日本大阪京都旅遊

 日本大阪京都旅遊        Lahjih 201001

A-Jih叔boeh出國：

「A-Jih叔！聽講你boeh出國thit-thô--hio͘h？」

無--lah，猶未決定--leh，Tiat--è安排boeh chhoā我kap A-Jih嬸去日本大阪，我tō猶leh m̄敢決定。

「Ná-ē m̄敢決定，Tiat--è有孝，撥工chhoā恁thit-thô，好--lah！kap in去--lah！」

好是好--lah，m̄-koh……

「抑是m̄-koh啥--lah？驚開錢？抑是驚坐飛龍機？」

M̄-sī驚開錢，mā m̄是驚坐飛龍機，攏是10年前痔瘡手術留落來ê病母，到taⁿ猶是感覺出門bē自在，10幾冬來見擺若boeh出門去遠路，lòng tio̍h等屎放清氣chiah敢出門，偌費氣--leh你敢知？

「無要緊--lah，chit-má風景區設備真方便，便所起kah真清氣真方便。」

猶是mài較著，屎若緊，chhoē無便所，若漏氣m̄-tio̍h見笑死--ì！

「A-Jih叔！按呢我教你兩步方法，第一步，去張醫師診所提黃色止落屎ê藥丸á，第二步，chah大人用ê尿chū-á，按呢tiō萬無一失--à。」

穿尿chū-á kám-bē gāi-gio̍h gāi-gio̍h，真歹看？

「A-Jih叔！你tiō是chiah-nī pì-sù。bē--lah！chit-má是寒--人，穿tī內底無啥物歹看--lah，當然會小可無方便。」

Hò͘！按呢koh有thong--ō͘！tiō聽你ê話，自按呢決定，準備kap A-Jih嬸來去日本thit-thô。

 

老人thit-thô：

少年thit-thô真快樂，老人出門tiō煩惱，放屎放尿無方便，boeh趕時間toè bē著。

第一工：20100131

Tiat--è了解in pâ ê鬱卒，tiau-kang訂下晡ê班機，12點半ùi竹北出發，點半tiō到桃園機場，boeh坐下晡3點半國泰班機。早起8點前khû便所tō非常順序，心情chiâⁿ輕鬆，中晝頓tī機場食，m̄敢食siuⁿ飽，一塊麵包一杯咖啡落腹，tō精神十足。Tiat--è kap A-Jû無閒出關手續，我kap牽手、第三查某囝照顧2個查某孫，有講有笑，2個孫歡喜kah chhiak-chhiak-tiô。

出關坐入機艙，Tiat--è kā窗á門邊座位hō͘阮兩老--ê坐，4點kha-tau，飛機起飛，真緊tiō插入雲頂，天氣清爽，日頭光iāⁿ-iāⁿ，看he天頂雲海，闊bóng-bóng實在有影súi，相機提出來翕幾若張，歡喜心情細聲kap牽--ê分享。突然間Má-lêng-chî驚kah mah-mah-háu，kā in母--à mo͘h-tiâu-tiâu，小可亂流hō͘飛機小可跳動，ná像地動，有影hō͘人淡薄á驚驚，好佳哉liâm-piⁿ tō過，Má-lêng-chî隨恢復平靜。

時間1分1分過，飛機頂ê影片無kah味，音樂聽久會siān，tō看螢幕頂飛機飛行ê數據：台北到大阪約2點鐘，預定大阪時間19:00到位，時差1點鐘；飛行距離1750公里；飛行高度上koân 11500公尺；高空溫度零下50℃。O͘h！科技ê厲害，人ê智能實在不可思議，hō͘人想bē到，飛tī新高山ê三倍高，莫怪有人m̄敢坐飛龍機。

大阪時間暗時7點10分到關西機場，出關了後，Tiat--è真老練chhoā阮去坐basuh，basuh司機真有禮貌用kí-cháiⁿ 1個1個點，5個大人2個囡á，吩咐tio̍h買5張全票2張囡á票，負責托運ê工作人員chiah kā 4-kha大旅行箱安搭好勢，腳手熟練，禮貌客氣，hō͘人感心。暗靜ê夜車，外面只chhun燈光kap來往車影，無goā久街路夜景出現，Tiat--è講UMETA（梅田）tit-boeh到，落車後拖4-kha行李牽2個囡á開始chhoē旅社，A-Jû講咱boeh toà ê大阪第一旅社是chia ê地標，真好chhoē，無疑誤行boeh半點鐘koh著問--人chiah chhoē--tio̍h，原來chit箍圍á已經加真濟間摩天大樓，kā第一旅社cha̍h去。

