北海道旅遊
北海道旅遊 201507
Tì-sú按呢ê原因是12冬前，內外
痔開刀後ê病母，可能是尻川hō͘-sòaⁿ-kéng[括約肌]無力所致，mā有可能心理因素作怪，m̄是秘結m̄是落屎，是tn̄g-tio̍h想boeh放屎時，即時tio̍h-ài走便所，傷慢ē禁bē-
tiâu，屎若是放有清氣，kui工輕鬆無代誌，早起時猶未放屎進前to̍h是m̄敢出門，實在chiâⁿ害。
親像5冬前，kap後生去北京自由行，to̍h一直交代m̄-thang早晡8點進前出門，一定著等待大便（だいべん）清理好勢chiah-thang出門，siáⁿ知回程班機是早起7點，chit聲「害--ā」，ko͘-put-lī-chiong tī前2工下晡開始「禁食」，連紲5頓無食，kan-nā lim水limビ－ル，一直到轉來桃園機場chiah-koh食物件。3冬前koh去日本自由行，轉--來hit早起放屎放無清氣to̍h趕boeh機場，hó-ka-chài有準備紙尿褲，chiah-thang放心，來到機場chiah趕緊去便所，坐飛龍機時mā m̄敢kā尿褲褪--起來，hit種緊張鬱卒心情m̄是好好人ē-tàng了解。
Chit-pái kin-tòe旅行團北海道4暝5工旅遊，1-kó͘月前後生chiah 問講boeh報名參加--bò͘？真正あっさり無經過考慮to̍h應「boeh！」siáⁿ-mih因端ē chiah-nī有勇氣？因為朋友交談中得著兩項解決ê辦法，隨身chah大人用尿褲kap通腸劑。原來大人用尿褲有內褲型--ē，kō͘ lom--e，細領束結bē gāi-gio̍h，ká-ná穿內褲；另外chah 通腸劑，預備出門前iáu-m̄放屎時thang用。
俗語講「好食、好睏、好放屎。」是幸福人一個，若是hò͘ⁿ食、hò͘ⁿ睏、hò͘ⁿ放屎ah tō hiau-hīng，hó-ka-chài kan-nā放屎bē順序--niā-niā，taⁿ已經得著解決方法。
出門行李除了洗蕩衫褲kap平常慣勢醫藥以外，chit-pái 4暝5工特別拴6領尿褲、5粒浣腸，向望ē-tàng順事快樂行程。
4暝5工預定路程：
20150722第一工：桃園→千歲機場→日本第二深湖泊~支芴湖→登別溫泉
20150723第二工：登別溫泉→大沼國定公園~大沼遊船→昆布館→西洋城五稜郭城跡→金森倉庫群~明治館→函館~空中纜車~函館山夜景→湯之川
20150724第三工：湯之川→函館朝市→行經洞爺湖→昭和新山→熊牧場~贈送熊餅乾與可愛棕熊互動→定山溪
20150725第四工：定山溪→哈密瓜無限享用→美瑛之丘~拼布之路~四季彩之丘→富田農場→札幌
20150726第五工：札幌→小樽~小樽羅曼蒂克運河~古典蒸氣鐘物語【北一硝子、銀鐘咖啡、音樂鐘博物館】→千歲空港→桃園
ほっかいどう（北海道）土地是台灣ê 2倍較加，人口chiah台灣ê 4分1，人口密度是台灣ê 9分1，ē使得講人少土地闊，5工行程se̍h boeh半個ほっかいどう。若無參考地圖，hō͘車載leh lōng-lōng-se̍h soah m̄知影chia是tah？hia是toeh？
第一工：桃園→千歲機場→日本第二深湖泊~支芴湖→登別溫泉
透早5:30精神，先泡一杯擂茶lim落腹，sòa-lo̍h洗蕩好勢，做10分鐘體操運動，大約6點外想boeh便所，sūn-sū完成，「張持無蝕本」，kā內褲換做尿褲，穿--起來感覺輕鬆kap一般內褲無koh樣。放心出門來到桃園機場報到，導遊阿岳幫忙發落出關手續，1團28人坐EVAAIR 10:10班機，15:00到日本ちとせ（千歳）機場，通關了後遊覽車已經leh等候，行李搬入遊覽車，開始旅程。
