八十歲生日感言

 80歲生日感言——感恩人生   蕭平治

【刊tī台文通訊bóng報 第358期 2024年1--月】 

 

2021年8月初8 ê 80歲生日chiâⁿ特別。

因為武漢肺炎傳染病tio̍h病到taⁿ 

iáu leh發生、iáu未停止，早幾日阮就交代查某囝、後生，m̄免tńg來kā阿爸慶祝，平安過日比過生日khah要緊。下暗頓食麵線kah豬肉、滷卵，無豬跤。10點跤兜，hām牽手kap第三查某囝切雞卵糕，應用現代科技視訊kap後生查某囝做伙唱生日歌。

另外一个特別--ê，是前一暝8月初7暝，參加「台文通訊30冬第八回台灣文學欣賞會」，主辦人鄭良光兄、張秀滿姊kap品志邀請我做主講，kap逐家對談分享我ê台文路，che是一个真重要ê開講會，所以事先le̍k一个摘要：

1. 1993年10--月《台文通訊》第24期刊出《阿爸ê鹿角薰吹》：就已經認定「漢羅合用」是目前寫台灣人「生活台語」上ha̍h軀ê文字，感謝鄭良偉教授啟示。

2. 寫《台灣俗語鹹酸甜》tio̍h感謝呂興昌教授牽教。

3. 寫《作田人博物館》tio̍h感謝翁佳音教授、張學謙教授鼓勵。

4. 寫《Lahjih寓言》tio̍h感謝李勤岸教授鼓勵kap林俊育長老連載tī台語信望愛網站（https://taigu.fhl.net/index.html）kā我肯定。

5. 感謝蘇芝萌兄、林俊育長老kap濟濟台語輸入法開發者幫贊我電腦寫作。

6. 《台文通訊》、《台文BONG報》是學台語讀寫ê範本，陳雷兄、陳明仁兄ê作品看上濟。

7. 所以我認真學Pe̍h-ōe-jī，教人「台語讀寫」，內容主要是「生活台語」。

8. 看我ê作品，重點ài囥tī語言，台灣人ê「生活語言」。

9. 為著復振台語，我認真寫台語文編台語教材，寫囡仔歌、囡仔古，俗語，庄跤人ê工具、用具，作田人ê牛犁耙，範圍chiâⁿ闊，寫我ê了解kap經驗。

10. 已經出冊--ê有：《台灣俗語鹹酸甜》四本、《歡歡喜喜教台語》、《輕輕鬆鬆讀台語》、《阿爸ê鹿角薰吹》、《Lahjih身世kap親人》；已經完稿boeh出冊--ê有《作田人博物館》kap《Lahjih寓言》。

11. 1995年開始，就應用台語輸入法踮電腦寫作做工，全部是電子檔案，m̄-chiah hō͘鄭良偉教授分詞，khioh boeh chiâⁿ萬詞詞庫，mā因為雜chhap，幫贊過台語輸入法ê事工。

點半鐘久ê視訊，除了紹介摘要，koh kap張秀滿、品志、陳雷、鄭良光、陳豐惠、丁鳳珍開講講真濟《台文通訊》過去kap我有關連ê故事，陳雷兄肯定〈阿爸ê鹿角薰吹〉是一篇台語文經典作品，肯定我強調「生活台語」ê重要性。陳豐惠、丁鳳珍講我教小學，逐工kap學生囡仔鬥陣，chiah有chiah多元ê作品——其實教冊43冬lóng是華語對談，是束縛嚨喉ê捆索，阻礙khah濟幫贊。Ē-tàng認bat多元，是蹛tī庄跤作田人囝，雖bóng hân-bān作穡，總--是看濟、hòⁿ奇hèng問、hèng做店仔thèⁿ sîn話鬚所粒積ê原味。

回想chit 80冬，人生lóng是感謝：

一、感謝阿爸、ī--ā ê DNA：善良古意kap巧氣是天生，是爸母生成，眼耳鼻舌身意到taⁿ猶原好勢好勢，頭殼靈精思考bē têng-tâⁿ。

二、感謝兄嫂栽培：4歲無老母、18歲無老爸，chhiâⁿ養教育tio̍h倚靠兄嫂，ē-tàng活潑快樂大漢，kap囡仔伴做伙讀冊chhit-thô，lóng是大嫂二嫂洗衫補thīⁿ煮三頓，疼心操勞。阿嫂疼細叔，感恩囥心槽。

三、感謝序細無hō͘我操煩：爸母無煩惱，需要序細乖巧體貼，感謝後生查某囝有孝，真少hō͘我操煩，感覺真安慰。

四、感謝政府退休金：「有錢m̄是萬能，無錢萬萬不能。」想起當初囡仔時，家庭散赤，一日三頓tòe人bē得著，kan-nā食穿就kap人bē比phēng。好佳哉讀師範chiah有老師thang做趁月給，娶某生囝建立家庭，猶原tio̍h牽手做衫趁錢tàu-kēng。「人兩跤、錢四跤」，若boeh hak貴重mi̍h件、買厝，lóng tio̍h借錢貸款，到40歲chiah有一間11坪徛家安定過日。經濟仝款是「利不及費」，tio̍h等到囡仔嫁娶成家，chiah開始khah有liōng-siōng錢享受。64歲退休，享受政府退休金，後--來雖bóng減少，生活開銷iáu是無問題，囡仔m̄ bat boeh kā爸母討錢，爸母開銷自然好按算，ē-sái得講退休生活，經濟安穩，感謝政府hō͘ lán安定無憂愁。

