囡仔時代ê遊戲_1951年代ê記智

 囡仔時代ê遊戲：十四篇1951年代ê記智

 

一、20110905_滾地龍ê年代 1951_Lah-jih

1951~1956年代，uì 10歲讀國民學校四年級到六年牛仔班出業，koh去讀補習班1年，到讀初中一年，大約有5年久ê時間，是人生上快樂上無煩惱ê年代。7歲進前，生活箍仔限制tī家庭、厝邊隔壁，記智無濟，讀冊了後，行出庄外到學校，tī教室有同學互動，開始有朋友交陪，總--是環境生疏，年紀猶細，kan-nā下課10分鐘ê thit-thô，放學後to̍h無sio-chhoē，「一年仔khong-khong」是因為初入學堂，逐項代誌攏m̄-bat koh hò͘ⁿ-hiân，m̄-chiah ē「一年仔生放屎糊房間」，gōng-àⁿ-àⁿ，hoan-pì-pà，逐項規矩tâⁿ開始學，二、三年級ê時，ē-hiáu跟toè高年級大漢囡仔thit-thô，看in sńg ng-ko̍k雞、phah-kan-lo̍k、bih-sio-chhē、跳索仔、拍球、跳箍仔…算bē-liáu ê趣味心適。

進入四年級，ùi庄腳第三國民學校徙去街路第一國民學校kap街路囡仔kap-tīn，崁頂~街路、街路~崁頂，一日4-choā行踏，攏是ná行ná sńg，掠田嬰、灌tō͘猴，沿路行石頭仔沿路踢，愈來愈狡怪chok-gia̍t，愈來愈ē-hiáu sńg，囡仔黨mā愈結愈大群，ē-hiáu sńg ê齣頭愈來愈濟，liàn lián-á(箍仔)、ī 醃缸仔、じんとり(陣取り/囚徒基地)、tiak珠仔ī 挽菜(バンザイ)、siàn牌仔、ī鼠牛虎兔、行金瓜棋、行參(som)、虎豹獅象…應有盡有，hit-chūn逐个攏褪赤腳罕得穿鞋，塗腳真少khōng紅毛土，mā無he點仔膠，m̄-sī牛車溝to̍h是石頭仔路，啥物叫做tiam，啥物叫做歹行，啥物叫做烏，啥物叫做lah-sap，攏無leh sìn-táu，m̄是走ná飛to̍h是像狗塗腳爬，有ê sńg kah烏鬼鬼，有ê拚kah汗流sám滴，塗腳to̍h是阮ê 戲棚，塗腳to̍h是阮ê天地，落地掃，ká來滾去，若無冤家若無相phah，大人罕得干涉趕開。

古早崁頂人真pháiⁿ真ok，he是對外，崁頂庄內家己是真和真團結，m̄-chiah厝邊隔壁ê囡仔lóng-ē sńg做伙，tàu-tīn thit-thô，庄頭闊，人mā濟，分角勢難免，有時陣mā是常常ē kap做夥。崁頂庄有幾个號名地標，公埕、公井、榕仔腳、竹圍仔、荖宅仔、頭前庄、後壁厝、柑仔園、瓦厝底，地標以外to̍h用人名做位置，耀輝--ē in-tau，慶良--ē in-tau，朝木--ē in-hia…，講著人名，kui庄人互相攏相bat，án-ne boeh約定boeh sio-chhoē攏真方便koh確定，上捷滾地龍ê所在是Lah-jih--ē in-tau瓦厝底，放學轉來到半路，一聲「Lah-jih--ē in門口埕」，一定ē有3、4个5、6个來報到，自由自在ê囡仔時代，真正使人懷念。

 

二、20111014_搧牌仔          1951_Lahjih

1953下半年升起去六年級，是讀冊時代上hòng ê一年，因為厝內散赤無錢，阿爸一句「ā有法度」決定無boeh考初中，to̍h án-ne hông編入牛仔班。放牛食草ê囡仔，1工讀無3節課，宿題koh少，無升學壓力， kui工閒仙仙，hō͘-lí-hō͘-sō͘，m̄是thit-thô to̍h是sńg，hit-chūn好sńg ê齣頭kài濟，有時hong che、有時hong he，常常sńg到著hō͘大人叫boeh做工課、叫boeh食飯chiah知thang soah。下面先來紹介2種sńg牌仔ê thit-thô。

尪仔標是後來chiah有ê牌仔，半世紀前台灣物資相當khoeh(缺)，字紙、紙枋oh-tit提，阮ê牌仔to̍h是kā紙枋鉸做大約長5 公分、闊3.5公分ê四角形紙牌仔，有人鉸kah四正四正súi款súi款，有人鉸kah ná狗gè--è，oai-ko-chhi̍h-chhoa̍h，紙枋好bái mā差真濟，m̄-koh逐个攏無計較，有thang sńg to̍h好。

A-pêⁿ、Ka-tēng--ē上hèng-sńg，又閣來招boeh sńg牌仔。

「Boeh用搧--è抑是boeh用跋--è？」

「用搧--è！」A-pêⁿ手--裏提1-thōng牌仔，hèng-chhih-chhih一直chhap一直lāng。

「好！1人2支，開始じゃんけん(猜拳)」A-pêⁿ、Ka-tēng--ē、Lah-jih kap A-ba̍k、A-chiàng 5个10支已經khǹg-tiàm土腳，poē手結果，A-chiàng先搧。

A-pêⁿ kā 10支牌仔疊疊做1-thōng，拗sêng 一个厝蓋「^」形，khǹg-tiàm土腳，然後四箍輪邊lia̍p-lia̍p tah-tah--leh，m̄ hō͘牌仔有làng縫，「好--à！A-chiàng，開始！」

A-chiàng 家己提1支牌仔--出來，仝款拗chiâⁿ厝蓋「^」形，koh-tī四个角小可拗am-am，馬勢chhek hō͘在，正手提牌仔，大pû翁tī下爿，kí-cháiⁿ、中指、藥指tī面頂，手giâ-koân、人àⁿ-àⁿ、腳khut-kē、頭lê-lê，用力對牌仔邊土腳搧一下，1-chūn風 掃，kǹg入牌仔下腳，「oă！」kan-nā 1支牌仔飛落地，可惜無péng-pêng，無贏到半支，換Lah-jih。

A-pêⁿ koh kā 10支牌仔疊疊做1-thōng，拗sêng 一个厝蓋「^」形，khǹg-tiàm土腳，然後四箍輪邊lia̍p-lia̍p tah-tah--leh，m̄ hō͘牌仔有làng縫，「好--à！Lah-jih，換你！」

Lah-jih仝款家己提1支牌仔--出來，仝款拗chiâⁿ厝蓋「^」形，mā-tī四个角小可拗am-am，伊先四箍輪邊看看--leh，選一个牌仔腳有小可仔làng縫ê角度，馬勢chhek hō͘在，正手提牌仔，大pû翁tī下爿，kí-cháiⁿ、中指、藥指tī面頂，手giâ-koân、人àⁿ-àⁿ、雙腳khû-kē、頭lê-lê、倒手khoè-tī腳頭u，輕輕用力對牌仔邊土腳搧一下，1-chūn風掃，kǹg入牌仔下腳，牌仔坦笑péng 4支，Lah-jih現贏4支，chhun 6支。換A-ba̍k。

A-pêⁿ koh-chài 1擺整理牌仔，「好--à！」

A-ba̍k牌仔提--起來to̍h搧，siòng無準，搧著牌仔，著罰賠1支，6支變7支，換Ka-tēng--ē。

A-pêⁿ koh-chài 1擺整理牌仔，「好--à！」

Ka-tēng--ē kap Lah-jih仝款是高手，伊siàu想7支總báu，to̍h四箍輪邊ta̍uh-ta̍uh-á siòng，馬勢khut--落去，正手提牌仔giâ-koân-koân，用伊特技搧--落去，講也奇怪，牌仔to̍h是聽伊ê，7支chiâu-chiâu péng坦笑，A-pêⁿ gāng-gāng嘴仔開開…

「換A-pêⁿ！」A-chiàng大聲喝。

「Khàu-iau，mài滾笑！好膽koh來ī--一擺！」

5个人koh ī一擺，A-pêⁿ仝款輸kah土~土。

A-pêⁿ hit-thōng牌仔無輸kah ta-tin m̄願soah，伊koh招：「無 咱來換sńg poa̍h--è！」

「好！驚siáⁿ-siâu！」

講--著boeh用poa̍h--è，5个人隨時圍1-kâi圓箍仔khû--落去，1人出1支khǹg tī土腳，開始石頭、鉸刀、紙poē輸贏，2个2个poē，poē贏--ē kap poē贏--ē poē，贏--ē chiah-koh kap Lah-jih poē，最後A-chiàng贏，A-chiàng開始〈點老點叮噹〉：

「Tiám-ló tiám tin-tong，chiâ pàng-phùi，chhàu-kha-hong。」A-chiàng ùi家己先點，chiah按倒se̍h順序點，點到chhàu-kha-hong ê「hong」時，tú好點著伊家己，A-chiàng先poa̍h。

A-chiàng kā 10支牌仔khioh-khioh thōng-thōng拗拗--leh，用3支指頭仔提起，大pû翁kap中指夾2爿邊a，kí指tam-tiàm牌仔中心，親像chit-mái leh拍電腦chhi̍h niau鼠仔án-ne，輕輕提koân，然後摔落土腳，bē使得偷食步用péng--è，結果1支péng坦闔，9支猶原坦笑，A-chiàng贏1支，chhun 9支，換khû-tī A-chiàng倒爿ê A-ba̍k。

A-ba̍k kap A-chiàng仝款，提起來to̍h摔，péng 2支，歡喜kah：「án-ne bē輸--a！」

Koh來換A-ba̍k隔壁A-pêⁿ摔，A-pêⁿ kā牌仔提起來大大摔一下，摔kah散phún-phún，1支1位，7支牌仔to̍h是無1支是ka-lián-phak--è。

Koh來輪著A-pêⁿ隔壁ê Lah-jih，伊 7支牌仔khioh-khioh--leh，按照大細支thōng做伙，大支tī下面，細支khǹg頂面，koh拗拗、lia̍p-lia̍p、tēⁿ-tēⁿ--leh，仝款3支指頭仔提--leh，輕輕sìm 2下，sìm到第三下輕輕tàn落地，chiâⁿ怪奇，7支牌仔chiâu-chiâu péng-liàn-tńg，koh疊疊做1-ē，7支牌仔攏總Lah-jih ê。

「Lah-jih--è，你ná-ē chiah-ní khiàng！」

「Boeh學--bò͘？kā恁教！」逐家真歡喜攏講「好！」。

「看hō͘好，看hō͘清楚，牌仔khioh-khioh--leh，按照大細支thōng做伙，大支tī下面，細支khǹg頂面，koh拗拗、lia̍p-lia̍p、tēⁿ-tēⁿ--leh，仝款3支指頭仔提--leh，輕輕sìm 2下，第三下著斟酌，ài輕輕仔tàn，tàn了手ài kiu倒轉來，像án-ne…」Lah-jih ná講ná比：「tàn--落去，kiu--轉來」，péng 5支，2支無péng：「koh一擺」。

…「輕輕tàn--落去，kiu--轉來」，有khoàiⁿ--bò͘，7支kui疊總péng--過來。

「我試看覓！」A-pêⁿ hèng-chhih-chhih，可惜掠無訣頭，7支好好猶原睏坦笑。

Ka-tēng--ē、A-ba̍k、A-chiàng 1人試1擺，to̍h是無法度一擺7支總péng。Ka-tēng--ē m̄-sìn-siàⁿ koh試一擺，m̄知是好運抑是掠著訣頭，這擺7支總péng。

「Sìm 2下，tàn--落去，kiu--轉來chit種幼路步數，需要khoaⁿ-khoaⁿ-á來，加試--幾遍à to̍h ē-hiáu！」逐个peh--起來無koh再sńg，準備隨人boeh回家。

「Lah-jih！你ná-ē ē-hiáu chit步撇步！」Ka-tēng--ē chiâⁿ有趣味。

「あとびき顛倒giú，chit句話恁bat聽過--bò͘？阮四兄教chit步實在真有效。慢慢仔試to̍h知影，lah！牌仔還--恁，後擺chiah koh ī。」 Lah-jih＿20111016