阿岳講：各位鄉親，歡迎來ほっかいどう（北海道）thit-thô，chit 5工坐chit台遊覽車boeh thuh半個北海道，hō͘我阿岳來chhōa路，希望包君滿意。司機先生人pì-sù bē厚話，駛車一流koh負責清氣相，kap伊配合thit-thô定著歡喜kah笑bún-bún；北海道天氣焦燥bē-joa̍h，逐家lim水lim較濟--leh，免驚chhōe便所，路途較遠ē中途ē歇睏hō͘逐家方便，若是tn̄g-tio̍h必要，一定kā阿岳講，m̄-thang驚歹勢；教恁1句日本話「すみません」歹勢ê意思，真好用，boeh過路「すみません」，boeh買物「すみません」，chiah-koh比手話刀代替講話，日本人to̍h真歡喜kā你服務。各位鄉親，逐家來自無仝所在，年歲無仝，khang-khòe無仝，總--是互相尊重是必要，前pang chhōa 1團阿公阿媽團，其中chhap一對新婚翁某，少年人好禮買物送老歲仔，siáⁿ知阿婆soah kā少年人苦勸「m̄-thang chiah-nī討債--lah！」害新婚翁某m̄知boeh按怎應答，kui-ê氣氛害了了。莫非阿岳是leh暗示阮兩個是老kho̍k-kho̍k？（想siuⁿ濟--ā）
ちとせ（千歳）到しこつこ[支笏湖] 2點外鐘，chia-ê山無懸，山路平順，綠色山坪chiâu-chiâu chheⁿ-lèng-lèng，沿途阿岳一直紹介北海道歷史kapしこつこ[支笏湖] ê資料，しこつこ是アイヌ語，支笏湖是一個bē結冰ê汫水湖。
一行28名，頭一站已經來到日本ほっかいどう（北海道）しこつこ[支笏湖]，聽阿岳交代thit-thô景點kap坐車時間，to̍h開始落車行踏錄影翕相，天氣小可烏陰，しこつこ[支笏湖]平靜無波浪，看he湖邊ê溪仔，溪水清凊凊，山崙樹仔ōm-ōm-ōm chheⁿ-chheⁿ-chheⁿ，連路邊野花mā súi-tang-tang，湖邊遊艇等待人客坐船遊賞美景。時間無濟，遊艇mā無人坐，遠遠對面有樽前山、惠庭岳、風不死岳等活火山，m̄-koh目前看在眼內ê感覺是恬靜安定ê美景。
感覺：Chheng-khì sī bí-lē ê lāi-hâm,ū lak-hio̍h bô lah-sap.
歡喜：Ang kiâⁿ bó͘ tòe, khan-chhiú thit-thô lâi-kàu chit.hoaⁿ-hí hoaⁿ-hí.
Ùiしこつこ[支笏湖] 到ぼりべつ（登別市）ê溫泉旅社天氣已經暗，
阿岳交代明仔早起8點出發，早頓6:30 to̍h ē使得家己去飯廳食。8點出發算是無早，心情已經安一半，雄雄想著日本時間比台灣早一點鐘，ah m̄著是早起7點出發？一時有淡薄仔擔心，總--是心頭hōaⁿ-tiāⁿ，按照預定準備，早睏早起to̍h是。
逐家行李捾入房間隨時到飯廳食暗，自助式料理，菜色phang-phài koh鮮，在人kah意，看人客穿和服出現，soah雄雄感覺我敢是日本人？飯後1杯咖啡確實是享受。後生提議先去se̍h街，雨毛仔ná落雨傘ná jia腳步ná徙，無闊ê街路lóng是thit-thô人，挨挨陣陣to̍h是boeh看hit仙閻魔王，m̄知日本人ê閻魔王kap咱台灣ê閻羅王敢有仝一尊？並無引起趣味。Se̍h街順紲買一罐清酒轉旅館享受日本さけ酒味。
身軀洗好換一軀和服，坐tiàmたたみ頂，雙人敬酒，歡喜來到昭和16年（1941）出世ê內地，阮敢是日本皇民？さけ落腹，目睭sa-bui sa-bui，好睏khùn-ka-chōe。
ひらじsin-piⁿうめこ, siang-lâng kāng-chím chò bí-bāng，bāng-kìⁿ lán sī Jit-pún-lâng,eng-àm hô-ho̍kたたみ, khùn-chhéⁿ kè-siok tē-jī kang.
