相思相思豆相思栽相思樹病相思：第五篇台文作品
相思 相思豆 相思栽 相思樹 病相思：1996/2第五篇台文作品
『紅豆生南國，春來發幾枝；願君多採擷；此物最相思。』[Hông-tō͘ seng lâm-kok，chhun-lâi hoat kí-chi；gōan kun to chhái-khiat，chhú-bu̍t chòe siong-su。] Chit 首漢文ê詩句，tī-chia ，「相思」愛讀做「siong-su」；m̄-kú，換做Hō-Ló話來講，tō愛念做「siuⁿ-si」；相思ê意思，是講兩個戀人（lôan-jîn），互相teh 思念，思念kah足艱苦--è：因為見bē-tio̍h面，kan-ta tī心肝á底gōng-gōng-á想，想kah食bē落飯，睏bē落眠；日也想，暝也想，想kah消瘦落肉，（siau-sán-lo̍h-bah ）想kah giōng-beh [快要]死--ì！
紅豆，到底是siáⁿ-mih物件？我m̄-bat看--過，m̄-kú kûn紅豆á湯ê 紅豆á，我tō bat kah有chhun--a，kûn hō͘爛爛，chham糖chham hō͘甜甜，chiâⁿ好食，一碗koh一碗，特別是熱天時，kā冰hō͘冷冷涼涼，m̄ 管i是大人ia̍h是gín-á，cha-po͘--e a̍h是cha-bó͘--è ，lóng是足愛食ê點心，別人我m̄ 知影，我ê感覺是：好食kan好食，講有siáⁿ-mih相思ê 滋味，我都食bē出--來！我看，南國ê紅豆，應該m̄ 是lán-chia ê 紅豆á chiah-tio̍h！Ah會相思--bò？tō koh-khah m̄ 知--a！連看都m̄-bat看過ê 物件，ná-ē hō͘人思念，hō͘人相思--leh?
南國ê紅豆，到底ē相思a̍h是bē相思，lán暫時mài tòa-chia pôaⁿ chhùi-gím[毌在此逞口舌之美]，Taⁿ (現在)！來講chē咱chia 一kóa-á ē hō͘人「相思」ê代誌。
Chiâⁿ [將近]百年來，台灣人上界大ê「相思」，tō是「三伯英台」chit齣戲文：khah早，庄腳teh做冬尾戲ê時，若是搬chit齣「三伯英台」，ah-lō慘--lò͘，戲棚頂m̄ 是連唱帶哭ê七字á，tō是哀怨刺人心肝ê哭調á，siáⁿ-mih大哭、小哭！台南哭、彰化哭！chiâu-chiâu搬出籠，哭kah是目屎流目屎滴；chit時陣，你若越頭將棚腳小lió--一下！mā是kāng款差無外濟，坐tiàm頭前hia ê cha-bó͘人， ta̍k-ê lóng是目kho͘紅紅，目睭tâm-tâm ，一人一條手巾，一面看，一面chhngh[抽搐]，一面拭目屎；猶有，khiā-tī 廟邊樹á腳ê查埔人--leh！m̄ 是看kah嘴á開開，tō是頭lê-lê，gōng-gōng chû-chû。（in艱苦tī心內，m̄ 敢吼--出來，m̄ 敢流目屎！）
續--落來，換來講早期台灣ê 流行歌仔，你若bat唱過，tō ē-tàng了解，tī-teh 描寫男女情愛ê歌詩，tú-tio̍h 愛情無結局時，lóng時常用hit-lō 「好花變做相思栽！」來做結尾。比較tio̍h khah現代ê講法，一般ê少年人，對tio̍h 失戀ê朋友滾笑講：「失戀--ò͘！去食hit-lō芎蕉皮ùn醋好--lah!」Hit種ê滋味，應該是酸酸澀澀，無kài-gōa好食chiah-tio̍h，是án-chóaⁿ有人會án-ne講，我m̄-bat kā研究過，m̄-kú ta̍k家lóng ē-tàng了解chit 句話ê意思，是講失戀m̄ 是好代，m̄ 是爽快ê經驗，Che又閣是另外一種ê 「相思」。