 

三、20110908_踢銅管仔bih-sio-chhoē  1951_ Lahjih

講「tâng-kóng-á」，其實m̄是銅做--è，是鉛鉼做ê罐頭管仔，王梨罐頭、楊桃罐頭tī hit-ê時代是khah-chia̍p買來送--人è，送he老大人抑是破病人，khah少o͘-se送he大人(tāi-jîn)， m̄-chiah罕得chhoē-tio̍h 1-kâi 2-kâi，看頭好--è hō͘大人(toā-lâng)提去做米管(kńg)，查某人煮三頓tio̍h用，kā厝邊阿姆、阿嬸借米mā-tio̍h用，生做pháiⁿ看樣--ē tio̍h送hō͘囡仔做寶貝，提來lok銅錢仔、lok珠仔、鉛筆、lù-á，上大ê用途to̍h是提來ī「踢銅管仔」。

「踢銅管仔」是「bih-sio-chhoē」ê一種，好sńg、趣味、兼運動，斯當時門口埕闊莽莽，分頂埕kap下埕，頂埕m̄是曝粟to̍h是nê衫、io細漢囡仔，抑是撚楊麻、牽楊麻布紗ê所在，tī-hia chông來chông去大人ē罵，下埕kan-nā埕尾厝角有1-pû火pû仔，chhun--e在你sńg在你滾。拜六下晡、禮拜日ē-tàng sńg，逐工放學後ê時間共款招leh sńg，2个、3个，5、6个，甚至10个mā會使得，上好sńg是5、6个。

「A-ba̍k！A-chiàng！A-pêⁿ！咱來ī踢銅管仔好--bò͘？」

「好--ā！」A-chiàng隨時轉去提銅管仔，順紲koh招A-bí、Ka-tēng--ē來參加。

先tī下埕中央畫1-kâi圓箍仔，銅管仔khǹg圓箍仔內面khǹg好勢，Lah-jih kā倒手gia̍h-koân，手蹄仔thián開開，chham家己6个人，1人伸1支手，4指tēⁿ--leh，伸hit支kí-cháiⁿ(指指)tiàm Lah-jih ê手蹄仔下腳：

「ng-ko̍k雞，走白卵，隨你食，隨你nǹg(鑽)，niau鼠仔囝bih密密，niau鼠仔母去做賊，boeh走你to̍h走，m̄走你to̍h kèⁿ  kèⁿ  kiŭ~」

一聲「kiŭ」boē-soah，各人ê手各人kiu，啥人反應慢鈍，kiu了傷慢hō͘ Lah-jih chang--tio̍h，伊to̍h做鬼準備掠人、chhoē人。

Chit-pái掠著A-pêⁿ做鬼，Ka-tēng--ē講：「銅管仔hō͘我踢，恁m̄免siuⁿ緊走，chit-pái定著boeh kā踢hō͘ hn̄g-hn̄g-hn̄g(遠)，咱做咱khoaⁿ-khoaⁿ-á行來去bih！」

Ka-tēng--ē ùi圓箍仔後退4步，『預備~開始！』伊半行仔半走1  2  3  4「踢」一下對大門口燈籠花籬笆hia去，A-pêⁿ趕緊jiok去khioh銅管仔，等伊khioh轉來圓箍仔內面，逐个已經bih kah無khoàiⁿ人影…

「A-ba̍k--ō！你bih tī tó位--ō？Lah-jih--è ò！你bih tī恁灶腳--ho͘ⁿh！」A-pêⁿ ná 唸詩ná喝咻ná chhoē人，iā-boeh chhoē人iā-boeh顧銅管仔，m̄敢走siuⁿ-hn̄g，忽然間，A-ba̍k ùi埕尾畚間內面chông出來，A-pêⁿ 趕緊走轉去顧銅管仔，「A-ba̍k！出--來！」2人4目sio-siòng，A-ba̍k boeh去踢銅管仔，已經bē赴，算是àu-sái出局，只好乖乖徛tiàm邊--a看人sńg。A-pêⁿ koh去chhoē別人，「Ka-tēng--ē！你bih tī灶腳--ō？我有khoaiⁿ--tio̍h！」Ka-tēng--ē大條呆tham頭大聲hoah：「A-pêⁿ你烏白ioh！」iū-koh 2人4目sio-siòng，「Ka-tēng--ē！出--來！」A-pêⁿ 實在chiâⁿ-khiáu，koh chhoē-tio̍h第二个，Ka-tēng--ē àu-chuh乖乖行--出來！

Chit-pái A-pêⁿ真厲害，真緊to̍h完成任務，逐家會會--leh 講boeh-koh sńg一擺，隔壁Ka-hiông--ē tăⁿ到，mā參倚來sńg：

「ng-ko̍k雞，走白卵，隨你食，隨你nǹg(鑽)，niau鼠仔囝bih密密，niau鼠仔母去做賊，boeh走你to̍h走，m̄走你to̍h kèⁿ  kèⁿ  kiŭ~」

一聲「kiŭ」soah，iū-koh是A-pêⁿ做鬼，銅管仔踢出去了後，ta̍k-ê相爭走，相爭bih，A-pêⁿ mā一直chhoē，chhoē-tio̍h A-chiàng A-ba̍k Lah-jih--è，A-pêⁿ一个失覺察，hiông-hiông Ka-hiông--ē chông出來kā銅管仔踢出去圓箍仔外，A-chiàng A-ba̍k Lah-jih--è to̍h sûi-koh走去bih，害A-pêⁿ têng-koh chhoē一擺，A-pêⁿ 一直chhoē一直hiu，真久攏無動靜…

A-pêⁿ hèng做鬼，tiau-kang m̄ kiu手，放leh hō͘人掠，chi̍t擺逐个會齊bih-tiâu-tiâu，m̄ hō͘--伊chhoē--tio̍h，害A-pêⁿchhoē足久，chhoē無半人，chhoē-kah 起àu-siâu，「無ài sńg--à lah！」越頭boeh離開…

「Ka-hiông--ē！轉來食飯--ā！」有人leh叫食暗頓，Ka-hiông--ē ùi阮灶腳出--來，「Boeh轉去食飯--ā！」其他ê人toè leh出--來，自按呢soah鼓無ī，隨人轉去洗面、洗腳、食暗…

想起細漢時，一日到暗sńg bē-soah，有人放學轉來to̍h先kā宿題寫好chiah去thit-thô，A-pêⁿ Ka-tēng--ē是先sńg chiah-koh講，等暗頓食飽已經暗眠摸，番仔油燈phú-phú-á光，點久真siong油，m̄-chiah天光日去學校，in 2人一定hō͘老師拍腳倉，因為「宿題無寫」。

踢銅管仔ng-ko̍k雞，相招bih-sio-chhoē，

做鬼掠人四界chông，m̄-chai bih tī toeh，

阿姆房間門扇後，隨人烏白bih，

3-chhoē 4-chhoē攏掠--著，鬼仔換人做。

Koh有一年熱天，暑假ê日子，日頭特別長，下晡5點goă，日光落軟，涼風微微，boeh chiâⁿ十个囡仔伴，滾來到清水--ē in門口埕，嬉嬉嘩嘩ki-ki-kā-kā，有人跳箍仔，有人跳索仔，mā有人chhāi tī gîm-chîⁿ腳開講，ná-chhiūⁿ leh參詳siaⁿh？無外久，有人講boeh ī bih-sio-chhoē，這擺A-chiàng無來，soah無人有銅管仔thang踢，A-bêng講無要緊，咱用門口埕hit个鼓亭笨做「主」，做鬼ê人家己用手ng目睭算到十to̍h好。

「ng-ko̍k雞，走白卵，隨你食，隨你nǹg(鑽)，niau鼠仔囝bih密密，niau鼠仔母去做賊，boeh走你to̍h走，m̄走你to̍h kèⁿ  kèⁿ  kiŭ~」

一聲「kiŭ~」soah，掠著Kok-ke-á做鬼，Kok-ke-á雙手ng目睭，phak tiàm鼓亭笨開始算：「1  2  3  4  5  6  7  8…」一tīn囡仔已經bih到無khoàiⁿ人影，「9  10」，Kok-ke-á目睭peh金niau-niau siòng，看he清水--ē in-tau灶腳kap人客間仔，順良--ē in-tau ê大廳，猶有下埕Jīm-sîn--ē in厝後…ē-tàng bih ê範圍闊，鼓亭笨koh大粒，真oh顧，Kok-ke-á kan-nā tiàm鼓亭笨四箍輪邊徙來走去，經過boeh chiâⁿ十分鐘無動靜，Kok-ke-á soah坐tiàm塗腳歇睏，chit時A-pêⁿchông出來boeh ji̍h「主」，無張持poa̍h 1-倒去hō͘ Kok-ke-á掠著第一个，紲落去A-ba̍k、ka-tēng--ē、A-bí mā thiau-kang走出來ho͘ 伊掠，後手猶有Siang-kóng--è、Lah-jih、Kok-gān、Liâng-chhun 4个m̄知藏tī tó位，A-ba̍k、ka-tēng--ē家婆kā tàu chhoē，「Siang-kóng--è 出--來lah！」「Lah-jih--è 出--來lah！」hō͘ in 3叫4叫soah攏攏chông出來hō͘鬼掠，結束chit場『遊戲』。

「â！鼓亭笨siuⁿ大粒真歹顧，也無好sńg。」Kok-ke-á面仔àu-tu̍h-tu̍h。

「人阮有kā你tàu-chhoē，mài受氣--lah！」

「無！咱koh來sńg一遍好--bò͘？chit擺咱掠2个做鬼，1个顧主，1个去chhoē，按呢好--bò͘？」A-bêng有影鬼頭鬼腦gâu變竅，想著chit步，照看bē-bái sńg chiah-tio̍h。

「ng-ko̍k雞，走白卵，隨你食，隨你…」

囡仔時代好sńg ê齣頭真濟，ng-ko̍k雞，踢銅管仔，會使得sńg kah烏白chhng、烏白bih，親像chit擺sńg ê所在tī清水--ē in門口埕，西爿正身是順良in兜，北爿隆旗kap清亮--ē，南爿護龍頭是清水--ē in兜，護龍尾to̍h是壬辰in瓦厝，厝前厝後thèng-á bih，灶腳、間仔thèng-á bih，tio̍h是Siang-kóng--è in ī--ā、Kok-gān in阿嫂房間，共款chhng來chhng去bih-tiàm hit內底，無人加講話，逐个攏是厝邊，逐个攏是家己(族親)，厝內mā無啥物貴重thang提，米甕仔有米，眠床腳有蕃薯，tio̍h是上重要ê安慰。Hit種靠俗ê厝邊隔壁kan-nā庄腳散赤人庄頭chiah有，街路人to̍h無，chit-má ê時代koh-khah免講，實在chiâⁿ懷念。

 

四、20150125_摔塗炮----庄腳囡仔thhit-thô-mi̍h         1951_Lah-jih

摔塗炮(siak-thô͘-phàu)是較早庄腳囡仔thit-thô-mi̍h，lóng是家己做。捏塗耍塗是查埔囝仔較hìng sńg，阮tau厝腳田，田塗真黏真軟糗(nńg-khiū)，時常招囡仔伴做伙捏塗耍塗炮，sńg kah田塗bak kah規身軀，chit種thit-thô方式，街路囡仔、都市囡仔可能連看都m̄-bat看過，算是都市sông。

chit-má書局文具店攏有leh賣樹脂塗(chhiū-chi-thô͘)、陶塗(tô-thô͘)，boeh耍chit款塗炮(thô͘-phàu)to̍h無問題，mā真方便真清氣相，老師ē-tàng教學生囡仔做看覓，拜托老師用母語說明，較有在地味。