第二工：登別溫泉→大沼國定公園~大沼遊船→昆布館→西洋城五稜郭城跡→金森倉庫群~明治館→函館~空中纜車~函館山夜景→湯之川
透早日本時間5:30精神，仝款先泡一杯家己chah來ê擂茶lim落腹，洗蕩好勢，做幾分鐘柔軟運動，大約6點外想boeh便所，khû一tah久仔好勢好勢，先落樓去飯廳lim一杯咖啡，無koh食早頓，boeh出門進前koh khû一擺便所，確定好勢換穿尿褲，輕鬆上車出發。
上車後，阿岳mài-khuh giâ--起來：「各位鄉親，今仔日thit-thô景點第一站おおぬま（大沼公園），ùi登別旅社到大沼路途chhiâu遠，沿途景緻真súi，m̄-thang睏，無看無彩。おおぬま是一個國家公園，湖內面有百外個浮島，閣有18座橋連結，散步運動有夠讚，不過咱kan-nā ē使得坐船se̍h--一下--niâ。」
沿路景色有影súi，ná聽紹介ná欣賞田庄、山景，人少地闊hō͘人感覺心胸自然開闊，而且日本人守法、規矩、清氣相，對環境ê體貼，實在hō͘人欽佩。沿路田庄風景súi-tang-tang，無he cha̍t-thóng-thóng e̍h-chiⁿ-chiⁿ紅毛土樓仔厝，窗外景緻siâⁿ人目，siâⁿ人相機chhi̍h無停，留一寡影像做回想。
看著路邊湖水，知影大沼已經到位，落車行向湖邊坐船，ná行阿岳ná介紹出名好食物，芋仔冰、iù-jī nńg-khiū鰇魚烘，先試食，回頭chiah來交關。遊客無濟，一隻船仔載阮28個人客to̍h起行，無風無湧真平順，幾個囡仔kap我仝款有位m̄坐無時閒，一時仔tī船艙，一時仔tiàm甲板，囡仔為著好sńg，老歲仔為著sńg翕相，留tī目睭內、相機內lóng是記智，真súi真súi ê記智，因為阮是一行有十名，後生、新婦、查某囝、囝婿，阿公阿媽kap古錐ê孫。
船坐了後，行入公園內，tī chia散步實在bē-bái，看he遠遠火山tī對面，水中浮出1-chhop 1-chhop青翠樹林，水面平波波，thit-thôê人tī彎弓橋彎弓橋頂leh心適，笑聲手機仔聲交響現代文明歡樂聲。
斡轉飯店食晝，北海道出名石狩鍋（いしかりなべ），鮭魚さしみ，みそしる（味噌湯），作料鮮湯頭讚，食著真kah味，料理店對台灣來ê人客特別插雙方國旗表示歡喜。
食飽起程，來到ごりょうかく（五稜郭），五稜郭是一座要塞城，chit-mái是五稜郭公園，起造形體親像楊桃切斷ê 5-liàm星形，內面有千外欉櫻花，chiâⁿ做北海道看櫻花上媠ê所在，閣有一座五稜郭塔，peh懸ē-tàng看著全景，可惜chit-má m̄是櫻花期。行過護城河橋，先去箱館奉行所，是柴造建築，chiâⁿ媠，樹木懸大青翠，環境恬靜清幽，大人翕相囡仔sńg kah phut-phut-tiô，koh行行到藤棚kap老欉櫻花樹欉，滾lún chūn滾ê枝骨，蛀孔皺痕ê樹頭，ná像老khok-khok老人tī-leh講古，講古早古早北海道五稜郭ê歷史。繼續來到武田斐三郎先生顯彰碑，聽講摸伊ê頭殼ē增加智慧，m̄-chiah武田斐三郎先生ê面模hō͘人摸kah金鑠鑠。
上車繼續走，落車繼續行，無行m̄知影猶有真濟所在m̄-bat名，阿岳chhōa阮來到chit塊叫做金森倉庫群ê所在，連紲幾若棟紅磚仔角起ê建築物，是古早明治時代大船入港入貨出貨ê倉庫，看厝間大細to̍h知影過去港口是偌ka-ia̍h。現在改變用途，規劃做生理場，百貨、雜貨、食、穿、thit-thô物應有盡有，在你消費。se̍h來se̍h去se̍h點外鐘，參觀to̍h好，買物有較費氣，加減翕相記念要緊。Ùi金森倉庫群向東看，對面hit支山to̍h是函館山，盈暗boeh去hia看夜景。