講著相思栽，tō去hō͘我想著相思á（樹），gín-á時代聽大人teh唱歌，每一pái若聽著chit句「相思栽」ê歌詩時，lóng kioh-sī（以為是）相思樹á ê 樹栽--leh，thèng-hāu大漢了後chiah了解，相思á（樹），khah àn-choáⁿ講，都bē惹得人ê 相思--mah！
相思樹，i是台灣本土上界普遍ê樹á，台灣頭到台灣尾，ta̍k四界lóng有i ê 蹤跡；除了ē使得水土保持以外，上大ê路用，tō是燒火炭，是早期台灣真正重要ê經濟作物。永過，莊腳人去山內khioh柴，khah好膽--ê（人），lóng-ē偷偷á剉幾oe相思á箍，kā藏tiàm柴擔內面，àn-ne chiah bē 去hō͘巡山--e掠--著。相思á柴真好hiâⁿ（灶內燒柴煮食），tī 庄腳人ê心目中，是一種上寶貝ê火柴（m̄ 是番á火--ō͘ ）。過年炊甜粿，若有淡薄相思á柴thang好hiâⁿ，ah he m̄ 知beh loā-nih歡喜，loā-nih hiau-pai--leh[那不知有多高興，多得意呀！]！
十六七冬前，kah人流行早起時á peh山ê運動，Chhân-tiong-ng（田中）東旁，鼓山寺後壁hit支山，尖峰，紅嶺á，薑á園，ta̍k四界lóng有goán翁bó͘ ê腳跡。Hit時陣，peh山ê人khah少，山路無整理，ham-ham-khia̍t-khia̍t （崁坷不平），無kài-loā好行，若beh peh-chiūⁿ尖峰，定著愛行一步，躡一步，躡kah是喘phīⁿ-phēⁿ，汗流sám滴；落崎時，koh-khah pháiⁿ行，半跳á半chhū，不時mā tio̍h借路邊ê 樹á tàu相共，借giú--一下，ia̍h是小擋--一下，peh kah是足趣味，足心適--ê；腳步有緊有慢，有時大ho̍ah行，有時細步走，親像tī-teh跳làng-suh；人若歡喜，心情一下輕鬆，ta̍k-ê人koh ná親像gín-á kāng款，有ê大聲喝i-o，有ê 快樂念歌詩，滿山遍野ê相思樹，chiah-nih大叢，chiah-nih大箍，lóng-mā同齊跟goán做夥歡喜，做夥lio̍k-thiòng （樂暢）過日，siáⁿ-mih叫做「相思」，goán都m̄-bat 。
Hit當時，每一pái歇睏日，鼓山寺後壁，tō是goán一家夥á人做夥做夢ê好所在，特別是學生gín-á歇熱hit-chām ，ē用得講，ta̍k日下晡四五點á腳兜[左右]，goán lóng-ē來chia chhit-thô，散步，走相掠，ia̍h是匿相chhōe。時間一下久，每一叢相思樹，lóng有goán父kiáⁿ關心ê感情tī內底，goán時常頭lê-lê，輪流kōaⁿ水灌肚猴，有時頭殼kek khiàn-thian khiàn-thian，（看天kek gōng-gōng ）為著beh chhōe蟬á ê叫聲是對tó位來--ê，頷頸á是taⁿ-kah giōng-beh斷去，m̄-kú goán lóng bē感覺艱苦，酸痛，因為chit時陣ê鼓山寺後壁，kui山坪lóng是sia̍k！sia̍k！sia̍k！sia̍k！蟬ê叫聲，鬧熱滾滾，歡喜tang-tang，goán ê心內，自àn-ne tòe leh青春消遙自在。你m̄-thang講i噪人hīⁿ（耳），吵死人，hit-lō聲音，是lán chia 熱天時á，上kài好聽ê歌聲，i會消人ê火氣，chhōa人去「清涼地」，hō͘人聽著「心涼脾肚開」，有活力，有元氣。
有幾nā pái，goán父á-kiáⁿ真正是siáu kah無尾溜--ì，soah bē記得時間ê流轉，sńg [玩]kah黃昏日頭落海，giōng-beh無看見人面，chiah 想著愛落山轉去食飯歇睏。有一遍，iū-koh sńg-kah傷晏，無張持tī一叢上大叢ê相思á樹腳，看著兩三粒石頭á，tī土腳兜hia teh振動，感覺誠奇怪，àⁿ落去kā看māi--leh，原來是三隻蟬舅[蟬之若蟲]，tú-tú-á ùi塗孔內bùn--出來！好--nò͘！kah是lán chiah有緣，我tō請lín來goán兜行--一chōa！