 

旅館房間清氣普通á闊，Tiat--è in 4個toà 1間，阮3個人toà 1間，外面寒sih-sih，內面卻是燒hōm-hōm，8點goă外，2個囡á hoah腹肚iau，Tiat--è翁某趕緊落樓去買食--ê，阿媽kap孫--ê開講順紲熟似房間，掀開窗簾（thang-nî），Umata街路冷冷清清，無幾台車mā無偌濟人，才9點--niâ，ná-ē chiah-ní稀微？

暗頓簡單tī房間食飽，Tiat--è chhoā囡á轉去房間洗身軀，我mā準備洗盪thang歇睏，siuⁿ-oàⁿ睏tiō oàⁿ起床，ē影響明á早起khû便所ê時間，nǹg入去被內soah感覺siuⁿ燒睏bē去，kā燒氣調節較低淡薄--à tiō隨時睏ka-choē。

坐飛龍機：

飛機飛機飛koân-koân，高空飛行足安全，飛來飛去真方便，世界變做地球村。

第二工：20100201

昨暗好睏一醒到天光，早起6點半tiō精神，雖罔時差緊1點鐘，仝款配合chia ê日頭行踏。先做體操10分鐘，骨節拗拗choāiⁿ-choāiⁿ--leh，chiah去洗面洗嘴，khû便所，一切順序，注定今á日好thit-thô。猶有，hit粒止落屎ê藥丸á kā吞落去，tiō萬無一失。

8點10分，Tiat--è來到房間講「爸！媽！Sió-gio̍k-á人無爽快neh，講伊腹肚脹脹boeh吐boeh吐，是m̄是飛龍機頂ê飯包好食食siuⁿ飽，chit-má leh bē消化？」

「昨昏ê飯包，Sió-gio̍k-á家己1人食1份，昨暗ê點心mā食bē少，有可能是食了chek--tio̍h，敢免chhoā去hō͘醫生看？」牽--ê m̄甘--ni-ni。

「媽！免緊張，可能是輪狀病毒感染，kap兩年前發生--ê仝款，醫生講mài食物件，一直到bē吐為止，chit擺ê症狀無頂擺hiah嚴重，hō͘伊歇睏tiō好。」ná-ē chiah tú好，只好tiàm旅館等待，koh掀開窗簾，Umata街路仝款冷冷清清，無幾台車mā無偌濟人，已經10點外，ná-ē chiah-ní稀微？中晝食飽，Tiat--è決定hō͘ A-Jû陪Sió-gio̍k-á tiàm旅館歇睏，伊boeh chhoā阮去附近行行se̍h-se̍h--leh。

自動門開，踏出門外，aih-iŏ！ná-ē chiah-ní冷，好佳哉，chhiú-lok-á、phoa̍h-kin lóng有chah，閣穿羽毛衫，chiah-bē gī-gī-chun，突然間聽著chiú！chiú！chiú chiú chiú；chiú！chiú！chiú chiú chiú ê鳥á聲，原來是十字路口青燈已經leh sih，鳥á聲提醒hō͘過路人注意，對目睭有koh樣ê青盲人、色盲者實在有夠貼心。

行過十字路，先去阪神百貨店，室內清氣、排疊整齊，店員畫妝kap十花五色ê百貨仝款súi，台北、高雄tiō看ē-tio̍h，所以真緊se̍h一liàn了後，Tiat--è講咱來去se̍h地下街，聽講大阪車頭附近tiō親像迷宮，tiō toè hō͘ tiâu。

Oă！原來是án-ni--ò͘，莫怪地面街路hō͘人感覺稀微，原來大阪ê食、穿、交通lóng tī chia，bē寒bē熱，光iāⁿ-iāⁿ ná日頭光照落ê地面，kap外口完全仝款，差一屑仔tiō bē記得chia是地下街，來來去去人真濟，行著路ná像leh趕時間…

