客鳥：第二篇台文作品
客鳥：1994/4第二篇台文作品
（1998/3/1修正，收集tī 林央敏主編：台語散文一紀年）
頂禮拜三早起時，tú-beh peh-chiūⁿ (上)三樓教冊，無意中看著兩隻鳥á，tī 運動埕hia teh散步，chhōe物件食。Chit兩隻鳥á，生做真大隻，kui身軀ê 毛是烏--e chhap白，尾長長，頭殼額á giâ koân-koân，看--起來不止á高雅，尤其是leh行路，bē chhia̍k-chhia̍k-tiô ，一步á一步，尾koh sìm--一 下sìm--一下，hō͘人感覺足大pān足高貴--è ！Chit 兩隻鳥á，親像一對翁á某ê 款，chit 隻若行，hit隻tō tòe 。
當我看kah無nih目ê時，phu̍h--一下，一隻飛去--à，續落另外hit隻mā tòe後壁飛--去。斟酌kā看in會飛到tó位去？in無驚惶，也無雄kông，khoaⁿ-khoaⁿ-á飛，飛到運動埕西旁hit叢上大叢、上koân ê 銀合歡樹頂，ah tō無khòaiⁿ--à！
天光日，來到學校，kāng款peh-chiūⁿ三樓，hit兩隻鳥á iū-koh飛來tī-hia teh 散步，互相做伴chhōe 物食，kāng款hiah-ni̍h-á相好，實在hō͘人欣羨，嘛誠予mā chiâⁿ hō͘人o-ló ！好好á kā in看詳細： 「Ah！客鳥！He是客鳥！」 差一屑á tō喝--出來。莫怪--ò͘！原來是gín-á時代ê 老朋友，chiah ē hō͘人感覺hiah-ni̍h面熟hiah-ni̍h親切，真是『好久不見！』
Gi̍n-á時代，庄腳舊厝正身後壁，有兩叢Ke-jiû-á樹，足koân大--ē，上頂面ê樹oe ，時常有一種鳥á來hia做siū生湠。有一pái，tng我taⁿ頭看kah無nih目ê時，阿爸牽我ê手，比樹頂ê鳥á kā 我講：「He號做客鳥！i真巧--ō͘！sīu lóng做足koân--ē ，àn-ne chiah bē hông (予人)掠去飼，hông關tiàm 鳥籠á內。」
「Ah hiah-koân！若poa̍h--落來beh àn-chóaⁿ？敢m̄是chiâⁿ危險--leh！」
「應該bē chiah-tio̍h，in ê siū lóng做kah足大ê (個)，koh足勇--ê！你kā 看，lóng是用hit-lōe (hit種)樹á枝做--ê ，親像阿爸teh圍籬笆àn-ne，一枝橫過來，一枝橫過去，每一枝柴á lóng相kit tiâu--leh [交叉固定]，tō是thàu大風、落大雨，mā bē 去hō͘ liàn--落來，足安全ê--ō͘！你koh kā看詳細，Chit兩隻客鳥，ta̍k日lóng足無閑--ê，一時á飛--出去， 一時á īu-koh飛--轉來，i ê 嘴內，lóng-ē咬一枝柴á枝，有--bò ？Chit-má in tú-leh 做siū，大概母--è beh生卵--ē，koh一月外日，咱tō-ē看著鳥á-kiáⁿ，tī siū內hia ngiauh--一下ngiauh--一下--è！」
「阿爸！我知影lah！Ah 你嘛足辛苦--è ho͘ⁿh！」……
將近beh 四十冬--a ，lóng罕得看著客鳥，最近看著hit-pái，ē記得是四、五冬前，去參觀新萬仁製藥廠時，看著大門邊hit叢南洋杉頂koân，歇兩隻鳥á，看--起來ká-ná熟似面熟似面，khah緊kā khiā tī邊--a ê牽手講：「你看！樹á頂hit兩隻鳥á，是m̄是客鳥？」
