿）chiah坐鐵牛車到嘉義盤車轉到田中。M̄-chiah嘉義到阿里山，阿里山到東埔，東埔到楠仔仙溪，坐車、行路、做工，留chin-chē記智，產生chin-chē親密感情。

因為Facebook面冊熟似劉明財先生，koh送我200幾張伊收藏ê舊阿里山相片，m̄-chiah想boeh kā我ê記智kah認bat記錄--落來，thang做阿里山林場記憶補充一寡資料做見證。

1968來多林（To-lô-ian/To-lîm/To-nâ）thit-thô，和蕭輝虎、蕭順華、蕭平治、蕭順強（四兄）翕相。

四兄kin-tòe大兄mā有2-30年，除了做工mā幫忙記工、記賬；輝虎ùi嬰仔到6歲chiah轉去家鄉讀冊，後--來bat tī楠仔仙溪、多林、眠月下線tòa 6-7冬，除了集材經驗koh翕一寡相片，chiâⁿ做阿里山林場ê記智。