陶塗(tô-thô͘)較好耍，摔--起來khah-ē破孔。

樹脂塗(chhiū-chi-thô͘)siuⁿ韌，摔--起來khah-bē破孔。

1、捏塗炮：準備陶塗(tô-thô͘)一丸，捏成像圓桶形，桶底平平薄薄m̄-thang破孔。

2、摔塗炮：捏好khǹg-tiàm手蹄仔心，然後雄雄kā手心píng向平平桌頂抑是塗腳，用力siak落。

3、秘訣：按怎做？按怎摔？chiah摔ē大孔，需要經驗，家己耍家己經驗。

4、耍塗炮：1人只好家己耍。2人以上ē使得比賽，看啥人摔較大孔，細孔--e著kā大孔--e補孔。

W.b. Chen回應：這阮做囡仔的時陣嘛有耍過。往往閣愛撋塗咧，挖著的塗若傷焦傷韌，愛透一寡仔水；若傷澹傷軟，就愛摻一屑仔焦塗粉，共做伙撋予拄仔好韌度，袂傷tīng嘛袂傷糊。按呢po̍k落去，才會破較大空，而且邊仔的形猶佇咧；嘛袂像漉糊仔糜按呢，袂啥會破，soah規片糊佇塗腳，毋成形。佇庄腳做囡仔，加足好耍，chhit迌物攏愛家己做，毋但這項爾。往擺做囡仔啦。這馬嘛無啥有正港的庄腳矣，啊若囡仔咧耍的物，生理人soah攏做便便矣。時代無仝矣。

 

五、20110925_跳箍仔kap拍球         1951_Lah-jih

跳箍仔（Thiàu-kho͘-á）to̍h是華語講--è『跳房子』，拍球（Phah-kiû）華語講『拍球』，m̄是『打球』。先kā chit 2-種sńg法ê名詞講清楚，chiah-bē台語華語講kah霧sà-sà。

跳箍仔kap拍球chit 2項thit-thô，查某囡仔較kah-ì sńg，因為較文較bē野，阮內底有A-bí、Mī--ē、A-tiû、A-gián、A-jiông、A-loân攏chin-ài sńg mā真捷sńg，隔壁內底Thah-khah--è、Hí-leh、Huh-khuh…mā時常過來sńg。

仝款是較捷tī boeh暗時，有讀冊--è、無讀冊--è招招--leh門口埕sńg，chhiāng腳雞、跳索仔、拍球…隨人sńg家己ê…

「Lah-jih！」叔伯小妹A-bí牽長聲leh喊(hiàm)，A-bí減Lah-jih 1個月--niâ，to̍h因為是查某囡仔，阿伯soah無hō͘伊去讀冊。

「Chhòng-saⁿh？」

「你去gia̍h 1-支竹篙叉來，幫阮畫箍仔！」了解，in查某囡仔boeh ī跳箍仔。

走到灶腳東爿ī珠仔場邊--a nê衫所在，gia̍h phēng-tī燈籠花籬笆hit支竹篙叉仔，半行走到頂埕：「畫chia好--bò͘？」

「較內面--leh！」大概Lah-jih好性地好參詳，chit-tīn無去學仔讀冊ê查某囡仔，攏真ài kā Lah-jih差遣叫來叫去。

竹篙叉仔像「y」字形，ē使得gia̍h來thuh竹篙chiūⁿ竹篙架，mā ē使得gia̍h來畫圓箍仔；若是chhāi 2-支tiàm土腳，to̍h ē-tàng khoè竹篙晾衫曝褲曝棉被。

Lah-jih竹篙叉仔gia̍h--leh開始畫，che真簡單，像用コンパス(圓規)仝款，不過竹篙叉仔柄真長，人 著toè-leh se̍h圓箍仔，1-khong…2-khong…3-khong…4-khong…5-khong…6-khong…7-khong…8-khong…9-khong…好--à！

「Seh-seh，chit-má咱來じゃんけん，看啥人boeh先『跳黃子』。」：tī第一國民學校讀冊ê A-hûn講。

「你無看Lah-jih 畫圓箍仔--hio͘h？敢像街路囡仔in攏畫四角格仔，m̄-chiah講做『跳黃子』。咱ài講跳箍仔chiah-tio̍h。」che用竹篙叉仔畫ê圓箍仔，比街路囡仔畫ê四角形細足濟，比腳pô͘大無外濟，boeh跳較需要技術。

箍仔畫好，6个查某囡仔圍倚來su̍t手，正手tēⁿ拳頭母，有ê iap tī後壁，有ê gia̍h koân，「1、2、3、坦笑！」，「1、2、3、坦闔！」，「1、2、3、坦笑！」，「1、2、3、坦闔！」，su̍t 4擺chiah分2爿，A-bí、Mī--ē、A-tiû坦笑一國，A-hûn、A-gián、A-jiông坦闔一國，A-bí代先ī，A-bí kā「óng」提出來，ùi第一ê箍仔開始pò，pò入，倒腳勼--起來，正腳開始chhiāng，ná chhiāng ná踢，kā óng踢入去第二个箍仔內，規定bē使得teh著sûn〔線〕，teh著sûn算àu-sái，連過2關，第三關有2个圓箍仔，ài直接踢到第四關箍仔內，soah踢無入。

換A-hûn跳，仝款kā「óng」pò入去第一个箍仔，開始chhiāng腳雞，踢出第一關、踢出第二關直接làng過第三關踢入第四關箍仔內，伊ê腳ùi第二關chhiāng一下，to̍h雙腳peh開同齊落tī第三關ê 2个圓箍仔內，繼續chhiāng，chit關有較phái-pháng，正腳tī正爿箍仔，boeh chhiāng到第四个箍仔踢「óng」入第五關，圓箍仔koh細，角度m̄-tio̍h、力頭siuⁿ大siuⁿ細攏ēアウト出局，果然A-hûn踢無著óng to̍h àu-chuh。

Mī--ē 繼續A-bí ê腳步，提「óng」pò 第二个箍仔，pò入，開始chhiāng，chhiāng到第二關踢óng，成功踢到第四關，phái-pháng--è來--ā，Mī--ē 動作liú-lia̍h，腰小可choāiⁿ--leh，裙裾phia̍t一下，「óng」入去第五關，koh chhiāng一下踢一下，oă！teh著sûn，「óng」khioh--起來換人跳。

「A-jiông！換你！」

A-jiông kā「óng」pò向第四關，pò無準，liàn對箍仔外àu-chuh。

「人ê óng siuⁿ輕--lah！boeh kā你(A-hûn)借，你to̍h-m̄，你ê óng是鐵盒仔，內面koh有貯沙仔，較穩在好pò好踢，kā你借，你to̍h-m̄…」A-jiông pò無入一直家己ngāu-ngāu唸。

紲落去輪著A-tiû，A-tiû生做較肥軟，腳手淡薄仔慢鈍，這擺伊真在定kā「óng」pò入去第五關，然後伊裙le̍k--起來，倒腳勼--起來，chhiāng一下、兩下、雙腳落地，koh chhiāng一下到第四關，A-tiû身軀小可leh搖，sè-jī！sè-jī！好ka-chài倒腳無落地，身軀徛在koh-chài chhiāng，這擺是連chhiāng tài踢，真好運，「óng」盤過第六關停tī第七關箍仔內，A-tiû koh chhiāng一下、雙腳落地，àⁿ落去khioh「óng」，跳--起來，半空中se̍h一下，轉180度落地，笨chhiâng ê身軀淡薄仔gông-ngia̍h，sìm--一下！雙腳徛在，kā「óng」pò--出去，siòng無chiong，落tī第一个箍仔外，àu-sái！

「A-gián，換你！」Tú-chiah A-jiông pò第四關，無入，chit-má A-gián mā-tio̍h pò第四關。

A-gián pò入第四關開始chhiāng，1、2、3、雙腳落地，伊學Mī--ē ê步數，choāiⁿ腰、chhiāng、踢，「óng」入第五關箍仔內，chhiāng一下koh踢，踢一下siuⁿ大力，アウト。

又閣輪著A-bí，A-bí kā「óng」pò入去天頂尾ê第七關箍仔內，歡喜phut-phut-tiô，Mī--ē kap A-tiû mā phah-pho̍k-á 鼓勵，A-bí倒腳勼--起來，正腳開始chhiāng，ná chhiāng ná 唸：「chi̍t、nn̄g、saⁿ，sì、gō͘、la̍k」，雙腳落tī第六關，àⁿ落去khioh「óng」，跳一下轉翻頭，雙腳仝款徛tī第六關，注心定kā「óng」pò--出去，「óng」飛tī半空中，12蕊目睭chheⁿ-gìn-gìn toè「óng」siòng-ùi第一關箍仔內，「穩tak-tak，niau鼠仔入牛角」，入箍仔--à…

「A-bí！勻勻仔跳，m̄-thang la̍p-tio̍h sûn--ō͘！」Mī--ē 淡薄仔緊張。

「chi̍t、nn̄g、saⁿ，sì、gō͘、la̍k」，正腳chhiāng出箍仔外，結束in ê ゲーム(game)，A-bí這爿穩贏--ē。

因為A-bí chit國先ī，所以著看A-hûn hit國ê結果。頂輪A-gián ī來到第五關，chit-má A-hûn著接紲，伊kā「óng」pò去第五關箍仔內，chiah koh chhiāng到第五關踢「óng」，入天頂尾hit-ê第七關箍仔內，『有希望！』A-hûn歡喜一下喝一聲，雙腳跳入第六關，àⁿ落去khioh「óng」，跳一下轉翻頭，雙腳仝款徛tī第六關，注心定kā「óng」pò--出去，「óng」飛tī半空中，12蕊目睭chheⁿ-gìn-gìn toè「óng」siòng-ùi第一關箍仔內，「穩tak-tak，niau鼠仔入牛角」，m̄是，「óng」liàn tùi箍仔外去。

「Oă！」

「アウト！」結束比賽。

 

「敢boeh koh ī？」

「Mài--le！咱來拍球好--bò͘？」

「逐家óng收收--起來！來拍球！」A-bí球拴便便，A-jiông mā chah一粒。

「來！我kap A-jiông代先拍，lín著算看chiâ拍較濟ē！」A-bí phah派逐家：「A-tiû你喝開始。」

「準備好勢！開----始！」逐家mā開始算：

「chi̍t nn̄g saⁿ sì gō͘ la̍k chhit poeh káu cha̍p cha̍p-it cha̍p-jī cha̍p-saⁿ cha̍p-sì cha̍p-gō͘ cha̍p-la̍k cha̍p-chhit cha̍p-poeh cha̍p-káu jī-cha̍p」；「jia̍p-it jia̍p-jī jia̍p-saⁿ jia̍p-sì jia̍p-gō͘ jia̍p-la̍k jia̍p-chhit」。

「A-bí拍20下，A-jiông拍27下，A-jiông贏。」

「換Mī--ē kap A-gián！」A-bí真pun-tiuⁿ，ī輸mā bē起he-ku。

「準備好勢！開----始！」A-tiû koh喝口令，逐家mā開始算：

「1 2 3 4 5 6 7 8 9 10 11 12 13 14 15 16 17 18 19」；「20 jī-it jī-jī jī-saⁿ jī-sì jī-gō͘ jī-la̍k jī-chhit jī-poeh jī-káu saⁿ-cha̍p saⁿ-it saⁿ-jī saⁿ-saⁿ」…

「A-chiàng來--ā！」有人喝聲，A-chiàng ùi正身護龍頭巷仔口行來。

「阮A-chiàng--hio͘h！」A-tiû kioh是伊ê小弟A-chiàng。

「M̄是，是清水--è in A-chiàng！」

「Siang-kóng--è，你來了真tú好，chia-ê查某囡仔boeh看你拍球。」Lah-jih m̄知tang時徛tī chia leh看跳箍仔。

「好--ō͘！」Siang-kóng--è較斯文，查某囡仔sńg ê齣頭伊khah有趣味，拍球技術真厲害，有一步ná跳ná拍ná hāⁿ過腳曲下ê特技，hiah-ê查某囡仔無一个ē-hiáu。Mī--ē kā手裡ê球tu-hō͘ Siang-kóng--è。

Siang-kóng--è球提--leh，先拍幾个仔，紲落去雙腳徛在，頭àⁿ低身軀小可ku-ku，開始：「1、2、3、4」拍1下、倒腳hāⁿ過衰，拍2下正腳hāⁿ過衰，拍3下、倒腳hāⁿ過衰，拍4下正腳hāⁿ過衰，愈拍愈緊「5 6 7 8 9 10 11 12 13 14 15 16 17 18 19 20 21」，逐家出聲tàu算，球聲腳步聲chiâu 振動ná地動，查某囡仔看kah笑bún-bún phok仔聲pho̍k-pho̍k響。