為著盈暗boeh去函館山看夜景，冗早來到湯川溫泉旅社食暗，先安搭房間囥好行李，隨時到餐廳食飯，日本人食ê文化hō͘阮這庄腳囡仔出身ê老歲仔人感覺chiâⁿ ku-sui，大嘴pe大嘴食是阮ê慣勢，日本人食一頓飯koh-tio̍h全禮數、全規矩，實在mô͘-nó͘-sâi，hó-ka-chài chit頓飯叫做「會席料理かいせきりょり」，規矩無hiah-nī嚴肅，in ê排場是照規矩，咱boeh按怎食是咱ê代誌，各人份ê菜色，規桌排kah滿滿是，有魚有肉有さしみ，有熟有生有烘在人kah意，閣有一隻毛蟹著用鉸刀處理。雙腳屈leh食咱是無問題，koán-thāi-i tó一項食物著先用箸，各人夾各人食，さしみùnわさび，閣來試in日本ê鹹tôa-á順紲limみそしる（味噌湯），hit隻毛蟹真siâⁿ人，提tī手裏at看覓，輕輕鬆鬆，ná著鉸刀khoaⁿ-khoaⁿ-á giat？無外久，chhńg了了，留落蟹殼一大堆，爽快兩字m̄免加話相添。猶閣有，孫--e食bē去，掃掃hō͘阿公阿媽處理，食soah腹tó͘飽tong-tong，實在好料理，o-ló kah tak舌。
會席料理食soah，上車趕boeh 7點前到函館山頂，阿岳做前thiah票，人真濟，ch-hān-ch-hān-hiúⁿ、e-e-tīn-tīn lóng是boeh坐流籠上山看夜景，流籠起行，peh愈koân雺愈厚，到kah山頂，人聲ki-ki-kia̍p-kia̍p，電火光iāⁿ-iāⁿ，看山腳soah pìⁿ-chiâⁿ茫茫渺渺lóng是雺霧，pe-chiūⁿ上尾樓，雖罔m̄是伸手不見ngó͘-cháiⁿ，雺霧中soah看bē清2丈外人ê面容，chiâⁿ-si̍t失望koh失望。紲--落去，雺煙雨仔sap-sap-á落，有人giâ雨傘，有人穿雨幔，雺霧中無奈交談，雺霧中無奈等ā等，等boeh雺霧ē散開，等boeh看山腳夜景有偌súi，卻是無he『心想事成』ê功效，阿岳約定時間tit-boeh到，ko͘-put-lī-saⁿ-chiong逐家相chhōa落樓腳集合。
突然間「看著--à！看著--à！」有人hán喝，看he窗仔門外已經無khoàiⁿ雺霧，mā無雨sap-á，趕緊kā牽--e 手牽--leh，重閣peh上二樓、三樓，ŏa！人kheh人，手機仔光影1跡1跡，閃光sih--leh sih--leh，看山腳mā gia̍p-gia̍p-si̍h，敢是河溪天星跋落凡塵，抑是日頭光chhiō著蜘蛛絲凍著露水，莫怪函館夜景hông o-ló是「百萬夜景」，都市夜燈港口燈火造chiâⁿ浪漫美景。
「千算萬算，m̄值tú-tn̄g。」幸運tn̄g-tio̍h雺霧閣看著夜景，滿滿ê幸福tī歡頭喜面話語中離開，盈暗定著有好夢。
轉來到湯川溫泉旅社已經9點外，人是bē-thiám，m̄-koh明仔載到定山溪ê路途遙遠有較遠，所以tiàm房間浴室洗蕩，to̍h準備安眠。
體會：tha̍k-chheh thak-liáu nā-sī ū-kàu-chē, su-iàu kok gōa bóng-se̍h, cheng-ka sī-iá, chiah-bē chò àng-té-chúi-ke.
感想：chia̍h-lāu ē-tàng khan-chhiú se̍h gōa kok, sī hēng-hok. kám-siā thiⁿ-tē.