「Hm̀！大概是--ō͘！你目睭hiah金，m̄知loā久m̄-bat看著--à，khah緊用khamelah kā hip--起來！」
相片洗好，無kat-lōa滿意，細細隻á， 相片koh烏烏，連家己都看bē出來是「客鳥」……
Koh飛來ti-hia teh散步--ā，chiâⁿ實是一對翁á某á，猶原是雙雙對對，hiah-nī恩愛，翁行某tòe ，漂撇大pān iū-koh高貴。Chit擺beh kā lín看hō͘斟酌，看hō͘清楚，有影生做chiâⁿ-súi ，嘴pe烏烏尖尖，尾長長翹翹，白色ê腹肚，si̍t股頭mā chhap一koá-á白--è，sīn--ē （剩的）lóng是烏色--è，Ah！m̄-tio̍h！看in飛--起來chiah知影，si̍t ê外緣hit排羽毛mā是白--è。飛tiàm半空中phiat--leh phiat--leh，真正優美，真正好看，看in飛去樹á頂chiah發現，原來in早就tī-hia做一個足大kâi ê siū，mā是做足懸--ē，kah我細漢看著--è kāng款。
Siū愈做愈大，照看beh tòa--落來ê 款！來--ò͘！來--ò͘！góan chiâⁿ歡喜lín留tiàm chia kah goán做厝邊！goán是chiâⁿ hó͘ⁿ-kheh（好客）ê在地人，向望lín ē-tàng疼惜chit-ê所在，做goán-ê好厝邊，永遠tòa--落來，kah阮saⁿ-kap 來phah-piàⁿ，將chit-ê所在成做一個真正有自由，有尊嚴ê美麗寶島。自chit-má 起，lán lóng是家己人--ā，無愛koh叫lín是「客鳥」，應該稱呼lín是「喜鵲」，tī lán人七月初七hit一工，搭橋hō͘牛郎織女天河相會，做好代ê 「喜鵲」！
【兼寫母校八十週年生日感言】
（田中國校第九屆校友蕭平治敬寫1994/6/5 tī田中國民小學）
客鳥本名叫喜鵲，i是台灣民間故事，牛郎織女七夕相會chit 段上精彩ê戲文內底，上重要ê配角，若無客鳥來搭鵲橋，牛郎織女是beh àn-choáⁿ對河溪（銀河）hit旁岸到河溪chit旁岸來相會--neh！所以自古以來，客鳥tī lán台灣人ê心目中，是一種好鳥，看著客鳥lóng-ē hō͘人歡頭喜面，相信i ē kā 人報喜報善兆。
今á日，是lán田中國校建校八十週年ê校慶，chiâⁿ tú-hó有chit兩隻客鳥飛來lán學校內做siū生湠，che實在是一ê好吉兆。請ta̍k-ke kā goán看māi leh， chit幾年來，母校ê建設kah發展，m̄ 是家己teh o-ló，確實有影進步chiâⁿ濟，無論是起教學大樓，抑是鋪PU ê 運動埕跑道，教冊用ê硬體、軟體，lóng有十足ê進展；ah若講教學品質ê提高，koh khah免講，mài講siaⁿh，kan-taⁿ看tī母校讀冊ê讀冊gín-á，一年比一年khah濟你tō知影，田中國校若m̄是一個好所在，ná-ē有hiah-ni̍h濟別所在ê家長，千辛萬苦、萬苦千辛，m̄驚路途遙遠，m̄驚麻煩無閑，ta̍k日用汽車、o͘to͘bái載in ê 子弟來chia讀冊leh！
實在chiâⁿ歡喜，母校有今á日ê進步kah成就，che lóng-tio̍h感謝lán校長先生kah諸位主任、老師、先生、小姐ê phah-piàⁿ愛護。做為一個suh田中國校奶水大漢ê我，ē-tàng轉來母校教冊，貢獻淡薄能力，實在感覺chiâⁿ榮幸。