食暗頓時，kā牽手kap四個gín-á講：「eng暗，lán來看蟬teh褪殼，真好看--ō͘ ！」tú-tī國校讀冊hit四個gín-á，lóng chiâⁿ歡喜，chiâⁿ有趣味teh thèng候chit場ê大表演：hit一暝，kui家人lóng看kah無nih目，十二蕊目chiu金khok-khok，ùi九點看到十二點，koh ùi 十二點看到半暝二點外；從蟬舅「蟬定」m̄ 振動開始，到腳脊phiaⁿ pit-sûn準備褪殼，然後倒翻身搖kha-chhng花，一直到「金蟬脫殼」；自幼chíⁿ ê淺綠色變成烏hu色（灰色），si̍t股頭轉硬，最後成做一隻活lèng-lèng ê「蟬」，goán lóng看kah chiâⁿ斟酌chiâⁿ詳細。……
天光日，goán將昨暝hit三隻蟬chhōe--出來！koh-chài欣賞--一ta̍h久，chiah叫三個大漢--ê，一人一隻，掠到門腳口，由我喝一聲「手！放！」 隨時phu̍h！ phu̍h ！phu̍h！thián翼飛向天頂，自由自在chhōe in ê夢去--lò͘！自àn-ne，goán一家口á就kah鼓山寺ê相思林，結了真正深 ê緣份。相思樹--à！相思樹！你！真是惹得goán父kiáⁿ ê「相思」--à！
跟隨著時間ê流轉(liû-chóan )，gín-á一日一日大漢，ban-á-kiáⁿ mā已經讀國中--a，學校功課ê催迫，為著beh追求in khah大khah súi ê未來夢，只好暫時放棄消遙自在ê生活，投入升學競爭ê陣線。不過，goán翁bó͘猶原kāng款繼續早起peh山ê習慣，鼓山ê相思樹，iáu是kah khah早kāng款，kah goán歡喜鬥陣，春夏秋冬，一工過一工。
1984年熱--人，一場風颱將goán田中地區，掃kah是東倒西歪。Chit場風颱真是怪奇，人風颱beh來，lóng mā是ùi台東，ia̍h是屏東恆春一帶登陸，偏偏你chit ê「韋恩」，狡獪(káu-kòai )十足，相準準，ùi西台灣濁水溪口peh--起來，巡著濁水溪ê 溪埔á，一路無坦無截(bô-tháⁿ-bô-cha̍h )，可憐，田中附近ê平洋，ná擋會tiâu風速二三十米ê蹧躂損斷--neh！
果然無m̄ 著，隔轉工，peh-chiūⁿ四樓磚棚á，giâ目一看，田中街路ê招牌，石棉瓦厝頂，已經是掃kah破sàm落地，離離落落(lî-lî-lak-lak )。koh將目chiu看khah遠--一點à，鼓山寺hit旁，歸ê山頭，ká-ná親像臭頭lak頭毛kāng款，本成是烏sì-sìm ê山坪，突然間soah變成一chhop 一chhop，黃黃赤赤ê塗面，看著實在chiâⁿ m̄ 甘，ná-ē bē hō͘人傷心怨嘆！
風颱過了無幾工，goán koh去鼓山運動。
「夭壽--ò͘ ！ná-ē掃害kah án-ni-siⁿ？」一位大嚨喉孔ê查某人，大聲喝--出來：「Lín kā 看，連chit叢上大箍ê相思á，mā坳做二ko̍eh！(截)」
伊ê同伴應講：「有影bô-chhái，倒tī塗腳兜chit叢，上少mā有五十冬--a！ē記得少年時陣，來chia khioh柴(拾柴)，tō已經兩三人懸--ā ，無疑(誤)，一場ê風颱soah來hō͘你無命，實在有夠hiau-hēng(不幸)！」
Tòe-tī後壁ê一位老阿伯mā怨嘆講：「ah chia-ê細叢--ê是beh聽候(thèng-hāu )到tī時，chiah有法度大kah chiah大叢chiah 大箍！」.....
