Ī--ā

 Ī--ā ----Lah-jih 2001.4.22 

Ī--ā chit-ê miâ-sû, m̄-sī beh hō· góa kiò--è, sī kan-nā beh hō· góa chheng-ho·, hō· góa siàu-liām--ē, in-ūi tī góa kì-tì lāi-té, chiông-lâi tiō m̄-bat tng-bīn kiò i 1 siaⁿ " ī--ā ". in-ū ī--ā i ūn-khì bái, put-hēng go̍eh-lāi-hong soah lâi kòe-sin,mā chhōa cháu tâⁿ chhut-sì bô gōa-kú ê sió-mōai, pàng-sak góa chit-ê khó·-miā ê pháiⁿ-miā ban-á-kiáⁿ. hit-nî góa  5 hòe, to iáu-bōe 4 chiok-hòe--leh, thiaⁿ kóng ī--ā mā-chiah 40 thóng hòe--niâ. 
Ūi-tio̍h beh kā ī--ā ê hàn-chháu, bīn-bô·, khǹg-tiàm kì-tì lāi-té, thang hó sî-sî siàu-liām, tiō khai-sí sì-kè péng toh-kūi-á, hian chhù-lāi ê hō·-kháu-miâ-pho̍·h, sin-hūn-chèng, a-hiaⁿ tha̍k-kòe ê chheh, sūi-jiân bô gōa-chē mi̍h thang péng, iû-gôan chhiau kúi nā piàn, lóng chhōe bô ī--ā ê siòng-phìⁿ, mā bô ī--ā ê kè-chng, a̍h-sī hoe-hún hit-lūi ê cha-bó·-lângmi̍h-kiāⁿ. 
Bô siòng thang khòaⁿ, iōng mn̄g--ē, mn̄g a-pa, mn̄g a-hiaⁿ, mn̄g a-peh a-ḿ, mn̄g chhù-piⁿ keh-piah, ti̍t-tio̍h ê kiat-lūnsī: seⁿ-chò lò-lò, hàn-chháu bē-bái, kha-chhiú liú-lia̍h, hó chò-hóe, ài pang-chān--lâng.... 
sêng chiâ ? che sī góa siōng beh chai-iáⁿ--ê : sêng jī-hiaⁿ, lâng lò-lò ; sêng lín jī-ché--lah, bīn-á îⁿ-îⁿ ; khan-ná sêng lína-kū, ba̍k-chiu chhim-o chhim-o; siōng-kài-sêng lín kè hái-kháu hit-ê a-î..... a-î leh a-î--leh, ” sí lāu-bú, lō·-thâu tn̄g “, hn̄g tī hái-kháu, iā m̄-bat lâi-khì. thâu-khak-lāi iû-gôan bô hêng-iáⁿ, kì-tì ê chhng-khò·, ī--ā ê hit-keh ūi-tì, iû-gôan sīkhang-pe̍h, bāng-tiong ê bó-chhin, sī bông-bông chi̍t-phiàn, chí ū lêng-hûn tòe sin-piⁿ. 
Ī--ā phái-miā, sè-hàn tiō hō· a-má phō lâi io, phiau-chún ê sim-pû-á miā, sūi-jiân bô-lâng ge̍k-thāi --i , chóng--sī bô-thang hióng-siū chò lâng cha-bó·-kiáⁿ ê chū-iû, lâng kóng “ kam-gōan chò sàn-hiong-lâng ê cha-bó·-kiáⁿ, m̄-chò hó-gia̍h-lâng sim-pū ”, hô-hóng góan Siau--ka kāng-khóan sī sàn-phí-phí ê chng-kha-lâng. 
Ī--ā tī-sî kap a-pa kat-pâng sak-chò-tui, góa m̄-chai-iáⁿ, 40 thóng hòe ê jîn-seng, seⁿ la̍k-ê hāu-seⁿ, saⁿ-ê cha-bó·-kiáⁿ, phah-sńg nn̄g-ê, chhun--ê gō·-ê hāu-seⁿ, nn̄g-ê cha-bó·-kiáⁿ lóng ū hó ke-kà, kiàn-li̍p bí-móa ka-têng, sūi-jiân m̄-sītōa-hù tōa-kùi, chóng--sī láu-si̍t phah-piàⁿ kòe-ji̍t, m̄-bat chò phiáⁿ tāi-chì, sǹg sī ū hó î-thôan, bô pāi-hāi tio̍h pē-bó ê miâ-siaⁿ, ī--ā ê it-seng, si̍t-chāi bô óng-hùi i lâi sè-kan kiâⁿ chit-cho̍ah. 
Ī--ā ! lí tī toh-ūi ? kám bē su-liām lí ê ban-á-kiáⁿ, i í-keng 60 hòe, ji̍t-ji̍t siūⁿ beh kap lí siong-hōe, ǹg-bāng ī--ā lí lâithok-bāng, a̍h-sī tán-thāi lí ê ban-á-kiáⁿ, sè-kan chek-jīm ôan-móa, chiah lâi sio-chhōe.