第三工：湯之川→函館朝市→行經洞爺湖→昭和新山→熊牧場~贈送熊餅乾與可愛棕熊互動→定山溪
仝款5:30精神，仝款泡一杯擂茶lim，仝款洗蕩、運動，仝款khû便所，仝款去飯廳lim一杯咖啡，確定好勢換穿尿褲，輕鬆上車出發。
出發時有人發覺家己ê行李囥m̄著位，已經hō͘別台車載去，阿岳了解原因，隨時電話連絡，一聲OK！放心起程。
代先來函館早市參觀消費，車到停車場，載走行李ê車mā tī chia，原來是按呢--ò͘，行李OK，行向函館朝市，ùi chia已經看出阿岳能力，台語ku̍t-liu，華語ē通，日語gâu講，m̄是普通ê厲害。
函館朝市：
函館早市是現代化建築市場，清氣衛生，行入內面，海產滿滿是，逐隻chhiⁿ-chhioh chhiⁿ-chhioh，有魚、蝦、蟹、鰇魚應有盡有，果子菜蔬有夠鮮koh幼字好食款，蘋果、網仔瓜、水蜜桃kap無籽葡萄。上hō͘咱o-ló--è是排疊整齊，擔仔位thô͘腳清氣tang-tang，招呼人客禮貌十足，有一擔釣鰇魚，現釣現刣現處理，生食ùnわさび，好sńg是好sńg，kō͘尖鉤仔鉤有較無合現代愛護動物ê要求。看著he 1碗1碗pho͘鮭魚卵ê丼物（どんぶりもの），chhùi-nōa水giōng-boeh tin--落來，驚做食了礙著腹肚，只好kan-taⁿ giàn-sian-ko。後生買1葩無籽葡萄食看māi，芳甜iù-jī無籽規粒哺，規世人m̄-bat食過chiah-nī好食ê葡萄。坐車進前peh上停tī海墘ê古早連絡船，阿岳講自動車ē使得駛入去れんらくせん船艙內面。
參觀函館朝市了後，繼續前往昭和新山（しょうわしんざん），沿内浦湾（うちうらわん）一直se̍h，遠遠ē看著有珠山（うすざん）壯觀形威，是一座活火山，山頂猶leh bok白煙。chit chōa路駛不止仔久，ùi内浦湾南爿駛到北爿，路邊樹仔無懸，有時koh-ē出現藍色海洋，以有珠山為背景，景色chiâⁿ媠，看bē-siān。沿内浦湾（うちうらわん）一直se̍h。
來到昭和新山（しょうわしんざん）已經晝，治iau要緊，佇這間飯店食三丼日本料理，有火鍋，有さしみ，mā有米飯，to̍h是合味，滿意。食飽小歇睏，店外口行行--leh，chia是庄腳所在，電火柱仔掛電桶牽電線，飛來兩隻烏鴉（o͘-a），規隻烏sô-sô ê o͘-ah-á tī北海道不sám時看ē著，並無歹吉兆ê意思。
上車無5分鐘to̍h到昭和新山（しょうわしんざん）是一粒活火山，tī 1943年12月到1945年9月期間噴發chò-chiâⁿ ê火山，火紅山尖有時koh-ē噴煙。前面有草埔，囡仔上歡喜，日頭chiâⁿ猛，戴帽仔翕相有烏影，團員tī-chia翕1張團體相做記念。
上車無5分鐘to̍h到熊牧場，看he棕熊hông關tiàm紅毛土窟仔內，實在無siáⁿ-mih心適，行行看看--leh準tú-soah。
參觀熊牧場soah，上車後阿岳講：「各位鄉親，pún-chiâⁿ今仔日行程到遮soah，因為時間猶閣早，咱to̍h ùi洞爺湖ê南爿chhōa逐家來去西北爿サイロ展望台看光景，chit所在較少人踏腳到，景緻chiâⁿ媠。沿路斟酌看路邊正爿，to̍h是洞爺湖，咱boeh ùi南爿se̍h到西北爿，m̄-thang失去欣賞ê機會。」
今仔日se̍h兩擺半圓形ê路程，一擺是頂晡沿内浦湾（うちうらわん）se̍h到昭和新山，下晡boeh ùi昭和新山se̍h洞爺湖到サイロ展望台。
とうやこ[洞爺湖]是アイヌ語，是一個火山湖，中央有4-kâi島叫做中島，生活tī chia ê生物因為hō͘水隔開，自然形成kap人無仝ê特色。
公路沿とうやこ（洞爺湖）se̍h，藍色ê天，白白ê雲，深藍色ê湖水，深綠色ê樹木，mā有淺綠色草埔，柔性色水，とうやこto̍h是chiah-nī溫柔美麗。
來到とうやこ（洞爺湖）サイロ展望台，落車看詳細，遠遠對面hit爿有山做背景，火紅山尖敢是昭和新山（しょうわしんざん）？hit粒上懸--ē敢是有珠山（うすざん）？中央ê小島確定是中島，藍色天頂影入湖變深藍色，闊莽莽êとうやこ湖邊有綠色ê山，綠色ê樹林，藍色綠色共一體，とうやこhō͘人ê感覺是hiah-nī平和柔軟，看久bē-siān。
囡仔sńg bē-soah，大人翕相翕bē-soah。
突然間聽著直昇機飛起êプロペラ（螺旋槳）聲，原來是載人客飛上天欣賞とうやこ（洞爺湖）1-liàn。
離開サイロ展望台來到歇暗ê旅館，房間安搭好勢，先去附近定山溪溫泉公園散步，看人tī溝仔內leh浸腳，原來是溫泉，趕緊鞋仔褪--落來開始浸，燒絡燒絡，小可寒意liâm-mi消失。
飯店暗頓款kah chiâⁿ phang-phài，有日本料理mā有西洋式，自助料理隨人kah意，boeh-ài siáⁿ-mih家己揀。來日本當然是食飽koh食khá，さしみ配日本さけ第一優先，閣來てんぷら，日本ê chìⁿ料khah-bē油，糋蝦仔特別好食，燒酒落喉koh-lâi一杯烏咖啡，飽koh醉，醉tī thit-thô了歡喜，心情滿意。Eng-àm睏phòng床。
感想：
Gōa-kok iû-lám tē-thâu so͘, bô-khòaⁿ tē-tô͘ m̄-chai lō͘, cháu-tang óng-sai koh oan-oat, chi̍t-sî thâu-khak piàn hô͘-tô͘.