「A-chiàng，你koh表演he ùi尻脊後承球ê撇步hō͘阮看！」

「Ah he簡單--lah！」Siang-kóng--è 球ná拍嘴ná算「1 2 3 4 5 6 7 8 9 10 看hō͘好--ō͘！」

「ŏ͘ si̍t-teh-nái khú」hit粒球soah拍對伊ê腳縫下落去，Siang-kóng--è 倒手iap後，摸對尻倉溝，tú-tú仔好接著球。

「A-chiàng，你比女生khah-khiàng！」A-hûn o-ló：「阮查某囡仔穿裙較好承，lín查埔囝仔穿褲，ná-ē承ē-tio̍h？實在厲害。」

「A-hûn同學，我mā-ē，球hō͘--我。」拍球Lah-jih mā真kah意，chit步學真久，chit-má kā展--一下。

「1 2 3 4 5 6 7 8 9 10 ŏ͘ si̍t-teh-nái khú」倒手iap後，tī尻倉溝下腳kā球sa--起來。

「Lah-jih，你敢ē-hiáu A-chiàng tú-chiah表演hit步？」

「Bē-hiáu！nā-boeh看功夫，後日來去田裡看阮摃球拍野球！」

「阮boeh轉來去！」

「咱繼續sńg，繼續拍球！」

「Siang-kóng--è，咱來去A-bêng in-tau thit-thô！」20110928_Lah-jih

 

六、20140417_茄苳籽空氣銃          1951_Lah-jih

時間ná飛，青春一去不再回，看著茄苳仔結籽滿樹椏，突然想起細漢時，削麻竹管仔做空氣銃，厝前厝後「pho̍k pho̍k pho̍k pho̍k」sńg thit-thô ê情景，真想boeh kā記智khioh回，koh-chài聽一下pho̍k pho̍k pho̍k pho̍k歡樂氣氛。

為著麻竹筍收成，chit-mái麻竹母欉一模只留4-5支，真oh取著長koh直tú好適合茄苳籽大細ê麻竹管仔，無像往過麻竹厝前厝後自然生長，chhìn-chhài tiau to̍h有適合麻竹管。拜托朋友tàu-chhōe，猶是揣無合用麻竹管。

再三思想，chit-mái塑膠管真濟，應該揣有代用品chiah-tio̍h，尾仔總--是揣著一型原子筆，筆管小可大頭su̍t，趕緊製造一支試看覓，「po̍k po̍k po̍k po̍k」kài大聲有力，che hō͘囡仔sńg-thit-thô一定kài趣味，連紲做6支，孫--e轉--來1人1支，茄苳仔籽tī附近，無限供應。果然無錯，厝前厝後sńg kah笑吻吻，一直hoah「阿公真厲害！」

製造方法kap原理：

1、麻竹管、筆管、塑膠管，孔ê大細著配合銃子ê大細，銃子比槍孔大分分--a上適合，聲大有力。

2、銃管需要大頭su̍t，意思to̍h是入口小可比出口大分分--a，按呢銃子壓縮力大bē lāu氣。天然麻竹管自然大頭su̍t，若是塑膠管to̍h較oh揣。鵝毛管仔mā ē-tàng代理。

3、銃子，選茄苳仔籽正當時，榕仔籽、柑仔皮、蕃薯箍、番仔豆仁mā會用得，用紙浸水jio̍k-lio̍k--leh 也會使。

20140512補充：

2禮拜前摘一寡茄苳仔籽，chah去北部hō͘孫--e sńg，sńg剩--ē交代囥冰箱冷藏，想bē到2禮拜後iáu-koh青青kap tăⁿ挽--è 仝款，提來扑看覓，仝款「po̍k po̍k po̍k po̍k」真大聲。

2禮拜後koh去挽茄苳仔籽，大無偌濟，hit種原子筆塑膠管做ê空氣銃猶原ē使得使用，若是去揣小可較大管ê麻竹管，to̍h ē使得繼續挽來sńg。雖罔茄苳結籽有季節性，若是ē-tàng揣著tú好ê銃管，boeh sńg 1-kó͘月、kó͘半月是無問題。

 

七、20131203_木瓜koáiⁿ：   1951_Lah-jih

木瓜好食助消化，種tī厝前後壁溝看súi mā chin-chán，伊ê葉大葉koh khih-khih，葉pèⁿ長長圓圓內面有pōng-khang，風若透to̍h-ē sìm--leh sìm--leh 搖搖pái-pái 真hiâu-pai。因為木瓜葉柄長長親像ē-tàng做柺仔，咱to̍h kā叫做木瓜koáiⁿ，kā木瓜koáiⁿ頭尾削斷，to̍h是一支真好sńg ê thit-thô-mi̍h。

細漢時，大人kā木瓜koáiⁿ at--落來，阮to̍h去提1-kha腳桶，chiah koh kā水té-tīⁿ，削好ê木瓜koáiⁿ 1頭用手tēⁿ--leh浸點水內，chhu向3、40度koân，開始用手碗sut，ná sut水to̍h ná 對另外彼頭濺--出-來，愈大力，水to̍h chōaⁿ愈遠，濺kah囡仔伴頭tâm衫tâm，我chōaⁿ了換你濺，比賽啥人chōaⁿ 較遠。因為chit種thit-thô ê經驗，後--來讀初中、師範ê時，老師講著大氣壓力、向心力、離心力chia ê科學問題，to̍h加真緊理解。

 

八、20110917_Tiak珠仔 īばんざい   1951_Lah-jih

5年升6年hit个歇熱，有1工下晡4點goă，1-tīn囡仔伴滾來到阮灶腳厝角頭，講boeh「Tiak珠仔 ī挽菜(ばんざい)」。chia是下埕南爿曠地，有1棚菜瓜棚kap一坵用燈籠花籬笆圍起來ê園仔，園仔到灶腳chiâⁿ闊，無leh曝粟，會使得挖孔，是sńg珠仔好所在，koh逐个囡仔伴攏知影Lah-jih珠仔上濟，boeh ī挽菜，來Lah-jih in-tau sńg to̍h無m̄著。

「人chiah濟，咱來分國ī！」已經國民學校畢業ê Bo̍k-chhong--ē chhoā頭指揮：「我一國，Ka-hiông--ē一國，阮2人じゃんけん(janken/猜拳)選人，hō͘我選著徛chit爿，Ka-hiông選著--ē徛伊hit爿…」

「我無珠仔！」

「我mā無珠仔！」

「等一下！」Lah-jih越頭起腳走，無1分鐘久捾1-kâi烏色lān-pha袋仔斡倒轉--來，jîm幾若粒珠仔出--來：「A-pêⁿ！lah！」「Ka-tēng--ē！lah！」「No͘h-lí-á！lah！」一人tu一粒，chhun--e 較緊koh捾轉去囥。

Bo̍k-chhong--ē Ka-hiông--ē 開始石頭鉸刀紙一直poe̍h，poe̍h贏先揀，1擺1个，第一擺Bo̍k-chhong--ē贏：「Lah-jih！」

Ka-hiông：「A-ba̍k！」

第二擺Bo̍k-chhong--ē閣贏：「Ka-tēng--ē！」

Ka-hiông：「A-pêⁿ！」

連紲poe̍h 5-piàn，12个分做2國對抗輸贏，注定心適好sńg。

Sńg「Tiak珠仔 ī挽菜(ばんざい)」，ài先tī塗腳挖6-kâi孔，坦直3孔，每孔大約5(台)尺遠，中央hit孔正爿、倒爿仝款5(台)尺遠各挖1孔，成1个十字「+」形，另外tī「+」形ê外圍小可較遠所在挖1孔，叫做鬼仔孔，阮灶腳厝角頭chit个珠仔場，早to̍h挖便便，chit-má koh小可しあげ(修飾、潤飾)一下to̍h會使得sńg。

Bo̍k-chhong--ē Ka-hiông--ē じゃんけん(猜拳)結果，Ka-hiông--ē in hit國A-chiàng先chu̍t，chu̍t一下過頭遠，koh來換Ka-tēng--ē，Ka-tēng--ē技術bē-bái，chu̍t一下tú-tú-á好落中孔，繼續往正爿hit孔chu̍t，oă！siuⁿ輕手soah停tī孔邊，換A-pêⁿ，A-pêⁿ是chu̍t珠仔高手，手路幼，boeh遠boeh近控制真tú好，siòng目標koh準，伊ùi本孔出發，連紲中孔、正爿邊仔孔，koh來伊m̄相中孔，伊boeh坐便車，tú-chiah Ka-tēng--ē chu̍t hit粒tú-tī孔邊，A-pêⁿ倒手掠1掠，離hit粒珠仔chiah半尺遠，正手kā伊ê珠仔chu̍t--出去，「khiăk」--一下踫著Ka-tēng--ē hit粒珠仔，伊to̍h直接徙到中孔繼續chu̍t倒爿hit孔，一下失覺察，珠仔liàn過邊仔孔。

Koh來Bo̍k-chhong--e，伊雖然較大漢，m̄-koh技巧無比阮khah-gâu，伊ê珠仔停tī中孔邊，紲落去Ka-hiông--ē，伊ê珠仔無入孔，歹運紲kā Bo̍k-chhong--e ê珠仔踫入孔內，chit聲害--ā，著hông罰停睏(停權)1擺，Bo̍k-chhong--e珠仔會使得khioh轉來khǹg原位；koh來，「bah-soh--à！」看現場ê陣勢，中孔、邊仔孔攏有1粒珠仔tī孔邊，Lah-jih心內暗爽一下，紲落去是輪著伊， Lah-jih kā珠仔hē入去本孔，開始chu̍t，伊khû--落去，身軀身小可àⁿ-kē，倒手ùi孔邊掠一掠，正手提珠仔，珠仔ni tī tōa-pû-ong kap kí指中間，tōa-pû-ong tī下腳，kí指tī téng-koân，2蕊目睭niauh-koân，注神siòng Bo̍k-chhong--e ê珠仔，然後kí指kā珠仔按力lián倒轉chu̍t--出去，珠仔慢慢仔gô，輕輕仔碰著Bo̍k-chhong--e ê珠仔，「khiăk」一聲，Bo̍k-chhong--e ê珠仔tú好liàn到孔邊停--leh，Lah-jih 得著入孔ê權利ē-sái進中孔，ùi本孔半khû徛仔行5-hoa̍h koh khû--落去，掠一掠，珠仔tú好tī頭前，Lah-jih kā珠仔踫對倒爿hit孔，停tī孔前，半khû徛仔koh行5-hoa̍h，kā珠仔koh chhoā轉來到中孔，chit擺無hiah好運，珠仔停tī中孔倒爿，無法度sio-chhoā行，kan-nā「kho̍k 2下」進到téng-koân hit孔，chiah-koh chu̍t到中孔，無入孔，停tī孔邊。

逐个tiām-tiām看Lah-jih leh展功夫，看kah 1-爿歡喜1-爿懊惱，看Lah-jih已經失手，Ka-hiông--ē hit國隨時有笑聲，「hŏ͘！chit-má lín該死--à！A-ba̍k 換你！」

A-ba̍k功夫kap Lah-jih不輸上下，A-ba̍k kā珠仔hē入去本孔，開始chu̍t，伊khû--落去，身軀身小可àⁿ-kē，倒手ùi孔邊掠一掠，正手提珠仔，珠仔ni tī tōa-pû-ong kap kí指中間，tōa-pû-ong tī下腳，kí指tī téng-koân，2蕊目睭niauh-koân，注神siòng中孔邊--a ê珠仔，chit-chūn中孔有2粒珠仔tī孔邊，A-ba̍k ê kí指kā珠仔按力lián倒轉chu̍t--出去，珠仔慢慢仔gô，輕輕仔碰著頭前Bo̍k-chhong--e hit粒珠仔，「khiăk」一聲，珠仔小可徙位，A-ba̍k得著入孔ê權利進到中孔，伊koh khû--落去，kā Bo̍k-chhong--e ê珠仔chhoā到正爿孔，又閣停tī孔邊1掠遠，做珠仔做kah足tú好，紲落去伊無kā Bo̍k-chhong--e ê珠仔koh chhoā轉去中孔，伊用較大力kā珠仔直接踫到倒爿孔邊--a，實在chiâⁿ厲害，又閣tú-tú-á好停tiàm孔邊，「pho̍k！pho̍k！pho̍k！pho̍k！…」有o-ló有鼓勵，噗仔聲鼓舞A-ba̍k iāng勢，紲落去伊kā珠仔送到téng-koân hit孔孔邊，chit-má A-ba̍k伊穩心仔半khû跳，親像水蛙按呢跳到中孔「kho̍k --2下」，跳到邊仔孔「kho̍k --2下」，koh跳到中孔「kho̍k --2下」，連紲跳到téng-koân hit孔，頂孔無珠仔thang「kho̍k」，A-ba̍k大概是歡喜過頭，一下無小心chu̍t無入中孔，chiōng按呢結束伊ê「演技」，peh--起來，手poāⁿ-poāⁿ--leh，換人chu̍t。