奇怪？行著路ná-ē chiah gāi-gio̍h！

「爸！tio̍h行倒爿，日本是行倒爿--ê ō͘！」

O͘h！是按呢ò͘，tăⁿ來，實在bē慣勢。

繼續行，繼續看，ná像田庄兄哥去台北，目睭仁轉來koh se̍h去，人是hiah-nī濟，有ê行過來，有ê行過去，查埔--ê大衣se-bí-loh，少年囡á鬍鬚--ê真濟，不過剾kah真整齊真清氣相。查某囝á súi koh抹粉點胭脂，目睭khong青sûn，目睫毛chhap-chhap-nih，皮膚幼mī-mī，hō͘人看著會kah意。行到地下鐵，拍票所在幾若位，改札門á幾若個，boeh坐去tah，仙看mā看bē詳細，m̄-bat日本字koh bē-hiáu講日本話，雄雄想起「我soah pìⁿ啞口--ê一個！？」，好佳哉是toè囝來，若無tiō淒慘代。

Tiat--è講「腳會酸--bò͘？咱來去食飯。爸！你愛食日本料理，咱tiō來去hit間上有名ê料理店食。」

來到一間叫做「築地玉寿司」ê料理店，內面人客客滿，門外有排幾隻椅頭á hō͘聽候ê人客坐，等boeh半點鐘，店頭家chiah安排兩塊桌位hō͘阮點菜。講著食日本料理，特別是さしみkapすし，我是phah死無走--ê，交代點菜時chit 2項著m̄-thang làu-kau去，魚卵すし、蝦肉すし、旗魚、o͘-àng-chhǹg lóng真chhiⁿ，kap台灣高級日本料理店差無真濟，hō͘我特別kah意--ê是hit phiat-á わさび，氣味kap阿里山種--ê仝款，不過人in磨了較幼jī，mĭ-mî，落喙哺2下著自然感覺わさびtèng-tèng芳芳ê滋味，きもちspring giang，liân-soà食2塊，Tiat--è問講：「好食--bò͘？」

我講：「總--是àn--neh！bē-bái--lah！」

「爸！he真貴--neh！」

「Lín爸m̄驚貴，伊若kah意，較貴--ê伊mā開--落去！」

「Ah tō來到日本--à，經驗看māi，tī厝--裡無影hiah甘開--lah！」

「媽！爸講了有理，se̍h街ê時，若有看著kah意--ê著kā我講，咱chiah來買。」

「好--lah！好--lah！」牽--ê是儉底--ê，m̄-kò伊是儉家己，bē khe-khó我開錢。

食飽去坐火車，講boeh去道頓堀se̍h-se̍h--leh，落車行到街路，soà leh落毛毛á雨，道頓堀商店街頂懸有khàm厝頂，bē ak雨，穩心á散步無要緊。Ná行ná看，街路無闊，雙爿店面整齊清氣相，商品排疊好看頭bē亂使hē，se̍h街ê人挨挨陣陣，ná像se̍h夜市，外國人bē少，阮是參觀--ê較濟，交關--ê khah少，se̍h到盡磅chiah-koh去se̍h心齋橋，情形差無外濟。se̍h kah腳骨淡薄á酸，看人leh賣thá-khò͘烘燒丸á（章魚燒），tiō chhoē he有人排列ê hit間入去食，狹chiⁿ-chiⁿ 3坪樓頂，boeh坐20外個人客，大都市ê生活有影hō͘人感覺khah-bē自在。thá-khò͘烘燒丸á料理過程衛生koh厚工，口味比台灣夜市á--ê較好食，可惜哺起來有小可爛lop爛lop，看Tiat--è算錢hō͘頭家，ò͘！無俗tō-tio̍h。

8點外轉來到UMETA地下街，chhoē 1間飯店食暗頓，看查某囝食卵包飯ká-ná真好食款，規盤kiat了了，我點--ê是咖哩豬肉飯，mā bē-bái食，只是日本人ê khiàn-phang氣味小可bē kah意。Thit-thô boeh kui工，A-Jû kap Sió-gio̍k-á tī旅館一定真無聊，買一寡點心hō͘ in食，mā買2杯日本清酒hō͘家己teh giàn-thâu，日本清酒bē-bái lim，盈暗lim八海山，kap牽--ê做伙lim 1杯，tú-á茫。身軀洗洗--leh tó tiàm眠床頂，發現床巾、被單…已經換新，枕頭頂khǹg 1張卡片，說明已經整理過，而且有整理人簽名，日本人負責ê態度實在hō͘人欽服。

さしみ：

さしみ，生魚片，日本人，上合意，搵hit號わさび，滋養kài kah味，貴蔘蔘，食bē起，罕罕食--一擺，o-ló kah tak舌。

わさび：

わさび，山葵醬，阿里山種--ê上好味，kǹg鼻孔，目油chha̍p-chha̍p滴，喙內猶leh哺，手裡猶原攑箸，貴蔘蔘，食bē起，m̄-chiah空運載對日本去。