Lo̍h-chhia tio̍h-ài tòe hō͘ tiâu,tòe bô tio̍h-tīn hāi-liáu-liáu, ōe-gí chhiú-ki lóng bē-thong, boeh-hoeh kiù-miā kiaⁿ kiàn-siàu.
第四工：定山溪→富良野（ふらの）→美瑛（びえい）之丘~拼布之路~四季彩之丘→富田農場→札幌
早起7點外tī定山溪萬世閣溫泉大飯店ê員工歡送中出發，目的地是さっぽろっ（札幌）東北爿ê富良野（ふらの）kap美瑛（びえい）看花田。因為路途遙遠超過2點鐘車程，中途tiàm砂川歇睏，北海道ê公路無闊，停車場好pha車，主要是地闊人少車mā無濟，庄腳所在來來去去ê車koh-khah少，m̄-koh車路保養bē-bái，坐佇車內感覺ē出--來。砂川歇睏站有花園，樹欉花蕊chiâⁿ-súi，塗腳to̍h是清氣liu-liu無垃圾仔（lah-sap-á）。
12點前來到富良野（ふらの），需要先食晝，to̍h-tī餐廳食富良野風味餐，掛柴柄ê鉎仔平底鼎，造型chiâⁿ特別，作料真鮮有魚有肉有青菜，lām-lām做一下烘煮，簡單ē飽，食飽閣有冰淇淋、網仔瓜hō͘你食免驚食kah飽，看he網仔瓜kap咱台灣仝款，食--起來，ó͘！特別芳甜，ná-ē chiah-nī好食，1周食了koh 1周，連紲食4周，夠本--à，m̄-thang貪心，驚做胃腸各樣，貴蔘蔘ê網仔瓜，轉來台灣to̍h食bē著，無彩！
餐廳面前ê風景已經真迷人，食飽散步行行--leh順紲翕相，了後行入花田，ŏa！súi--è tī chia！闊莽莽lóng是花，chiah-nī大遍chiah-nī大坵，1坵1坵lóng是花，有紅有白，有黃有紫，真正十花五色，hō͘你目睭看kah起煙暈，人是chhān-chhān-hiúⁿ，參觀--e比種作--è較濟，特別--è是chia是山崙仔地，懸低精差無濟，視線看真遠，背景是懸拄天ê山嶺，天清清，khóng-sik貼白色雲尪，有夠鮮chhioh活kioh，真想boeh起腳走，大聲喝，讚歎這天造人設ê奇景。
富良野（ふらの）tī北海道中部丘陵（khiu-lîng）地區，四箍輾轉是山，清幽曠闊，在地人除了種牧草飼和牛以外，koh-tī phòng--一下naih--一下ê山崙種真濟花草，提煉精油芳料發展經濟，而且栽培五花十色各種花卉chiâⁿ做1坵1坵ê花田，siâⁿ真濟外國遊客來thit-thô觀賞消費，增加收入。
富良野（ふらの）看了koh去美瑛（びえい），1坵1坵無仝色水ê花草，chiah大遍chiah大遍種tī起起落落1-bong 1-bong ê低山崙，大地是生成ê，花田是人工，人ê智慧配合天然環境，遠遠ê山脈，懸懸ê藍天白雲，近看是1領1領柔軟地毯，看遠親像畫，無親目看m̄知影伊ê súi是súi kah親像1幅大幅畫，閣再一擺讚嘆！
Sòa-lo̍h-khì來到免稅商店買物，這是出國旅行慣例，出國買物koh ē-tàng紮轉去台灣，逐家買kah chiâⁿ歡喜，後生買2罐「痛寶精」叫阮兩老--ē試看māi，講ē-tàng保養雙腳骨節。
買kah歡喜to̍h直接來到eng-àm歇暝ê旅館。
暗頓食燒烤+蟹+飲料：
Eng-àm chit頓chiâⁿ chheⁿ-chhau，菜色chiâⁿ-chē，肉類、蝦、蟹、菇，青菜、果子，據在你kah意，有熟有生，ē使得烘熟ē使得烘燒，koh-ū上kah意êさしみ、さけ，lim hō͘小可茫茫，因為阿岳講明仔早起預定慢一點鐘出發。
