彰化聯誼會kah聰敏兄永別ê 祭文：台文通訊51期

 彰化台文聯誼會kah聰敏兄永別ê 祭文：1998/02台文通訊51期

〈彰化台文聯誼會kah聰敏兄永別ê 祭文〉：

　 聰敏兄： 今仔日是1997年，咱人正月廿七，是聰敏兄你beh kap 阮告辭永別ê 日子。 Chit-kú 咱彰化台文聯誼會ê 兄弟姊妹，做夥徛tī 聰敏兄你ê 靈前beh kap你相辭，講幾句心內話，請你聰敏兄聽了會歡喜，安心做你去，tī 另外ê hit個世界保庇咱ê 台文推sak ，會得順利，開花結子。 聰敏兄，你是咱彰化台文聯誼會ê 老大兄：咱做夥嘛已經有四、五年--囉！每一擺鬥陣開講，講著台語文，攏是hiah-ni̍h趣味，充滿著理想kap希望，kiàn-nā tn̄g--著腔口無仝，抑是台文用字有爭執ê 時，你攏是誠客氣來kā 阮提出真好ê 意見，予阮對台文ê 了解一日一日精進，予咱ê 聯誼會ē-tàng一個月一個月續落去開，無去斷chām--去。如今，聰敏兄！你喝走就走，喝行就行，留落來予阮ê 是無限ê 懷念kap m̄ 甘！ 聰敏兄，你是一個有向望ê 台文先覺：平常時做夥交談，阮kio3-sī 你kan-taⁿ 趣味台語，有心teh 研究niâ-niâ ，thèng- hāu 到看著你ê 台文小說〈阿瑛啊！〉了後，才知影你ê 才情不得了。Beh十萬字ê 工程，前後五十冬ê 歷史背景kap語言，閣beh 應用純正ê 台語音來表達，對一個pún̄-chiâⁿ 慣習用華語創作ê 人來 講，是一項偌呢艱苦ê 挑戰，m̄- kú 聰敏兄你做到--a ，閣是做kah hiah-nih súi- khùi láu-tàu。勤岸兄講：「聰敏兄台文小說ê 成就，絕對會hou7 伊閣活--落來！」有影，聰敏兄，阮永遠都會懷念著你！ 聰敏兄，你是一個無求出名，腳踏實地ê 人：良光兄嘛按呢講，有影，你為著beh 推sak 台文，促進台語文字化，你無惜艱苦，南北二路四界奔波，走揣名師學台語、學聲韻、學羅馬白話字，所向望--ê 就是beh 達成：「我ê 手寫我ê 嘴」ê 台語文字化。你m̄ -nā 用嘴講，用手寫，閣為著台語文推sak ê 效率kap普遍化，無驚麻煩困難，開始學電腦，拍台文，ùi TW301學到HOTSYSR，最近閣抑kah人流行上網路，交朋友，討論台語文，你chit種熱情kut-la̍t ê 精神永遠都是阮ê 好模樣。 聰敏兄，你是一個勤快有包容心ê 人：為著推sak 台語文，你無條件提供資料，閣時常參加捧場有關台語文ê 研討抑是教學；若tn̄g--著反對ê 聲音，你攏是chiâⁿ 誠懇kap人討論，從來都m̄-bat 堅持家己ê 看法才是著--ê 。你時常講，逐家攏是愛台灣，攏是teh 推動台語文，哪著chèⁿ 來chèⁿ 去傷感情--neh？因為聰敏兄chit 款好模範，阮嘛攏學kah chiâⁿ 細膩chiâⁿ客氣。 聰敏兄，舊年你taⁿ-á ùi彰客退休落--來，才想beh àn台文路途來大大扑拼一下，siáⁿ 知蒼天無愛你hiah-nih 勞苦，煞來中途pàng-sak，實在是咱台文界ê 大損失。阮只是m̄ 甘，人生路有出發就有結束，m̄ 甘嘛著送你行，聰敏兄！你著寬寬仔行…。 　 彰化台文聯誼會全體會員敬拜