想起細漢時陣，tiàm-tī母校讀冊ê情景，一幕一幕浮tī目睭前，一目nih，已經過了四十冬--a，今á日看著母校有chit款ê輝煌成果，goán內心m̄但歡喜，mā感覺足hiau-pai，m̄-thang講i是老店，i iáu-bōe老leh，chit-má tú tī lán許學校長ê領導之下，當teh發磅，iáu chiâⁿ少年，今年chiah八十歲niā-niā，奶水iáu-hôan-ná真大pak， iáu-koh beh養育幾千幾萬ê kiáⁿ孫leh！
親愛ê母校，偉大ê母校，祝您生日快樂！永遠年輕少年！永遠有活力！永遠笑微微！
附記：
Chit篇「客鳥」是第二篇散文，內面主角hit二隻客鳥是真實做siū tī 田中國校內，經過四、五冬ê生湠，chit-mái已經有真濟kiáⁿ孫，作者bat親目看過四隻同時出現tī校埕，一位同事講上少mā有chiaⁿ十隻。因為驚人掠，到 taⁿgoán攏m̄敢對外公開。（1999/5月）
《註解》
giâ koân-koân：[舉得高高的]。
烏--e chhap白：[黑夾雜白色的]
chhia̍k-chhia̍k-tiô ：[活蹦亂跳]
sìm--leh sìm--leh：[上下搖恍]
khoaⁿ-khoaⁿ-á飛：慢慢仔飛。
Ke-jiû-á樹：櫸木。
siū：[巢]。
樹oe：[樹椏]
無kat-lōa：bô-kài-gōa，[不怎麼]
ngiauh--一下ngiauh--一下：[蠕動]
hip起來：hip相，翕。
斟酌：chim-chiok，[詳細]。
chiâⁿ-tú-hó ：[非常湊巧]
suh：[吸吮]
iáu-hôan-ná ：[仍舊]
hiau-pai：hia-pai，[驕傲]。
大pak：水流大。
chiaⁿ十隻：將近十隻
越頭看Siau Lah-jih ê 台文路：
下面ê 文稿是1995/8/8 應用TW301軟體拍ê 原稿。（2001/2/4）
客鳥 刊tī台文通訊#30期.並選輯tī台語文學有聲叢刊內
頂禮拜三 早起時,拄beh peh-chiūⁿ(上)三樓 教冊 ê時陣,無意中 看著兩隻鳥仔,ti運動庭 hia teh散步,chhōe物件 食。Chit兩隻鳥仔 生做誠大隻,歸身軀 ê毛 是烏 e+ chhap白,尾 長長,頭殼額仔 giâ懸懸,看 起來°不止仔高雅,尤其是行著路 bē chhiak-chhiak-tiô,一步仔
一步,尾 閣sìm 一下°sìm 一下°,予人感覺誠大方 誠高貴 e+! Chit兩隻鳥仔 好親像一對翁仔某 ê款,chit隻 若行,彼隻就tòe 。
當我teh看kah無nih目 ê時,phu-u̍h 一下°,一隻 飛 去aⁿ,續 落°另外彼隻 嘛tòa後壁 飛去。我斟酌kā看In 會飛到叨位去,In 無驚惶,也無雄kông,khoaⁿ-khoaⁿ á飛,飛到運動庭 西旁 彼叢上大叢,上懸 ê銀合歡樹頂,ah就無khòaiⁿ aⁿ!
天光日,我 仝款beh peh去三樓,彼兩隻鳥仔 又閣tī-hia teh散步,仝款赫呢相好,真予人欣羨,嘛真予人o-ló ! 好好仔kā恁看詳細:「ah!客鳥!He 是客鳥!」我 差一屑仔就喝 出來°。莫怪 o͘°!原來是囡仔時代 ê老朋友,才會予人感覺chiah-ni̍h面熟,chiah-ni̍h親切,真是『好久
不見』!