暗時se̍hさっぽろっ（札幌）街路：
時間猶閣早，後生chhōa路去se̍h街，ùi札幌大通公園se̍h到車頭chiah-koh轉來旅館，路--裡人無濟，車mā少，比大阪（おおさか）京都（きょうと）較無鬧熱。
感想：
Tē khuah lâng chió hó-khiā-khí, thiⁿ ch-hing chháu le̍k khong-khì chhiⁿ, chū-jiân chu-guân ū keng-êng, chiah-ū chit-khoán ê bí-kéng. Hoat-tī siā-hōe lâng chun-siú,
北海道：第五工、札幌→小樽~小樽羅曼蒂克運河~古典蒸氣鐘物語【北一硝子、銀鐘咖啡、音樂鐘博物館】→千歲空港→桃園
Cha-hng（昨昏）行程拖傷久，さっぽろっ（札幌）街路景點看無著，to̍h利用下早起程坐車se̍h一下仔，雖罔阿岳有紹介，無落去參觀總--是較無彩，車駛無緊，沿路看著1881年明治時代ê時鐘台（塔），到今猶閣ē振動，真正是日本國寶，猶有1888年落成ê北海道廳舊紅磚廳舍kap警察署，電視塔，然後chiah去小樽（おたる）。
小樽（おたる）是觀光城市，除了有古早運河kap倉庫，koh真濟古早「新巴洛克建築」，秀面chiâⁿ-súi chiâⁿ特別，kap咱Toā-ba̍k-kàng（台南縣新化）舊街ê巴洛克建築無仝，各有特色，不過人維護了較有氣質較原味清氣。
Kui條街路ê「新巴洛克建築」，lóng改落去做生理場，商店、餐廳、咖啡廳kap賣玻璃藝品，chia ê玻璃工藝chiaⁿ發達，in kā玻璃講做硝子（グラス）。
Tī小樽音樂盒堂本館門口有一座歐洲式ê音樂鐘，是水煙式（蒸汽式），定時ē吼出像五分仔車母ê水螺聲（汽笛聲）。阮入去內面參觀，mā有交關囡仔kah意ê音樂盒。有一間咖啡廳推銷lim咖啡送有hello kitty ê咖啡甌仔，兩老--ē to̍h趁lim清芳ê咖啡，一甌無夠氣koh-chài sòa杯lim一甌。
Se̍h是se̍h bē完，看mā看bē了，時間有限chiah兩點鐘久，to̍h集合起程，直接到4日前飛來日本北海道ê機場千歲空港。半路tn̄g-tio̍h日本航空自衛隊飛行表演，小可管制，逐家看kah chiâⁿ趣味心適，chhèng-koân、分裂、吐白煙、倒頭栽、相閃身chit款刺激危險ê飛行，較早做兵to̍h bat看過飛虎隊表演，實在技術絕等。
利用等飛龍機ê時間，四界lau-lau--leh，食一下子點心，翕一個相，然後登機phŭ--一下to̍h轉來到桃園機場，結束4暝5工Thit-thô北海道ê旅途，thit-thô kah chiâⁿ順序，chiâⁿ歡喜，chiâⁿ滿意。
感謝kap感想：
退休後，m̄管是朋友抑是後生，若boeh相招參加旅行團出國thit-thô，lóng是畏畏搖頭無興趣，chit一擺確實是例外，後生講boeh 4暝5工thit-thô北海道，隨時一聲ok，hām牽--e mā驚chi̍t-tiô感覺真意外。
5工來，逐工平順旅程，歡喜坐車、行路、食、睏、看光景，其實心內猶是有淡薄仔壓力，無hiah自在，隨時都leh斟酌身軀ê狀況，是hó-ka-chài⋯
1、有序細陪伴，kan-nā負責thit-thô to̍h好，kap孫--e仝款，ē-hiáu--è家己來，bē-hiáu--è叫大人去做，m̄-chiah chit擺出門攏無開kah半sián錢。序細真貼心，了解阮ê老骨頭iáu-ē堪得，放阮真自由，mā-koh真體貼，需要ê時陣定著主動關心。