第三工：20100202

來到大阪已經第三工，Tiat--è講今á日才是正式thit-thô ê開始，因為Sió-gio̍k-á已經退燒，全家ē-tàng做伙出門，不過Sió-gio̍k-á chā-hng kui工無食，倦tauh-tauh，需要kā鼓勵。「Sió-gio̍k-á！來去thit-thô，歡喜--ho͘ⁿh！你若勇敢家己行，bē kiap爸爸ko-ko纏，我chiah chhoā你去百貨公司揀你kah意ê thit-thô物。」Chit-ê鼓勵真有效，隨時牽阿媽ê手歡歡喜喜toè爸爸行。

Boeh去京都著愛坐火車，大阪梅田車頭鐵路幾若條，boeh坐tó一線？Tiat--è chia看hia看才去買車票，車站出出入入旅客gia̍p-gia̍p-si̍h，像阮án-ni清閒等boeh坐車ê人真少，Tiat--è講：「大阪是大都市，來chia上班--ê大部份toà庄腳，地下鐵是in來來去去ê交通工具，家己駛車無幾個。」莫怪街路人少車mā少，地下街卻是人山人海親像趕鴨á陣。

車箱設計kap台鐵差不多，氣溫低，坐位燒hōm-hōm，kioh是人tăⁿ坐過，感覺gāi-gio̍h gāi-gio̍h，後來才知是安燒氣，暗想「有夠sông」。

坐火車：

Khin-lin-khong-long！khin-lin-khong-long！

火車起行，火車起行，行過地下，行過鐵橋，請問人客tó位去，tit-boeh到--à，tit-boeh到--à，來去京都遊廟寺。

Khin-lin-khong-long！khin-lin-khong-long！

火車起行，火車起行，行過田庄，行過都市，請問人客tó位去，tit-boeh到--à，tit-boeh到--à，河原町站著落車。

梅田到河原町大約50分鐘久，看he路邊景色，無比咱台灣khah súi，因為台灣山脈較青翠，綠色ê田園mā較濟。雖罔chia ê山khah低，田園較無青翠，m̄-koh空氣鮮，天頂較清氣。In ê建築物mā加真有氣質，ná像無hit-lō磚棚á搭厝頂、拖iap-á ê違章建築，私人轎車mā lóng停kah規規矩矩。

河原町到清水寺ē使得行路mā ē使得坐車，chhàu-tú-khám tn̄g-tio̍h「天公落水」，tiō決定坐公車，公車站牌幾若號，看來看去m̄知boeh坐tó一線，突然一個好心日本婆á làu liú-lia̍h ê英語問Tiat--è：「需要幫忙--bò͘？」 實在感激，因為生份人ê熱情指點，才hō͘阮順利上車、納錢，省去真濟麻煩，真是上天保佑貴人相助。雨愈落愈粗，落車後趕緊買雨傘遮雨，遊客無濟，路邊店舖禮貌招呼，散步tī烏寒落雨ta̍p滴街路，雖罔無少年戀人ê浪漫，一家三代相依倚，伴囝牽孫hō͘人幸福無比。

清水寺是真古老ê佛寺，服祀觀音菩薩，日本人ê信仰是無啥了解，看寺內設施、佈置，猶原離bē開世俗救苦救難ê祈求、抽籤、下願、姻緣，園景建築雅氣清幽，徛tiàm出名「清水ê舞台」ē-tàng觀賞市區景色，聽講遊客ka-ia̍h時，tī chia是尻脊骿tú胸坎á kheh來kheh去，連翕一張相都費氣。行落後壁山路，才發現「清水ê舞台」是用百外支大支杉á箍ùi下面搭起來--ê。兩個孫早起無食，tú-chiah顧sńg雨傘，襪á、手ńg tâm-sip-sip，Sió-gio̍k-á一直喝寒、喝腹肚枵，趕緊chhoē食要緊，附近tú好一間麵店，內面有烘爐thăng烘火，1人1碗蕎麥麵，歇睏半點鐘，chiah恢復元氣。