Chit擺人濟sńg真久，輪幾若擺猶無輸贏，第四輪輪著Lah-jih，伊koh展絕招，伊kā別人ê珠仔踫過來chhoā過去，帶動珠仔khǹg-tiàm孔邊，然後按本孔、中孔、正爿、中孔、倒爿、中孔、頂孔、中孔、正爿、中孔、倒爿、中孔順序，khû--leh peh--起來、khû--leh peh--起來一直「kho̍k」珠仔，無一tah久仔to̍h「kho̍k」轉來到本孔，第一个挽菜(ばんざい)，逐个看kah無nih目，ná-ē chiah厲害chiah gâu chu̍t！

人濟好sńg是好sńg，tn̄g-tio̍h高手A-ba̍k kap Lah-jih tī--leh，to̍h pìⁿ-chiâⁿ無好sńg，「kan-nā看in表演to̍h好，ā-sái ī！」有人抗議，需要考慮，逐家參詳，以後若是tn̄g-tio̍h人濟，to̍h分做2-場sńg，A-ba̍k kap Lah-jih mā-ài家己chām-chat，盡量niū人sńg，m̄-thang kan-nā顧家己表演。

後記：耍玻璃珠仔一般攏講tiak珠仔，手蹄仔(手掌)向天，用tōa-pû-ong kap kí指ni珠仔，tōa-pû-ong chhi̍h珠仔，用tōa-pû-ong ê 指甲kā珠仔「tiak」--出去；阮庄腳囡仔to̍h無仝款，是手蹄仔(手掌)向地，用tōa-pû-ong kap kí指ni珠仔，用kí指指頭仔尾下力kā珠仔「chu̍t」--出去，按呢chu̍t，珠仔chiah-ē tiàm土腳liàn，不過若是kan-nā sńg珠仔sio-kho̍k，to̍h隨在人按怎「tiak」、按怎「chu̍t」。

Lah-jih ê珠仔是四兄讀公學校時買--è，hia-ê珠仔kài-súi，nā-boeh ī挽菜OK，nā-boeh借來「khian」輸贏，to̍h-ē拒絕，因為用khian--e 珠仔ē破去，nā-boeh 耍用khian--e ê thit-thô，阮攏用bâ-bui-chí，to̍h是the̍h來洗衫用ê「無患子」ê種子，kap龍眼核仔平大粒，真tēng〔硬〕。20110925_Lah-jih

 

九、20121025_Sńg pho̍k-á銃kap水銃  1951_Lah-jih

古早庄社厝宅m̄知受風水觀念影響，抑是年久月深變遷所致，明明ē-tàng àⁿ大路起厝，soah pìⁿ-chiâⁿ大路是後壁溝，正式出入tio̍h-ài khau巷路chiah斡對前埕做入口，平常時行後尾路出入庄內。阮兜是大內底，分頂埕kap下埕，厝宅ǹg東起，埕尾大門出去to̍h是崁頂巷大路，四正大範；南爿隔壁Chùn--è in內底tú好顛倒péng，厝宅àⁿ西起，第三落正身後壁疊草垺所在tú好tī崁頂巷大路水溝邊，上頭前落正身前面chiah是門口埕，埕尾有水溝kap人外懸燈籠花籬笆，籬笆外口to̍h是阮ê厝腳田。

Chùn--è in門口埕尾倚溝仔邊所在，有2欉2人siâm ê茄苳仔，1欉甜--e，斜斜趨對田裏hit爿頭，加減ē ām-tio̍h稻仔歹收成，大人無計較，阮囡仔是足kah意，boeh peh樹頂at 抑是boeh徛塗腳兜鉤茄苳籽攏足方便，另外hit欉是澀--è，徛thêng-thêng，需要較長ê竹篙chiah lōng ē-tio̍h。sek(熟)ê茄苳籽ē食得，無好食，囡仔人iau-sâi時ē食--一半--粒仔 teh癮頭。

5--月腳兜，有人發現茄苳仔已經leh開花，囡仔伴mā開始la̍k-la̍k-chhoah--起來，學校放學轉來到chia lóng-ē taⁿ頭看--一下。 茄苳仔開花了後to̍h-ē結籽， 茄苳仔籽慢慢仔大，阮to̍h ûn-ûn-á等，囡仔伴常常關心ê話題是，「ná-ē猶chiah-nī細粒！」「ó͘！boeh等到tang時？」「啥物時陣chiah ē-tàng at來sńg？」che是逐工lóng-ē hōe-tio̍h ê問題。等久總是ē等--著，hit日A-bo̍k手裏提1葩茄苳仔籽「pho̍k！ pho̍k！」leh sńg hō͘阮看，淡薄仔hiau-pai伊搶著頭香，逐家無chhap--伊，阮囡仔伴to̍h有ê轉去giâ刀仔，有ê轉去提鉤仔，無幾分鐘to̍h集合tī阮埕尾園仔內hit模麻竹腳，逐家頭taⁿ-taⁿ siòng he麻竹欉ê分椏，鉤--e鉤，chûi--ē chûi，特選he直koh圓、四桶齊bē siuⁿ大頭su̍t、而且管孔ài比茄苳仔籽較細--淡薄仔--è，chit種特選ê麻竹管仔，像寫大字毛筆管hiah大，管孔像原子筆管hiah大孔上kài贊。

麻竹管仔提--著，隨人開始製作空氣銃，其實阮庄腳囡仔攏講做「pho̍k-á銃」，Lah-jih選有2節真直真長hit椏，每1節連目kā chûi lia̍h外長，chiah koh chûi做2-koe̍h，有目hit頭半lia̍h長做柄，無目hit-koe̍h 1-lia̍h長做銃管，頭尾切斷所在修hō͘齊；了後chiah koh去揣二兄做畚箕、鴨圍仔留落來ê桂竹仔liàm，修1支 lia̍h外長圓圓ê箸，chhng入去柄內面ài ē-ân，thó͘出來hit-koe̍h chiah koh修hō͘比管孔較細--一屑仔，尾溜tio̍h chûi hō͘齊，m̄-thang尖尖，長度一定ài比銃管較短一粒茄苳仔籽大，2支攏完成，1支孔較大，1支孔較細，閣來to̍h是去挽銃子。日頭猶未落海，時間iáu-koh早，逐家相招giâ竹篙giâ鉤仔去lōng茄苳仔籽、鉤茄苳仔籽，1人1葩開始試扑。

「Pŭ！」「Ná-ē bē響？」A-chiàng試1聲。

「Pŭ！」「我ê mā bē響？」Ka-tēng--ē mā試1聲。

「茄苳仔籽siuⁿ細粒--lah！」

「來！看我ê！」Lah-jih用hit支細管--è入銃子。

「Pŏk！」ē-hiáng是 ē-hiáng，siuⁿ細聲，無好sńg。

「咱hō͘ A-bo̍k--騙去--à！閣等--幾工--à chiah來挽！」 A-bo̍k ê個性逐家知知--leh，頇顢koh ài phuh-chhèng。

3、4工後，有人tòng-bē-tiâu招Lah-jih去挽銃子，試看覓，「Pŏk！」iáu-sī siuⁿ細，Lah-jih換hit支細管--è扑，「Pŏk~」koh bē細聲，tu hō͘ A-pêⁿ sńg看覓，A-pêⁿ歡喜ka̍h。

Koh隔5、6工，拜六過晝後仔，逐家約好去Chùn--è in埕尾，A-ba̍k腳手liú-lia̍h peh起lih at茄苳仔籽，1人sîn 1葩，等A-ba̍k落--來to̍h開始試扑，「Pŏk~」「Pŏk~」「Pŏk~」「Pŏk~」「Pŏk~」⋯「Pŏk~」「Pŏk~」「Pŏk~」「Pŏk~」「Pŏk~」⋯有夠大聲，銃管bū煙， 銃子tōaⁿ真遠，逐家歡喜kah phut-phut-tiô。

「  ！」⋯「  ！」⋯「  ！」⋯「我ê ná-ē無聲？」逐家sńg kah boeh起童，Êng-pin--a soah pìⁿ規晡pìⁿ bē好勢。

「Lah-jih！kâng看覓--leh--lah！」

「 Êng-pin--e，你ê銃箸siuⁿ長--lah，你看！第一粒銃子入--落去，槍箸kā tōng--落去，你看！銃子 tōng--出去--à！」

「Ná-ē按呢？」 Êng-pin--a人較gōng-sòng較無變竅，只好替伊解決錯誤。

「有人chah刀仔--bò͘？」A-ba̍k tu hō͘我1支鉛筆刀仔。

「 Êng-pin！看hō͘好，槍箸尾kā削一寡掉，tio̍h削hō͘齊，按呢你koh扑看覓。」

紲落去，Lah-jih ná講ná指導：「第一粒入--入去，koh tōng--入去⋯tio̍h！閣來，第二粒入--入去，銃子有較大粒，無要緊，用chiⁿ--e⋯tio̍h！槍箸ûn-ûn-á kā tōng，ûn-ûn-á kā tōng⋯」「Pŏk~」都猶未tōng到底，銃子to̍h tōaⁿ--出去，響kah足大聲。

Êng-pin歡喜ka̍h：「Lah-jih！謝謝你！koh-ē出煙--neh！」

從按呢，門口埕、大路頭、巷仔路、大廟口、祖厝埕攏是「Pŏk~ pŏk~ pŏk~ pŏk~ 」ê茄苳仔銃子聲，銃子聲、囡仔喝咻聲kap笑聲絞絞做一伙。

茄苳仔籽一直大，阮mā一直sńg一直tōaⁿ，sńg boeh 2禮拜，茄苳仔籽已經大到bē使得做銃子，有人事先儉糧草，kā茄苳仔籽1葩1葩浸tī田裡水溝內，又閣繼續sńg 2、3工，歸尾mā是著停止。有人sńg無夠氣，khioh he字紙摻水tēⁿ hō͘爛爛kui糊，chiah koh粒粒--leh做銃子，仝款ē使得sńg，hit時tú好tn̄g-tio̍h 7月半普渡有刣鵝，鵝毛管大支切斷做銃管，蕃薯切片用鵝毛管chhok入做銃子，mā是ē使得sńg，這是阮變竅ê法度，mā有人用原子筆ê筆管做銃管，頭尾平大孔，ē lāu氣，m̄是kài好sńg。總講一句，該停to̍h-ài停，boeh-sńg明年chiah koh來。

Pho̍k-á銃sńg了天氣tng炎熱，有人開始sńg水銃，水銃相濺心適清涼，可惜材料oh揣，銃管需要桂竹仔管，桂竹仔管tī庄內kan-nā阿爸、二兄做畚箕、鴨圍仔kap Hàn-chiong--e in-tau做竹椅有leh用，boeh-ài 1節桂竹仔管，需要用討--è 抑是khioh phiaⁿ-tī壁角無愛ti̍ⁿh--è，斯當時boeh做1支水銃，除了桂竹仔管無其他物件thang代替。

1節桂竹仔管，尾溜hit爿ài留目，目ê中央用鑽仔鑽1孔，大細家己斟酌，孔傷細射出ê水柱傷細káng，孔傷大濺bē遠，大頭hit爿目ài鋸掉。閣來to̍h是做tōng箸，揀he尾指指仔大ê柴枝、竹管仔上tú好，長度著比銃管較長，1爿thang做柄，1爿tān破布做chiⁿ-á，chiⁿ-á真重要，做得好bē sia̍p水，水柱to̍h-ē濺較遠，若做了lēng-lēng phàⁿ-phàⁿ無tiām-cha̍t，to̍h-ē sia̍p水濺bē久bē連紲。