囡仔時代,莊腳 舊厝 正身 後壁,有兩叢ke-jiû-á樹,生做天頂尾懸,上頂面 ê樹椏,tong-tong有會一種鳥仔,來hia做岫。阿爸kā我講:「He 號做客鳥,伊真巧 哦!In ê岫 攏做足懸 e+,按呢 才bē hong(5予人)掠去飼,hông關tiàm鳥籠仔內。
「Hiah懸!ah若跋 落來°beh按怎?敢m̄是真危險 nehⁿ?」
「應該bē才著,In ê岫 攏做 kah足大個(e)5足勇 e+! 你 kā看,攏是用hit-loe(7彼種)樹仔枝 做成 e+,親像阿爸 teh圍籬笆按呢:一枝橫過來,一枝橫過去,每一枝柴仔 攏相kit-tiâu-leⁿ![交叉固定]就是thàu大風 落大雨,嘛bē去予liàn 落來°,足安全 ê哦+! 你閣kā看詳細:
chit兩隻客鳥,逐日 攏足無閑 e+,一時仔 飛 出去°,有 一時仔°就飛 轉來°,伊ê嘴內,攏會咬一枝柴仔枝!」阿爸用手比對樹仔頂,繼續講:「有 無°? chit-mái In tú-teh做岫,大概 母 e+ tit-beh生卵 a+!閣一月外日,咱就會看著鳥仔囝 tī岫內hia ngiau 一下°ngiau 一下°。」
「阿爸!我 知影 laⁿ! ah你 嘛足辛苦 e+ ho͘hⁿ!」.....
將近beh四十冬 a+,攏誠罕得看著客鳥。最近 看著彼擺,會記得是tī四 五年前,去參觀新萬仁 製藥廠 ê時,看著大門邊彼叢南洋杉 頂懸,歇兩隻鳥仔,看 起來°假哪熟似面熟似面,卡緊kā徛tī邊 a+ ê牽手講:「你 看!樹仔頂 彼兩隻 是m̄是客鳥?」
「HmǸ!大概 是哦+!你目chiu hiah金。m̄知偌久 m̄-bat看著 a+! 卡緊用khamelah kā hip 起來°!」
相片 洗好,無啥滿意,細細隻仔,閣烏烏,連家己 都看bē出來是「客鳥」.....
閣飛來tī-hia teh散步 a+!正實是一對翁仔某仔!猶原是雙雙 對對,彼呢仔恩愛,翁 行 某 tòe,漂phiat 大範 又閣高貴。chit一擺一定beh kā恁 看予斟酌,看予清楚:實在 生做誠súi,嘴pe,烏烏 尖尖,尾,長長 翹翹,白色ê腹肚,si̍t股頭 嘛chhap一寡仔白 e+ ,chhun e+,歸身軀
攏是烏色 e+。Ah ! m̄-tio̍h!看In飛 起來°才知影,si̍t ê外緣 彼排羽毛 是白 e+。tiàm半空中 phia̍t 一下°phia̍t 一下°,真正優美,真正好看!看In飛去樹仔頂 才發現,原來 In早就tī-hia 做一個足大kâi ê岫,嘛是做足懸 e+,kah我 細漢 看 著e+ 仝款。
岫 愈做愈大個(e)5,照看 beh tòa 落來°ê款 哦+! 來 哦+!來 哦+!誠歡喜恁 留tiàm chia kah阮做厝邊!阮 是誠好客(hó͘ⁿ-kheh)ê在地人,希望恁 會tàng疼惜chit-ê所在,做阮ê好厝邊,永久 釘根 落來°,kah阮相及來拍拚,建設,予咱ê鄉土 成做一個 真正有自由,有尊嚴 ê
美麗 寶島。自chit-mái起,咱 攏是家己人 a+!無愛閣叫你 是「客鳥」,應該稱呼你 是七夕 牛郎 織女 天河 相會,做好代 ê「喜鵲」!###
1995.8.8.hō-ló台文 電腦試拍. 蕭平治 Siau-Pêng-Tī.
做參考:輕聲分二種,
一種是固定輕聲,用[ °]做記號,伊ê發聲接近第三聲,卡短。例:喝 出來°,飛 起來°,sìm 一下°,好 laⁿ,mài laⁿ。
一種是隨前變調輕聲,用[ + ]做記號,伊ê發聲有第一聲,第三聲,第七聲ê變化。例:烏 e,白 è,生卵 ā,足勇 è,足懸 ē。chia ê尾音攏隨頭前音變化,簡單用[ + ]標音。
M̄管叨一種輕聲,伊ê前一字一定讀本調。本文內,特別lang3[空]一格做記號。