遊清水寺：

十二月天，烏寒天氣，tap滴雨聲冷ki-ki。

一家三代，雨傘依倚，清水寺chia來hia去。

自在觀賞，觀賞自在，憂愁bē記得。

觀音免拜，靈籤免抽，心誠bē傷害。

離開清水寺，斡向八坂神社，ná行ná看，沿路景色真súi，上ē o-ló得tiō是清氣整齊，Tiat--è顧翕相，我mā記錄一寡短片。行轉來河原町站，邊a有一條傳統市場街路，A-Jû提議入去看māi。路無闊，每間店面mā無闊，貨物排疊整齊清氣相，kap台灣ê超商仝款，無台灣傳統菜市ê雜亂、o-cho，土腳mā bē siûⁿ-leh-leh，店頭家lóng笑面笑面kā你招呼，有買ありがとう，無買ありがとう，禮貌客氣十足，家庭主婦來chia消費買物，ē使得妝súi-súi，免驚bak lah-sap。看he鹹鰱魚真想boeh買1尾轉--去，食看敢有kap台灣食ê仝滋味，牽--ê嫌費氣，只好放棄，尾á買2塊「和菓子」kap 1包土豆仁。

離開市場，腹肚mā枵--a，無意中hō͘ A-Jû發現1間「名代豬排」，講he豬肉chìⁿ是偌好食tú偌好食，tiō chhân-chhân行入去享受--一下，實在好食，m̄是風聲--niā-niā，外皮金黃色，chìⁿ kah sŏ͘酥，豬肉iù-jī油滋，搵料mā真kah味，わさび幼mī-mī，特別kah意，蝦-á-chìⁿ mā仝款，2個孫--ê lóng食2尾，好食是好食，消費貴som-som，罕罕á享受一下，應該m̄是討債。食飽koh去一間百貨公司se̍h，目的是boeh hō͘ 2個孫買thit-thô物，chit 2個gín-á真乖巧，kut-la̍t行lóng無纏boeh hō͘人抱，需要鼓勵，Sió-gio̍k-á揀1仙「莉卡娃娃」，Má-lêng-chî mā揀1仙布thīⁿ--ê ê阿不倒。

9點外koh轉來到UMETA地下街，順紲買一寡早頓kap宵夜，然後轉去旅館，入去房間先làu燒水，洗身軀，恢復一日疲勞。10點外，kā冰箱內昨昏留落來ê清酒「醉心」捾--出來，溫燒pheⁿ做2甌，倒1盤市場買--轉來ê土豆，tō kap牽--ê逍遙自在瘦lim--起來，仝款tú好茫，lo̍k喙了後藏入被內，真緊tiō睏ka-choē。

歡喜lim燒酒：

歡喜來lim燒酒，m̄-thang茫，心情若輕鬆，lim酒頭bē重，ûn-ûn-á thîn，慢慢á sip，歡喜過1工。

第四工：20100203

昨昏去se̍h京都，今á日mā boeh去京都se̍h，Tiat--è講昨昏坐慢車較了時間，今á日著坐急行--ê，較有時間thit-thô。boeh去ê所在是尾á第二站，一個無張持soah坐過頭，好佳哉chhiân一時á tiō原車坐倒轉來。

天氣chiâⁿ清無leh落雨，Sió-gio̍k-á恢復健康精神chiâⁿ-chán，離開地下車頭，看he街路chiâⁿ闊，人、車無kài濟，心情放輕鬆行到「二條城」，kan-nā看牆圍、城門，真正大開眼界，權力、霸氣、威風ê王、皇世家，隔離偌濟神祕tī內面。chia是日本幕府時代ê政治中心之ㄧ，tō親像he中國北京ê紫禁城，改朝換代了後，chit-má是觀光thit-thô ê景點。

二條城是德川家第一將軍德川家康1603年所起ê徛家，1994年hō͘聯合國教科文組織登記做世界遺產，進入城門了後：

「城堡主要ê建築分本丸kap二之丸兩大區，根據我對日本歷史ê了解，本丸是城堡主人toà ê所在，二之丸是hō͘較低級較少年ê貴族toà，mā是招待人客ê所在。」

Tiat--è翁某出國chiâⁿ有計劃，伊ná行ná講，無輸專業解說員：「咱代先來參觀二之丸，入口叫『唐門』，內面『桃山式建築』是雙倒水厝蓋，門斗頂貼金箔á，高貴koh氣派。為著維護世界級木造古蹟，入內參觀，著穿淺拖á保持恬靜，mā bē使得翕相。」