水銃做好to̍h開始sńg，濺來濺去看chiâ濺較遠濺較久，有人相濺相戰，濺kah規身軀tâm-lok-lok，涼--à涼，ná濺ná笑bē起phùi面，可惜按呢濺水相戰，需要揣有水koh方便吸水ê所在，實在oh-tit揣，庄外水田im水ê時陣siōng-kài適合，總--是kah意按呢sńg ê囡仔伴無濟，所以無kài外流行，大部份ê囡仔攏是家己sńg thit-thô，phâng 1桶面桶水khǹg-tiàm門口埕，khû leh四界罔濺，濺遠濺近，ná像leh做「實驗」，按呢想koh有道理--ō͘，讀初中讀師範時，老師教實驗，見若有囡仔時代ê經驗，lóng-ē較緊了解原理，可惜大部份ê囡仔伴攏無繼續升學，無讀初中無讀高中ê囡仔伴，in m̄知ē了解斯當時sńg thit-thô物ê科學原理--bò͘？

 

十、20110915_Siang-kóng--è in兜ê寶貝     1951_Lah-jih

Siang-kóng--è是清水--è ê後生，減Lah-jih 2歲，toà隔壁ê隔壁內底，阿爸是掃梳腳，時常掃ùi in-tau去chhoē清水--è phò-tāu，Lah-jih kap Siang-kóng--è mā時常tàu-tīn sńg。

是按怎ē kā號做Siang-kóng--è？有可能是伊gâu流鼻，tiāⁿ-tiāⁿ 雙港流，mā有可能kap hit-chūn美軍空襲台灣時，有一種飛龍機是雙管--è有關連。其實Siang-kóng--è 本名叫A-chiàng，kap Kiû-á兄in A-chiàng仝名，m̄-chiah逐个攏慣勢叫伊Siang-kóng--è，chiah-bē叫m̄-tio̍h人。Hit-chūn是日本時代，tng leh推sak「皇民化」，囡仔號名加減攏有日本味，像Lah-jih to̍h是日本名ひらじ ê變音，阿爸、阿兄無讀冊，bē-hiáu日本話，kap chit-má ê老一輩，講he北仔話攏有台語腔仝款，改變人ê語言實在無簡單，m̄-koh去hō͘人改換語言ê族群，為著生存，有人歡歡喜喜toè人學toè人講，有心ê人卻是鬱卒kui世人。

Siang-kóng--è in-tau有2項寶，1-téng篾轎kap 1-kâi譀鏡(hàm-kiàⁿ)，hit-téng篾轎chit-má猶tī--leh。

篾轎，tī 五、六十年前是上等ê交通工具，先生(醫生)往診需要chhiàⁿ轎hō͘伊坐；先--e(地理師/算命師)boeh出門tio̍h坐轎；老歲仔人boeh去hō͘先生看，有錢chhiàⁿ轎，無錢to̍h用āiⁿ(偝)--ē；娶某tio̍h用新娘轎娶入門；送亡者chiūⁿ山頭，大孫一定tio̍h坐大孫轎。扛轎需要2个人，遠路需要1、2轎夫做よび/yobi/預備，所以扛轎有轎班，二伯人koân大，漢草好，是其中1个。清水--è hit-téng篾轎是chhíⁿ色--è(藏青色)，素素--à，m̄-koh若tn̄g-tio̍h娶新娘，to̍h-ē nê八仙彩妝súi-súi，頭前面koh有he八音chhoā路：「2个扛hō͘ 1个thiòng，2个扛hō͘ 1个thiòng…(51 65 61 5/51 65 62 1/…)」jăo鬧熱joă趣味--leh-neh！

Siang-kóng--è in-tau另外hit个寶貝「譀鏡」，有影hàm-koa̍h-koa̍h，鏡內ê人kap鏡外ê人無仝，鏡內ê面形攏變形，變kah 奇奇怪怪，變kah真驚人。見擺若去in-tau thit-thô抑是ī珠仔tèng kan-lo̍k，Siang-kóng--è to̍h-ē ia̍t手叫去in ī--ā 房間看譀鏡，有時tiau-kang kek鬼仔面照，Siang-kóng--è soah咻咻叫m̄-káⁿ看，講he是魔鬼鏡，

「M̄是--lah！既然號做譀鏡當然mā hàm-koa̍h-koa̍h，he是科學關係。」

「啥物是科學關係？」

「M̄知影！」

1擺看1擺趣味，「這是啥物怪物件？」the̍h--tio̍h 重重，像切做爿ê鐵子(鉛球)hiah大粒，內面au-au金金親像鏡，m̄-koh m̄是玻璃，外殼厚厚，真正怪寶貝，莫怪Siang-kóng--è 寶ni-ni，無隨便借人看。

對這个「譀鏡」ê好奇，一直到讀初中chiah得著答案，to̍h是「譀鏡」無m̄-tio̍h，m̄-koh m̄是老歲仔人leh看字hit種譀鏡，老歲仔人leh看字he是thang光--e，雙面phok-phok(凸凸)，叫做『凸透鏡』，Siang-kóng--è in hit-kâi 無通光，叫做『凹透鏡』，m̄-tio̍h！是『凹鏡』，chit-má想想--leh，Siang-kóng--è in hit-kâi 無通光ê『凹鏡』，有可能是醫生leh看目睭抑是嘴齒，集中光線ê家私mā無一定？

 

十一、20111110_Phah kan-lo̍k       19531000_Lah-jih

「走、走！走、走！走去埕尾hia sńg！chia boeh曝粟！」阿伯淡薄仔受氣一直喝一直趕，1-tīn囡仔隨人kan-lo̍k khioh--leh，親像趕鴨仔陣ê鴨bî-á徙對下埕去，阮兜頂埕真闊，下埕mā真闊，來到下埕，toà後壁厝ê阿祁àⁿ落去土腳用kan-lo̍k釘劃1-kâi kám-ô͘-á大ê圓箍仔：「Boeh tèng-kan-lo̍k ê人倚--來！驚kan-lo̍k tèng破去--è to̍h走khah邊--a-leh！」阿祁加Lah-jih 3歲，無去學仔讀冊，phah kan-lo̍k伊kài-gâu，特別tèng-kan-lo̍k食肉--è，hiông-kài-kài kài粗殘，伊ê kan-lo̍k大粒koh是斧頭仔釘，磨kah利劍劍，若hō͘ hmh--tio̍h，無pit做爿mā tio̍h liah 1-liah，有人kan-nā看to̍h驚，有人ài刺激，無leh sìn-táu--伊，偏偏boeh kap伊輸贏，to̍h是kan-lo̍k liah做2爿mā甘願，Lah-jih khah無kah意chit種sńg法，to̍h徛tiàm邊--a看心適。

開始進前tio̍h排tèng kan-lo̍k ê順序kap啥人ê kan-lo̍k ài hông tèng，無用じゃんけん〔猜拳〕，mā無用抽鬮，是用phah kan-lo̍k 落去圓箍仔內做決定，啥人ê kan-lo̍k上倚中心點，to̍h啥人代先tèng；若是kan-lo̍k拍無入去圓箍仔內，抑是kan-lo̍k拍無轉，抑是轉了bē赴khioh起來，攏算死kan-lo̍k，to̍h ài khǹg tī圓箍仔內hō͘人tèng、hō͘人救…

A-pêⁿ、A-chiàng、Má-sah、A-ba̍k ê kan-lo̍k 攏是死kan-lo̍k，hông排tī箍仔內，in to̍h相爭拜託人kā救活，「阿兄！ài先救我ê！」

「Khah-chuh--è順紲救--我，好--bò͘！？」

Khah-chuh--è排第一个，伊kan-lo̍k索仔纏纏--leh，準備boeh救小弟A-pêⁿ ê kan-lo̍k，「kn̆g~」一聲，kan-lo̍k落地，準準siòng-tio̍h A-pêⁿ kan-lo̍k尖尖hit爿後斗，「khŏk~」一下A-pêⁿ ê kan-lo̍k彈出圓箍仔外，liân-soà Má-sah ê kan-lo̍k mā救活：「Khah-chuh--è，多謝！」

第二个斧頭仔釘阿祁boeh出手，看著kan-lo̍k chiah大粒，斧頭仔釘chiah大pe chiah-ní利，A-chiàng、A-ba̍k開始phi̍h-phi̍h-chhoah…

「Hō͘你去--à！」斧頭仔釘kan-lo̍k落地，箍仔內2粒kan-lo̍k攏phùn出2、3步遠，「死--à、死--à！」A-ba̍k ê kan-lo̍k phùn較近，hông khioh入去箍仔內，kan-lo̍k釘插入土肉，chhāi ân-ân準備據在人tèng，好ka-chài斧頭仔釘阿祁tăⁿ phah --過，koh來Ka-hiông--ē、Ka-tēng--ē、No͘h-lí-á、Kok-ke-á 攏m̄是hiông-kài-kài ê人，Ka-hiông--ē講保平安to̍h好，m̄敢想boeh食肉，No͘h-lí-á技術無好，講若拍ē轉ē入去箍仔內to̍h 阿彌陀佛--à，Ka-tēng--ē ê kan-lo̍k釘雖罔扁扁，m̄-koh無磨利，tèng bē liah爿，所以A-ba̍k有較放心，紲落輪著Kok-ke-á，Kok-ke-á運氣無好，phah一下kan-lo̍k soah吊釘，phah無出去，A-ba̍k歡喜一下，「有人做伴，有救--à！」

Koh來輪著A-pêⁿ，A-pêⁿ kā 2粒kan-lo̍k掠相排khǹg做伙，索仔纏好，索仔頭挾tī指頭仔縫，腳馬soah在，正手gia̍h-koân，相準準phah對箍仔內2粒kan-lo̍k所在，可惜姿勢súi技術bái，soah無入箍仔內，又閣死1擺。紲落輪著Má-sah，Má-sah救出A-ba̍k kap Kok-ke-á，taⁿ箍仔內kan-nā chhun A-pêⁿ leh hông tèng，連紲Ka-hiông--ē、Ka-tēng--ē、No͘h-lí-á 3个攏安全過關，mā無食著肉。

「阿兄kâ救！」A-pêⁿ kā Khah-chuh--è 討救兵。

「Boeh按怎救？kan-nā 1粒boeh按怎救？hông tèng hō͘ liah爿好--lah，有夠pēⁿ！」Khah-chuh--è只好安全過關。

Khah-chuh--è phah了又閣換斧頭仔釘阿祁：「Chit擺一定boeh hō͘伊liah做2爿。」 「Kŏ͘ⁿ一聲」A-pêⁿ ê kan-lo̍k 已經liah 1片，而且phùn出箍仔外，chit聲真正害--ā，A-pêⁿ ê kan-lo̍k 無koh khioh轉來khǹg-tiàm箍仔內，kan-lo̍k ē hông趕入埕尾另外1-kâi圓箍仔內，逐个開始相爭tèng相爭趕，路尾真正kā kan-lo̍k趕入圓箍仔內，chit聲A-pêⁿ有影真正boeh哭無目屎：「拜託拜託！khah輕手--leh，kho̍k--leh kho̍k--leh to̍h好！」1-tīn囡仔從án-ne圍倚來圓箍仔邊，kan-lo̍k索仔暫時收起來tē tiàm褲袋仔，輪流boeh破A-pêⁿ ê kan-lo̍k，看A-pêⁿ kan-lo̍k已經liah 1爿仔，逐个歹勢koh ka鑿liah爿，攏輕輕仔kho̍k 3下to̍h準tú-soah，輪到斧頭仔釘阿祁，A-pêⁿ一直拜託「kho̍k 3下to̍h好！好--bò͘！kho̍k 3下to̍h好！好--bò͘！」