2、行程動線有照步來，siáⁿ-mih時間上車、siáⁿ-mih時陣到siáⁿ-mih所在，導遊阿岳chhōa路，配合うんちゃん先生ê敬業專業服務，chiah-hō͘旅途無拖沙，無耽誤、無困擾、無緊張。阿岳日語、台語、華語lóng ē講，景點紹介深入詳細閣有淡薄仔詼諧，有修養bē製造無爽快，逐家o-ló伊是真正讚ê導遊。
3、有好ê導遊、司機，mā著有好人客配合，雖罔逐家顧thit-thô互相較無交陪，總--是親像阿岳講--è「互相尊重，遵守時間」攏做有夠。
4、感謝家己有勇氣，願意突破pì-sù畏見笑個性，kā畏出國無奈心思講hō͘朋友知，m̄-chiah ē得著thang解決ê方法。講一個閉思個性hō͘你知，10幾冬前kap一位朋友仝日做痔瘡手術，幾kó͘月後朋友講伊手術真成功，koh幾若kó͘月後，又閣tn̄g-tio̍h伊，仝款是o-ló kah觸舌，大概是1年外後koh tn̄g-tio̍h，仝款講kah嘴笑目笑，講hit個醫生確實高明，soah hō͘我giâu疑我ê主治醫生是m̄是較han-bān？人伊hiah-nī順序，我ná-ē chiah-nī費氣？to̍h開嘴問伊：「敢bē無張無持想boeh放屎，著趕緊走便所？」
「Ā-chē bē--ē，咱出外做生理，定定mā leh kā人借便所。」
原來朋友比我較食力，人伊ná-ē chiah-nī輕鬆過日？這to̍h是pì-sù人ê無奈。
5、罕罕出國無幾擺，kā thit-thô過程用台語文記錄落來，一--來ē-tàng回想當做koh-ch-ài thit-thô一擺；二--來ē-tàng增加台語文書寫遊記ê記載，畢竟用台語文書寫ê遊記實在無濟。
6、有人o-ló講thit-thô有做功課，chiah ē-tàng寫kah chiah詳細，事實上thit-thô是真認真，目睭是金金看，耳孔是斟酌聽，轉--來chiah-koh詳細Google chhōe地圖，Google景點ê一寡史實，kā需要ê景點地名行程表先輸入電腦輸入法ê「自訂詞庫」，需要to̍h隨拍隨有thang用，hō͘人kioh是咱jŏa-nī gâu--leh，koh iā bat he日本字，電腦ê厲害tī chia。因為這是暫時性ê詞庫，所以攏用「pht」做
指令，to̍h-ē出現下面chia ê詞庫：
pht 1桃園→千歲機場→日本第二深湖泊~支芴湖→登別溫泉
pht 2登別溫泉→大沼國定公園~大沼遊船→昆布館→西洋城五稜郭城跡→金森倉庫群~明治館→函館~空中纜車~函館山夜景→湯之川
pht 3湯之川→函館朝市→行經洞爺湖→昭和新山→熊牧場~贈送熊餅乾與可愛棕熊互動→定山溪
pht 4定山溪→哈密瓜無限享用→美瑛之丘~拼布之路~四季彩之丘→富田農場→札幌
pht 5札幌→小樽~小樽羅曼蒂克運河~古典蒸氣鐘物語【北一硝子、銀鐘咖啡、音樂鐘博物館】→千歲空港→桃園
phtt さっぽろっ（札幌） phtt ほっかいどう（北海道）
phtt ちとせ（千歳）
phtt ぼりべつ（登別市）
phtt しこつこ（支笏湖）
phtt とうやこ（洞爺湖）
phtt ごりょうかく（五稜郭）
phtt 函館（はこだて）
phtt 富良野（ふらの）
phtt 美瑛（びえい）
phtt 小樽（おたる）
phtt アイヌ語
留言
張貼留言