二之丸ê內面chiâⁿ闊間，沿走廊參觀房間1間koh 1間，古早設施排tī目睭前，斯當時貴族生活ê神祕hō͘人稀奇，上特別--ê是走廊木造地板ê「鶯聲地板」，腳步踏過ē聽著黃鶯幼幼ê叫聲，實在趣味藏玄機，起厝師傅ê技藝實在ē o-ló得，Tiat--è講：「機關khǹg tī地板下腳，m̄-nā是玄機，koh-khah是政治人物ê心機，咱chit-chūn聽著--ê是細聲幼字幼字，若是暝時一定大聲警告你，有刺客--入來，有刺客--入來，著sè-jī，另外室外通路舖細粒石頭á，mā是仝款用意。」

二之丸外面是園藝造景，樹木為主，配合石頭、水池，kài有氣質，尤其是he大欉青翠ê松樹，台灣tiō罕得看見，se̍h 1 liàn不止á遠，ná欣賞ná翕相，2個孫經過阿姑ê指導，真緊tō學ē-hiáu，一直搶boeh kā阮翕相。本丸建築簡單樸素，因為無開放，koh hō͘石頭gih--ê牆圍圍tiâu--leh，tiō m̄知內面ê祕密。

遊二條城：

權貴生活心tám-tám，boeh睏bē使有美夢，雖然權勢壓死人，總是過日無輕鬆。

離開二條城，來到南禪寺，che sī日本臨濟宗ê總寺院，是修行坐禪ê好所在，果然無錯，內面恬靜、自然，土腳清氣好行踏，樹á是chiah大欉koh青翠，古早禪房tiām-chut-chut，行入內院kan-nā chhun鳥聲kap腳步聲，看he高抵天ê三門tiō hō͘人敬仰萬分，三門ê柴柱圓圓ná杉á箍，m̄-koh杉á無可能hiah大箍，有可能是楠á柴抑是ひのき，ùi tó位來？心內充滿好奇，來到日本，看著in ê樹木kap神社寺廟建築柴柱，lóng是hiah-nī大支，建築年代lóng是hiah-nī古早，tiō hō͘我想著咱台灣，一寡有古早台灣味ê建築bē-hiáu boeh保存，千外年兩千外年êひのき，hō͘日本人剉kah boeh ta-tin，mā m̄知影thang可惜，連家己mā續leh損斷chham--leh，實在hō͘人怨嘆。

ひのき：

ひのき！ひのき！ひのき柴chiah大支，古早阿里山是滿滿是，阿里山鐵路一下開，夭壽！ひのき柴一車一車載--出去，載tó位？載去日本搭「鳥居」。

繼續se̍h，繼續看，路邊有人力車夫打扮古裝身穿leh招呼人客，規規矩矩，bē纏toè人客ko-ko纏，路邊賣物店家，仝款有買ありがとう，無買ありがとう，禮貌客氣十足，每間店lóng有安燒氣，一入門tiō感覺足溫暖燒絡。行了腹肚枵--a，入去路邊1間leh賣ラーメン〔拉麵〕ê店食ラーメン，我食1碗豬肉ラーメン，豬肉軟khiū，可惜湯頭無kah意，啥物是ラーメン，kap台灣手giú ê大麵仝款，並無啥物特別。店頭家家己1人to-chí兼走桌，卻是服務周到，茶、拭手巾lóng拴kah到，桌椅碗箸mā lóng衛生清氣。

ラーメン：

ラーメン！ラーメン！tiō是麵，日本chiâⁿ流行，食--起來bē kah味，猶是台灣大麵羹、chhe̍k-á麵、擔á麵、大麵炒、炒大麵…仙食都bē畏。

食飽koh行，se̍h來到「哲學之路」，這是一條散步之路，倚溪á邊，溪á邊兩pêng kap路中央種真濟櫻花，chit-má m̄是櫻花期，遊客chiâⁿ少，若是家己1人tī chia散步，有影是思考人生ê好所在，哲學（tiat-ha̍k）台灣人講做thiat-ha̍k（徹學），徹底了解人生ê學問，有影比較較好了解，已經boeh 70歲，人生是啥？猶是茫茫渺渺，了解bē徹底，「食衣住行」？抑是「生住異滅」？既然來到「哲學之路」，bē了解mā著kek一個款，消遣一下家己，tō thiau-kang家己1人慢慢á行，假影做思考面像，叫Tiat--è翕幾若張相，看有像哲學家模樣--bò͘。