「A-pêⁿ！mài戇--ā-lah！tèng-kan-lo̍k上趣味to̍h是破kan-lo̍k，無，我斧頭仔釘磨chiah-lāi boeh創啥？」斧頭仔釘阿祁khû--落去，倒手hoāⁿ A-pêⁿ ê kan-lo̍k，正手kā家己ê kan-lo̍k tēⁿ ân-ân，kan-lo̍k釘鑿對A-pêⁿ ê kan-lo̍k，鑿1下liah 1大liah，chím 3下to̍h liah 3大liah，連kan-lo̍k釘都看現現，taⁿ，A-pêⁿ ê kan-lo̍k已經報銷，連kan-lo̍k釘都hō͘阿祁贏--去，A-pêⁿ目箍紅紅khiú Khah-chuh ê手：「阿兄！Koh thâi 1粒kan-lo̍k hō͘--我lah heh！」……

Phah kan-lo̍k，方式幾若種，kan-lo̍k釘捶扁扁食肉hit種「tèng-kan-lo̍k」有較野有較危險，Lah-jih 較愛sńg he圓釘--ē，phah hō͘ tńg phah hō͘ gô，比看chiâ ê kan-lo̍k轉上gîn轉上久，二兄、四兄thâi ê kan-lo̍k雖罔真súi真好phah，可惜Lah-jih技術無夠，攏bē徛心，每擺看著街路囡仔sńg ê kan-lo̍k攏ē徛心，koh thâi kah chiâⁿ圓chiâⁿ-súi，剾kah金滑金滑，to̍h足欣羨，in講he是用車--e，用車床車--e，m̄是用刀仔削--è，1粒5角銀，講著錢to̍h m̄敢siàu想boeh愛，有二兄、四兄thâi hoā ê kan-lo̍k to̍h bē-bái--à。街路囡仔sńg kan-lo̍k傷過文，變化無濟，若阮庄腳囡仔sńg kan-lo̍k，heh to̍h加真好sńg--lò͘，phah hō͘轉無稀奇，phah hō͘ ho͘ⁿ-ho͘ⁿ叫、phah hō͘走phīng遠、抑是phah hō͘ tèng-tī土腳bē振動，chiah是真正技術功夫。俗語講「樟gâu吼，瓊gâu走，pa̍t-á柴摔死狗。」是有伊ê道理tī--leh，不過阮罕得看著樟仔柴、瓊仔柴thâi ê kan-lo̍k，較濟是chām苦楝仔椏來thâi ê kan-lo̍k，若有人用八卦山phiâⁿ ê樟仔柴、瓊仔柴thâi--è，in一定展poah-poah表演hō͘阮看，上蓋厲害上蓋khiàng--è，to̍h是木蒼--e，伊ê kan-lo̍k釘較長，伊gīm kan-lo̍k ê方式是kan-lo̍k釘ǹg-chiūⁿ天，kan-lo̍k hō͘伊phah落地，bē-gô bē走，tèng-tiàm土--裏bē振bē動，有夠怪奇？sian想都想無原因，聽伊講，kan-lo̍k釘ǹg-chiūⁿ天phah 較有力，m̄-koh chit步Lah-jih sian學都學bē-hiáu，kan-lo̍k釘ǹg-chiūⁿ天，phah--落去仝款kan-lo̍k釘ǹg-chiūⁿ天顛倒頭gô！ná-ē án-ne？

有一擺，四兄削1粒細粒kan-lo̍k hō͘--我，細細粒仔，一粒ná南洋橄仔，tèng釘hit爿削了較尖，m̄-koh無tèng釘，問四兄「按怎sńg？」，四兄koh gia̍h 1支楊麻絲縛--ē ê蚊摔仔出--來，kā kan-lo̍k tàn-tiàm土腳，chiah用蚊摔仔sut，sut幾下仔，kan-lo̍k to̍h開始gô，lú sut lú轉，「bē-bái sńg to-tio̍h！」

「Lah-jih！換你！」

Ná sut ná jiok，bē轉to̍h是bē轉：「ná-ē sut bē轉？」

「Lah-jih！你看，ài sut kan-lo̍k下面，tio̍h連紲一直sut chiah-ē轉--起來！」四兄示範講mê-kak。

Ná sut ná jiok，ná sut ná jiok：「轉--起來à！轉--起來à！」

「繼續！繼續！m̄-thang歇睏。」：看kan-lo̍k已經gô--起來：「hō͘你家己sńg，四兄boeh來去做khang-khoè--à！」

好sńg to-tio̍h，m̄-koh已經汗流sám滴。

Iáu有一種kan-lo̍k，人講叫做日本kan-lo̍k，chi̍t種日本kan-lo̍k Lah-jih較趣味家己做來sńg。早當時庄腳查某人做針黹，boeh做、boeh補、boeh thīⁿ，攏是1針1線雙手ûn-ûn-á來，he棉紗線若用了，纏棉紗線ê車輪仔，to̍h ē-tàng提來做日本kan-lo̍k，車輪仔形kài-sêng鐵枝路頂leh走ê火車輪，是柴--ē，心大大有孔，大約鉛筆大。

做日本kan-lo̍k需要1粒纏棉紗線ê車輪仔、1腳箸抑是箸大ê桂竹仔爿、1支刀仔、1條棉紗索仔、1 chat仔鉛筆大ê麻竹管，代先kā車輪仔用刀仔削做2-koe̍h，揀較súi款hit爿，kā修hō͘像酒漏形〔漏斗狀〕，chiah kā麻竹管仔ân-ân chhng入孔內，尖梭hit爿修hō͘ súi，另外hit爿thóng 2公分長thang纏索仔，koh來kā箸修削1支oa̍h-tōng ê kan-lo̍k心，chit支心ná大頭釘，大頭hit爿著削像豬心鈍鈍ê尖形做kan-lo̍k腳，chhun--e修hō͘圓圓比竹管仔孔較細一屑仔to̍h好，長度需要thóng出竹管仔1公分，做好著會使得提來sńg。

棉紗質ê kan-lo̍k索仔纏tiàm竹管仔部位，纏好，倒手大-pû-ong kap第二指kā thóng出竹管仔ê kan-lo̍k心tēⁿ hō͘ ân，然後索仔順力giú--一下，kan-lo̍k開始gô，紲手hē tiàm土腳，kan-lo̍k繼續轉、一直gô，若是gô bē--起來抑是gô無5秒鐘to̍h跋倒，to̍h需要kohしあげ(修飾)抑是重做kan-lo̍k心，kan-lo̍k心ê中心點掠無準，kan-lo̍k to̍h轉bē-gîn轉bē久，Lah-jih chiok-ài sńg chit種kek頭腦ê chhit-thô͘物，每擺若是做著ē徛心ê kan-lo̍k一定展hō͘人看，若tī木造桌仔頂phah，m̄-nā徛心足久足久koh-ē kô͘ⁿ-kô͘ⁿ叫，徛心轉起來kài神奇，kan-lo̍k ká-ná chhāi-tiāⁿ-tiāⁿ無leh轉，每擺lóng-ē siâⁿ人注心無nih目。

一nih目，都也經過1甲子，chit-má看人表演phah-kan-lo̍k，ē使得講是「出神入化」，技藝絕等，雖罔心適好看，總是較懷念--ē猶是早前囡仔伴絞群thit-thô tèng kan-lo̍k ê趣味。 20111223_Lah-jih

 

十二、20140508_Khi̍h-kho̍k khi̍h-kho̍k       1951_Lah-jih

「Khi̍h-kho̍k khi̍h-kho̍！Khi̍h-kho̍k khi̍h-kho̍！」想起細漢時，家己儉番仔火橐[火柴盒]做Khi̍h-kho̍k khi̍h-kho̍k ê玩具來thit-thô，m̄-nā好sńg koh真有成就感，往過物資欠缺，經濟困難，囡仔ê thit-thô物m̄是大人做hō͘咱sńg，較濟是家己DIY，家己做家己sńg。

材料：硬紙枋芳茶箍盒仔2-kâi，A4薄紙1張，雙面膠布，鉸刀。

做法1：薄紙鉸3-liau，闊1公分，長茶箍盒仔2培長。kā 3-liau紙平均排tiàm 疊做伙ê 2-kâi茶箍盒仔中間。雙爿thóng出紙liau。

做法2：正爿兩爿邊紙liau用雙面膠布黏tiàm茶箍盒仔頂面；倒爿中央紙liau mā用雙面膠布黏tiàm茶箍盒仔頂面。

做法3：kā疊做伙ê 2-kâi茶箍盒仔顛倒反--過來，chiah koh kā thóng--出來ê紙liau，kap做法2 仝款黏hō͘好勢。

做法4：完成。Ē使得「Khi̍h-kho̍k khi̍h-kho̍！Khi̍h-kho̍k khi̍h-kho̍！」sńg thit-thô--ā。

進階做法：2-kâi茶箍盒仔是上簡單上好sńg ê組合。進一步ē使得3-kâi、4-kâi、5-kâi→10-kâi；紙liau內ē使得chhàng彩色紙花，紙花需要用koh-khah薄ê紙。

 

十三、20111107_Ī 鼠牛虎兔kap硩撚骰仔 1951_Lah-jih

有一句gia̍t-khiat仔話án-ne講：「講著跋筊我to̍h khì！」聽無ê人o-ló講：「跋筊是歹代誌，反對跋筊實在有智慧。」聽有ê人知影he是雙關語：「氣、去攏是khì，hèng跋koh-ē消遣家己。」

講著跋筊chit層代，kái-sêng食土豆「大人囡仔hèng」，人人趣味，人人ài-sńg，好ka-chài有人驚輸錢m̄敢跋；有人驚警察掠m̄敢跋；有人驚hō͘人phé-siùⁿ m̄敢跋；有人驚hō͘序細歹模範m̄敢跋，chiah無pìⁿ-chiâⁿ跋筊社會。

Lah-jih m̄敢跋猶有chia ê因素：輸錢m̄甘，贏錢hō͘人痛苦mā m̄甘；kap親chiâⁿ朋友輸贏無意思；kap外人跋koh驚hō͘人kun去，跋輸面憂憂，跋贏mā愁愁，kui氣mài跋to̍h無chia問題。講是án-ne講，囡仔時代猶是ē好奇貪小利kap人跋趣味，大人跋四色牌cha̍p-hô͘（十胡）、liû對仔〔配對〕m̄敢學，硩撚骰仔輸贏錢財m̄敢看，阮囡仔人kap囡仔伴是ī he「鼠牛虎兔」「硩撚骰仔」罔sńg笑，有當時仔ē輸贏牌仔、bâ-bui子、番仔火支to̍h khah-sêng跋筊。

「鼠牛虎兔」是一種紙牌仔，店仔頭有leh賣，ngē-chiāⁿ紙枋印12生相ê尪仔圖，1張生相尪仔圖大約7公分長、2公分半闊，1種生相印2份，12生相to̍h印有24張尪仔圖，giâ鉸刀鉸鉸--leh to̍h有24張牌仔。跋筊時，做內場--ē先kā鼠、牛、虎、兔、龍、蛇6支牌仔按照順序排tiàm土腳，準備hō͘人teh-tù〔下賭注〕，chhun--e 18支牌仔tēⁿ-tiàm手裏chhap，chhap hō͘鼠、牛、虎、兔、龍、蛇、馬、羊、猴、雞、狗、豬12生相chiâu-chiâu分散無規則順序，然後koh hō͘筊腳「táu」1擺，chiah-koh chhap-chhap--leh，ân-ân tēⁿ-tiàm手內等待「掀」。

外腳開始teh-tù，有人teh-tī 1支牌仔頂懸，叫做「teh心」，teh tio̍h ē使得賠4倍，若是teh-tī 2支牌仔中間，叫做「teh岸」，ē使得賠2倍，若是thán-hoâiⁿ teh-tī 連紲3支牌仔面頂，叫做「扛」，teh tio̍h會使得賠1倍。聽候逐个考慮chiâu-chn̂g teh好勢，內場喝聲「boeh開--a o͘！」逐个停止teh tù，目睭金金siòng內場手內ê牌仔，內場koh再1擺喝聲「掀！」，Ka-tēng--ē 用正手kā倒手ê牌仔掀開，siāng下底ê牌仔出現…