聽tī耳孔邊，痛在心肝íⁿ-á，chit叢m̄ tō是早前chhōa gín-á來chia掠蟬，灌肚猴，匿相chhōe，siōng-kài熟似上hō͘goán數念(siàu-liām )ê相思á公--kong？
「Heⁿh m̄！」我帶有淡薄心酸，目箍有淡薄á紅，giōng-beh講bē落--去：「敢chiah àn-ne niā-niā！lín kā看，kui山坪kui坑溝，m̄ 是斷tō是倒，mā有hit-lō͘ .....hit-lō͘ ...khi一旁--ē！」
真是一場ê大災劫，一場ê天災地變，soah將頂oe前輩公祖，放hō͘ lán ê 天然資產，掃kah giōng-beh ta-tin--ì [快要斷根]，mā留hō͘ goán翁bó͘無可奈何ê「相思」。
災後，山路pháiⁿ行，有一大chat日子無去peh山。大約是四個月後，有一工，tī三樓磚棚á看對鼓山ê山坪：ê ~！奇怪！山型ná-ē無siáⁿ kāng款？好親像teh開路--ō͘ ！落樓梯，隨時踏發o͘-tó͘-bái，無khah kā牽手講--一聲，tō駛向鼓山寺；真正去hō͘我ioh-tio̍h [猜著]，是teh開路，m̄-tio̍h！是teh整路。Ŏ͘！原來是beh載柴用--ê，風颱樹á，已經剉kah滿la̍k-kak-sak，橫倒雜隔kui塗腳[橫七豎八，滿地都是]。
Peh-chiūⁿ山頂，想beh斟酌看khah詳細--leh！『我的天啊！』ná-ē àn-ne？實在夭壽！真正是斷點焰(tn̄g-tiám-iām )清氣溜溜，斷oe倒頭--ē剉了了，連風颱掃無著，chhun留--落來ê幾叢老頭--ê，mā活活剉tàn-sak。Mài講是兩三尺面，已經四五十冬 ê老樹，剉kah孤khu̍t，tō是十外年，二三十年，chiâⁿ尺面大--ê，mā chhun無幾叢，Che ...che是「人禍」--à！.....
將近beh十冬--a，goán猶原三不五時轉去鼓山寺後壁，行行看看--leh，peh山ê人愈來愈濟，尖峰，紅嶺á，是愈來愈鬧熱；為著「普度眾生」，山路已經是一崁一崁ê紅毛塗路(水泥路)，路邊有chhāi欄杆，安路燈；歇睏有涼亭，有柴椅thang坐，koh有好心ê人泡茶hō͘人lim [喝]；愛唱歌ê朋友，七早八早tō有khah-lah O K展歌喉。你敢想會到？chit-mái ê鼓山寺，已經m̄ 是以早ê鼓山寺--lò！chit-mái ê鼓山寺，是kui山坪滿坑溝ĺong是人聲kah歌聲，ta̍k-ê人lóng是笑bún-bún，hiah-ni̍h心適，hiah-ni̍h歡喜，hiah-ni̍h無憂愁。
心適歸心適，無憂歸無憂，peh山ê鄉親，peh山ê朋友，請lín ta̍k家暫停腳，小歇睏，goán想beh kā lín小探聽，相借問：
「Lín！m̄ 知bat看著，已經tī-chia tòa過五六十冬ê老朋友----Hit-lō生做chiah 大叢chiah大箍ê老相思á樹--bò！！！」.......
越頭看Siau Lah-jih ê 台文路：
1994/5/15初稿寫好。
1995/8/1試拍電腦定稿。
感覺誠歡喜，多謝彰化.張聰敏兄.提供.鄭教授.ê TW301軟體.予我學。
嘛感謝鄭良光兄.ê 提示，才知影電腦.拍Hō-Ló 台文.ê 好處。
猶有，賴彥君先生.對TW301 ê 指導，我ê 後生.亦哲.教我電腦.ê 使用，攏一時間.予我.無閒--起來，無閒kah 足歡喜.koh 足少年--ē ，感謝In .兩個.少年--ē ！
做參考:
輕聲.分二種，一種.是固定輕聲，伊ê 發聲，誠sêng 第三聲。
例:食bē--出來！會相思--bò ？轉--去！好--là ！
另外一種.是隨前變調.輕聲，伊ê 發聲.有第一聲，第三聲，第七聲.ê 變化。
例：有伸--a ，讀國中--a ，查埔--e ，查某--è ，心適--è ，叨位.來--ē ，平治--ē 。
Tī-Chia ，攏總用(--)記號.標出，(--)ê 前一字.讀本調，(--)ê 後面.是輕聲。
另外，本文.ê 拍字，除了標點符號.以外，tī 字.kap 字，詞.kap 詞.ê 中間，有加一點[.]，che .是「音界符」，tī [.]ê 前一字，愛讀本調，che .對初學Hō-Ló 台文.ê 朋友.有真大.ê 幫助。
Che .是ùi 洪惟仁先生.ê 台語.經典笑話.內底.學--來è 。
2000年整理時ê 感想：做文化khang-khòe ê 人，攏真雞婆，攏會食好tàu 相報，bat 一sut 仔別人m̄-bat--ê ，就那得著寶貝共款，一直beh kā 人教，無管伊會hō͘ 內行人笑--無？（ Lah-jih ）