媽孫á腳頭chiâⁿ勇，2公里ê路程，行boeh 1點鐘，lóng無喝腳酸。「哲學之路」行到盡磅，斡向銀閣寺，突然1個日本人半行半走，嘴ngāu-ngāu唸，用手一直ia̍t，摧阮趕緊行，Tiat--è看手錶，原來tit-boeh下班，猶chhun 20分鐘，既然來--a，tiō買票入門參觀，倚山坡地ê庭園設計，配合日本式亭閣建築，hō͘人真想boeh toà--落來，時間真趕，hit位顧門ê先生toè阮尻脊後一直ngāu-ngāu唸，一直趕，行到上高所在，ē-tàng看山腳京都風景，這時日頭boeh落海，暗霞真súi，可惜影一下tiō ài離開。

下一站是京都車站，著坐バス（公車），因為坐tī上後壁，不時著看頭前螢幕，斟酌到位猶未？好佳哉目睭看遠猶ē堪得，tiō幫Tiat--è tàu看。到位落車，已經是霓虹燈閃熠ê暗暝，夜都市生活已經開始。

京都車站十足現代化，建築真有現代感，11層樓ê建築，樓頂曠闊ê廣場，ē-tàng看著天頂，peh上連續百外坎ê電梯，到kah百貨公司ê 13樓，ē-tàng看著kui-ê京都車頭ê面貌，有夠壯觀，尤其hit-ê玻璃做ê大壁堵，ē-tàng看外口夜景，koh ē反射後面ê景色，向玻璃堵有看著京都塔，越後壁看mā有看著京都塔，一時間soah m̄知tó一個是真，tah一個是假，夜景hō͘人看kah茫渺渺。因為好sńg，tī chia peh上peh落行2擺。8點外，tiō去「拉麵小路」食ラーメン，湯頭chiâⁿ濁鹹tok-tok，莫怪ē送1杯冷ki-ki ê白滾水，食一嘴鹹配一嘴chiáⁿ，chit種食法實在真怪奇，食飽行「空中徑路」欣賞京都塔chit-pêng ê夜景。

盈暗換坐特快車轉去大阪，20外分tiō到位，tī UMETA地下街問牽--ê「敢boeh koh瘦lim--一下？」

「好--a！」牽--ê應著koh真順嘴。

轉來旅館，ná lim ná開講，冰箱內有昨暝tī市場買轉來ê「和菓子」，順續切hō͘孫--ê食，日本人kā和菓子做kah súi-tang-tang，kioh是偌好食，原來口味kap台灣ê糕á粿差不多，因為siuⁿ甜，囡á soah無啥愛食。日本人注重包裝、注重外表體面，he m̄是kan-nā注重個人穿插，閣較重視社會規範、公共設施，莫怪in ê街路清氣，交通規矩，建築美觀，講究生活品質，tī in ê 和菓子製作kap包裝藝術tiō ē-tàng看--著，che，咱台灣實在輸人thiám-thiám。

一日長ló-ló，實在好thit-thô，仝款tī tú好茫ê心情睏--去。

第五工：20100204

2個孫toè大人來到日本觀光，無論坐飛機、坐火車抑是行路，lóng真乖，罕得吵鬧、kiap--人，實在ē o-ló得。Tiat--è特別安排今á日去大阪「環球影城」sńg，sńg chi̍t-ê夠氣，Sió-gio̍k-á kap Má-lêng-chî歡喜kah笑吻吻，ná行ná tiô。「環球影城」kap東京「迪士尼」pêⁿ有名，舊年chit 2個gín-á tiō bat去「迪士尼」sńg--過，真知遊樂場ê趣味，坐tī車內，tiō一直kā阿媽講去「迪士尼」thit-thô ê代誌，講kah媽孫á歡頭又喜面，一直講到落車猶講bē-soah。

「環球影城」並無所想ê鬧熱，有真濟場地leh修理，有真濟表演停睏，人客無濟，「人山人海」「鬧熱滾滾」ê形容講bē出嘴，一時soah有hông piah-sòng-phàn ê感覺。M̄-koh人少顛倒好thit-thô，boeh看節目免排列，boeh sńg thit-thô物隨時ē使得sńg，boeh坐boeh行隨在你，boeh食boeh lim隨在你，chhoē便所mā免驚『脫隊』，對細漢囡á kap老人家攏真方便，省去真濟麻煩kap時間，kin-sio̍k chiah-nì闊ê場所一日mā sńg bē了，ē-tàng kap囡á慢慢á做伙sńg，比看囡á家己sńg較心適，chit種三代做伙thit-thô ê心情，真正輕鬆無tè chhoē。