五、感謝PE̍H-ŌE-JĪ kap台語文：50歲以後，ē得改變人生觀念、態度，tio̍h感謝Pe̍h-ōe-jī幫贊我寫台語文，寫出心內話、爸母話，tháu放思想，寫濟濟俗語、習俗、器具、工具、人情世事、信仰kap台語文化，重新思考認知，改變看法，改變人生意義。

六、感謝資訊時代：資訊時代來到，boeh擋擋bē tiâu，好佳哉為著寫台語文，50歲就學ē-hiáu拍電腦。應用電腦寫作，快速koh ē-tàng隨時、明仔載、後--日、後個月，甚至隔tńg年重koh修改。「家私若有利，功夫一定在；軟體若好用，台文it-tó͘勇。」M̄-chiah電腦一台換過一台，iPad、iPhone、MacBook Air lóng是買上好高級品，雖bóng開銷bē少錢，得--著--ê是料想bē到ê成果，mā得著真濟快樂。   八、感謝政府ê健保醫療：60歲進前罕得揣醫生食藥，年紀若濟自然衰lám健康有問題，lán ê健保有夠讚，小可病揣診所，少少掛號費，就ē-tàng診療食藥，若是需要大間醫館治療，ke一寡費用就ē-tàng享受現代化醫療設備。親像退休了後，手術開刀幾若擺，視網膜玻璃體切除手術，白內障超音波乳化術，種喙齒、割痔瘡、鑲喙齒……lóng是依賴先進儀器kap醫生護士ê愛心，chiah hō͘ lán ê目睭喙齒正常好用，免受障礙。做一个台灣老歲仔人，確實幸福。現此時COVID-19武漢肺炎新冠病毒ê控制，koh-khah需要感謝醫療現場ê醫生、護理師。

七、感謝少年家：Liâu落去台語文運動，自修教學多數靠網路電腦，學電腦寫台語文chiūⁿ網路，諮詢學習ê對象大部份是少年家。而且看bē少少年人，m̄-nā認真有理想，koh真有涵養，真正是敬佩ê好樣，是心目中ê老師，kap少年家學真濟。   八、感謝牽手：家庭安定需要有好牽手，福氣娶著好家後，牽手m̄-nā gâu hoāⁿ家，koh ē tàu趁錢，體貼thīn我行台文路，明明知影無錢趁，伊mā甘願、m̄ bat稽考。

九、感謝家己：其實上需要感謝家己，家己m̄拍拚，khah濟貴人老師引chhōa mā是無khah-choa̍h，《台文通訊》創辦人鄭良光兄呵咾我「拍死無退」，確實有影。

越頭看〈75歲生日感言〉，一目nih又koh過五年。綜合五年過日重點，跤步放慢，休閒chhit-thô為主要，寫台語文mā是無停睏，網路交陪bē-tàng mài，罕罕參與台文界活動。走病院是因為跤疼、種喙齒、目睭koh-iūⁿ。前個月去注COVID-19武漢肺炎新冠病毒預防射，醫生提醒血壓siuⁿ koân tio̍h食藥；體檢結果，膽固醇siuⁿ koân mā tio̍h食藥。Taⁿ，台灣人ê「三高」已經有「兩高」，走醫館藥局是註定bē走閃。   除了感恩人生，有一項『斜槓』人生mā值得lán家己滿意歡喜。Lán ê『斜槓』人生是多方面ê趣味kap早前有學一寡才藝，hō͘家己享受退休、bē無聊ê趣味心適。親像唱歌、奏樂器、sńg音響、聽音樂、手機、hip相，雖bóng m̄是kài gâu，總--是家己娛樂食老bē無聊。人生是苦，過去lóng是記持，記持回想充滿感恩，感恩人生上súi。

「人生七十古來稀」，iah是人生70 chiah開始？Taⁿ歲頭來到80，感恩一世人，滿意滿足。「天增歲月人增壽」，80年紀寫議量，感恩人生上kài súi，現時生活無憂愁。

未來ǹg望行向「責任已盡，boeh來清淨，所做事工，已無牽礙。」人生活到80足歲，感覺心滿意足，感覺chit世人真有意義，無論歡喜悲傷、付出接受、憂悲惱苦，lóng已經過--去，無koh執訣。鳥隻生囝、飼囝、教囝，盡心盡力，等到鳥仔囝家己ē飛，就無koh關心，放伊自由飛。做人爸母需要學鳥仔，以鳥為師。此去日子有限，翁某盡量減少世事操煩，清淨休閒生活，囝兒序細ê關心mā是漸漸放鬆，ǹg望各人家己拍拚、家己追求幸福，lóng是一家伙仔，tio̍h互相幫助、互相關懷。