「動物演員舞台」親目看動物明星表演，「水世界」特技人員演kah ná真--ê，大人囡á攏趣味，2個孫猶細漢，猶是較趣味he較細項ê thit-thô物、まんが人物，尤其特別kah意真人化裝ê史奴比、Hello Kitty、芝麻街Elmo，ē-tàng kap in做伙牽手、翕相，歡喜kah笑gī-gī腳鬆手弄。

已經se̍h kui工，囡á攏無hoah thiám，離開影城仝款精神十足，tī附近chhoē 1間餐廳食暗，順續看大阪ê暗霞，無空氣污染ê都市暗霞，chiâⁿ-súi。轉來到旅館chiah 6點外，Tiat--è kap A-Jû kā囡á交帶hō͘阮tiō chhoā--leh閣出去thit-thô，講boeh去道頓堀shopping，補償A-Jû顧Sió-gio̍k-á ê功勞。留阮tiàm旅館歇睏款行李，明á早起tiō ài轉去台灣，無goā久，2個孫已經睏kah kô͘ⁿ-kô͘ⁿ叫。

第六工：20100205

Boeh轉去台灣ê班機是10點40分，提早1點鐘到機場，坐公車需要1點鐘，旅館kap車站20分，所以上慢8點20 ài出發，8點前若khû便所順利，當然OK，m̄-koh chit-ê kha-tau是上大ê困擾，因為bē-tàng hō͘你「小等--一下」，ko͘-put-lî-chiong kā阿華教--ê兩步方法攏總用，黃色止落屎ê藥丸á kā吞--落去，chiah koh kā大人用ê尿chū-á穿--起來，按呢tiō萬無一失，閣來tiō是聽候Tiat--è chhoā阮去坐自動車、坐飛龍機。

仝公司ê班機，仝款飛hiah-nī高，只是天氣無hiah-nī光iāⁿ，bē-tàng欣賞高空景緻，只好罔看影片，罔聽音樂，m̄知啥物因toaⁿ，飛轉來到桃園機場，已經中晝12點50外分，足足加飛1點鐘久，入關了後，趕緊去便所kā尿chū-á褪掉，實在真gāi-gio̍h。

Tiat--è講按呢坐晏去早--轉來ê班機mā是bē-bái ê選擇，m̄免事先寄行李，m̄免chhong-chhong-pōng-pōng趕時間，雖罔加toà 1暝旅館，但是有足足4工ê thit-thô時間，費用kap 5工ê行程差無外濟。其實心內了解，是Tiat--è有孝體貼ê安排，若無，6工ê旅行，in少年人m̄知boeh加thit-thô偌濟所在--leh。

退休了後，不sám時tō-ē聽著同事出國ê消息，實在chiâⁿ欣羨，chit擺chhân-chhân提出勇氣出國去日本大阪、京都se̍h 4工，親目看著無仝國度ê生活習慣、城市現代化ê機能、出入交通ê節奏、生活品質、國民素養…感想真濟。

親像in食頭路人ê敬業精神kap禮貌，tiō比咱台灣人贏真濟，上班tiō是上班，規規矩矩，真少hit-lō開講phò-tāu消遣ê現象。

交通設施chiâⁿ人性化，注重人ê安全，動線流通，莫怪逐人腳步mé-lia̍h，來來去去ná像走反，現代化都市人ê鬱卒，有伊ê無tā-oâ。

多數生理場空間攏無闊，徛家mā無闊，m̄-koh整理kah真清氣相。

可能是氣溫較低，自然草木無台灣ê青翠，khah無hit-lō青sìm-sìm ê感覺，但是人工ê栽培卻是非常用心。

Chiah thit-thô 4工久--niā-niā，koh是tī大都市，這種印象bē-tàng準算，後日有機會來去in ê庄腳hui-hui看看--leh，可能有無共款看法。

日本製bē-hiáu日本話：

兩個老大人，合起來百四歲，雖罔是日本製，m̄-koh bē-hiáu日本話。

細漢有讀冊，攏讀he中國話，實在真頇慢，到taⁿ捲舌猶捲bē好勢。

好佳哉，阿母ê話無phah-m̄-kìⁿ，chiah ē用家己ê話寫家己thit-thô ê經過https://chhantionglang.blogspot.com/search?q=A-jih叔