A-pêⁿ歡喜笑1聲「hah！虎！心--lah！3支賠12支。」thiòng kah膦脬險仔lak--去。

A-chiàng teh牛虎岸贏4支，chhun--e A-ba̍k、Lah-jih、Khah-chuh--è 攏hō͘內場咬去，Khah-chuh--è輸了小可m̄甘願，kā內場牌仔sa--來一直chhap，chhap了koh「táu」一下chiah還內場Ka-tēng--ē，Ka-tēng--ē chhap 5、6下，tēⁿ-tiâu--leh：「開始teh tù！」

A-pêⁿ食著甜知ûn-choa̍h，又閣teh虎心，Khah-chuh--è mā toè小弟teh虎心，A-chiàng teh兔龍岸，A-ba̍k teh 虎兔岸，Lah-jih teh鼠牛虎扛，想講án-ne輸贏1半1半，較公平較有機會贏。

「Boeh掀--a o͘！」

「慢且是！」A-ba̍k喝聲：「我boeh換位，mā-boeh teh虎心！」A-ba̍k kā番仔火支徙去虎心。

「猶有人boeh徙tù--bò͘？」

「無--ho͘ⁿh？Boeh掀--a o͘！」

「掀--lah！」Ka-tēng--ē kā底排掀開：

「豬，豬，豬！通咬！」換Ka-tēng--ē笑kah嘴仔ngi-ngi-ngi。

「豬，豬，豬！通咬！án-ne ná-ē著？」A-ba̍k感覺花花？

「鼠、牛、虎、兔、龍、蛇第六支是蛇；馬、羊、猴、雞、狗、豬第六支是豬；蛇to̍h是豬，豬to̍h是蛇，A-ba̍k！你bē-hiáu算--hio͘h？」

1副牌仔24支，12生相當做6子（jí）跋，馬、羊、猴、雞、狗、豬to̍h是鼠、牛、虎、兔、龍、蛇，che是阮囡仔伴家己設--è，18支牌仔做伙chhap比6支有較好chhap較有變化。

大人硩撚骰仔輸贏錢財m̄敢看，阮囡仔人跋「硩撚骰仔」只是學大人罔sńg罔滾笑--niâ，阮sńg ê撚骰仔kap大人--ē無仝，是家己做--è，燈籠花骨是材料，揀he 1公分大koh tēng、圓圓、直直ê部份1節，用鉛筆刀仔先kā皮khau掉，chiah-koh ûn-ûn-á削，削做真pêⁿ-pāng ê六角liām〔六角柱〕，ná削ná斟酌燈籠花骨ê柴心有正--bò͘？m̄-thang hō͘伊歪斜，削好，kā上súi上pêⁿ-pāng部份切khah-lím 1公分長起來，しあげ〔修飾〕hō͘金滑金滑，án-ne to̍h tit-boeh完成。Koh來to̍h是修一支撚骰仔心，tio̍h用較tēng較ngē-chiāⁿ ê桂竹，修hō͘圓圓細細箍仔，tú好ē-tàng ân-ân穿過撚骰仔心，雙頭thóng khah-lím 1公分長，1爿切chê-chê，1爿修hō͘尖尖hûi-hûi，最後giâ鉛筆tiàm六角liām頂koân 輕輕仔tu̍h，tu̍h 1點、2點、3點、4點、5點、6點ê烏點to̍h ē使得lián看māi，若是lián ē轉koh bē péng固定爿，to̍h ē使得提來跋筊。

囡仔伴koh招招--leh，Khah-chuh--è 講boeh做內場，boeh輸贏樹奶箍仔，伊提1粒石頭phí仔tiàm土腳畫六kâi格仔，格仔內寫一、二、三、四、五、六，逐个tī格仔內teh樹奶箍仔，kap ī「鼠、牛、虎、兔」仝款，有ê teh心，有ê teh岸，等逐个teh好勢，內場chiah lián撚骰仔，撚骰仔tī土腳轉，免khàm蓋，等撚骰仔bē轉倒tiàm土腳，to̍h是輸贏決定，mā是kap ī「鼠、牛、虎、兔」仝款，teh心賠4倍，teh岸賠2倍，扛to̍h賠1倍，因為家己做ê撚骰仔轉較bē順，lián真正ê撚骰仔大人ē罵，所以較罕得sńg。

Lah-jih ài sńg，ài sńg he有技術性--è、激頭腦--è、公平--ē，所以跋筊ê齣頭khah無ài，其實he「鼠牛虎兔」「硩撚骰仔」攏真無公平，teh扛有1半ê機會，賠1倍，teh岸有3分之1 ê機會，賠2倍，攏算真公平，teh心賠4倍to̍h蔭內場5分之1，實在無公平。咱用一个假設：1點、2點、3點、4點、5點、6點每點攏teh 1支番仔火支，每1擺輸贏內場to̍h ē-tàng咬5腳賠1腳，賠hit腳4倍是4支番仔火，內場穩趁1支，敢m̄是？莫怪gâu跋筊--è攏boeh做內場，贏筊ê機會比「破內場」較濟。

Lah-jih雖罔無ài「硩撚骰仔」，但是真ài削撚骰仔來sńg，伊趣味tī燈籠花骨ê選擇、án-choáⁿ削chiah-ē pêⁿ-pāng、án-choáⁿ lián khah gâu轉，1粒削了koh削1粒，若tn̄g-tio̍h lián了ē徛心--e，to̍h歡喜kui半晡，可惜chi̍t項趣味真少人kap伊做伙sńg。 20111107_Lah-jih

 

十四、20111019_Cho̍k窟仔         1951_Lah-jih

Khah-chia̍p tī熱--人ê半晡仔，囡仔伴to̍h-ē出洞，招伴絞群想boeh thit-thô，七、八月仔ê天氣ná火燒埔，半晡後日頭光chiah-ē落軟，庄腳所在，不時ē吹涼涼微微仔風，boeh sńg到「日頭落海，鬼仔出來放屎」上無mā有3點鐘久khah加thang好滾地龍，án-ne sńg--起來m̄-chiah ē夠氣，che to̍h是讀牛仔班無boeh升學ê囡仔chiah享受ē-tio̍h ê福氣。

A-ba̍k、A-chiàng是Lah-jih叔伯Hoat-á兄、Kiû-á兄ê後生，阮讀仝班，互相叫名稱呼，in nō͘人較無愛讀冊，時常都「司公仔siūⁿ-poe」褲帶結sio-liâm(相連)：「Lah-jih--è，咱來ī cho̍k窟仔--heh！」

「恁去招A-pêⁿ，cho̍k窟仔A-pêⁿ siōng-hèng，叫伊著chah較濟番仔火支來。」

Cho̍k窟仔chi̍t種thit-thô小可有poa̍h-kiáu性質，大人、半大人囡仔ē用真正銀角仔ī輸贏，阮囡仔人kan-nā輸贏番仔火支抑是珠仔、牌仔、ba-bui-chí（無患子）--niâ，所以大人ē pàng目瞌(kheh)假做無khoàiⁿ，罕得禁止干涉，阮mā攏ē chhoē厝後較iap-thiap所在ī。

Ī cho̍k窟仔著準備1-kâi較tìm-táu khah重ê「乾隆通寶」，he是紅銅ê銅錢仔，無「乾隆通寶」，用khah重ê銀角仔mā會使。「乾隆通寶」是古早錢，有人chhng紅紗線做護身符「摜頷」，阮kā提來thit-thô做「óng」，圓圓，中央1-kâi四角孔；另外準備一、二十kâi日本銅sian，看人數決定，講銅sian，其實m̄是銅質--è，阮是chhoē he比銅khah輕ê白色銅錢仔，hit種日本銅錢仔 kap chit-má ê十箍差不多大，應該是鋅、鎳（gia̍t）合金，伊ê圖案突出部份真pêⁿ-tháⁿ，若1-kâi 1-kâi tha̍h做伙ē真bā，表面小可澹濕to̍h-ē夾做伙，提來cho̍k窟仔kài好sńg，因為ē-tàng展現個人ê功夫。

A-pêⁿ來--ā，koh chhoā伊阿兄Khah-chuh--è來，Khah-chuh--è加阮2年，kap小弟仝款ài-sńg，不過伊較hèng phia̍k鳥仔、釣水蛙，若是有poa̍h-kiáu ê齣頭伊chiah-ē chham阮sńg，伊ê技術m̄是kài-gâu，無leh驚伊，而且伊人較koân大當然ài niū阮1尺遠。

Lah-jih早to̍h拴好1-kâi乾隆通寶，kap 20外个白色日本銅錢仔，A-ba̍k tiàm土腳畫四角格仔，Khah-chuh--è嫌siuⁿ大，to̍h叫Lah-jih koh畫一个，大約1本算術簿仔hiah大，長25公分、闊20公分，闊邊hit爿內面倚sûn ê中央用銅錢仔ná lak鑽án-ne挖1-kâi半球形ê窟仔，chiah-koh ùi窟仔這爿hoa̍h 4伐，大約5尺遠畫1-sûn做記號，加1尺所在mā畫1-sûn。

「逐个攏有chah番仔火支來--ho͘ⁿh，Lah-jih！銅錢仔1人分5-kâi，1-kâi代替1支番仔火支，咱有5个人，1人出2-kâi，攏總10-kâi，我niū恁1尺。」Khah-chuh--è開始phah派，Lah-jih kā銅錢仔分好勢。

「開始pò銅錢仔決定順序，Lah-jih！你先pò。」

「Kap Khah-chuh--è仝款，niū恁1尺。」Lah-jih徛tiàm後壁sûn 開始pò提銅錢仔，pò了換別人，一直到5个人攏pò完。

「倚窟仔上近--ē是A-chiàng，koh來A-pêⁿ、Lah-jih、我、A-ba̍k。」Khah-chuh--è 指揮phah派：「A-chiàng你第一个！」

A-chiàng 10-kâi銅錢仔疊疊做1-thōng，雙手6支指頭仔kā chit-thōng銅錢仔so-so lia̍p-lia̍p ho͘ ân-ân夾做伙，chiah用正手3-cháiⁿ指頭仔tháⁿ--leh tàn入四角格仔內，5-kâi格仔外，2-kâi相疊，3-kâi分散tī箍仔內，A-chiàng安全kā「óng」pò入格仔內，贏2-kâi銅錢仔。Koh來換A-pêⁿ。

A-pêⁿ àⁿ落去khioh hit 8-kâi銅錢仔，疊疊做1-thōng，雙手大pû翁kap kí指ùi銅錢仔雙頭一直用力tēⁿ一直ji̍h足久，siàu想boeh phùi嘴瀾用賺食步，因為逐个攏leh ka注意，伊chiah用正手3-cháiⁿ指頭仔tháⁿ--leh tàn入四角格仔內，5-kâi 騎三輪車仔liàn去格仔外口，3-kâi tī內面，無ngâu，「A-pêⁿ！boeh食tah-1-kâi？」

「窟仔邊hit-kâi。」A-pêⁿ kā óng tàn--入去，「oă，食無著！」A-pêⁿ輸1-kâi，輪著Lah-jih--è。

Lah-jih--è仝款kā銅錢仔疊疊做1-thōng，雙手6支指頭仔kā銅錢仔so-so lia̍p-lia̍p ho͘ ân-ân夾做伙，chiah用正手3-cháiⁿ指頭仔tháⁿ--leh，目睭siòng窟仔後所在，手sìm--leh sìm--leh，sìm 3下chiah ka tàn--出去，然後順手giú倒轉來se̍h 半个圓箍仔，あとびき顛倒giú。「1 2 3 4 5 」5-kâi ngâu 2堆，1-kâi外口，3-kâi倚tī ngâu ê邊--a，mài冒險khah-tio̍h，Lah-jih安全pò tī空位，5-kâi銅錢仔sa起來囥橐袋仔。「Khah-chuh--è，換你！」

Khah-chuh--è，技術bē-bái，ngâu 3-kâi，mā安全贏3-kâi。Chhun 1-kâi，「A-ba̍k，著你--à！」

「食到chhun 1-kâi，有夠衰。」kan-nā 1-kâi實在真pháiⁿ tàn，輕輕 飛飛，果然tàn-tī外口面，A-ba̍k有夠衰，jîm 1-kâi tàn落地，面仔臭臭。

又閣輪著A-chiàng，這擺A-chiàng無輸無贏，換A-pêⁿ，A-pêⁿ tàn一下2-kâi攏飛出外口，koh賠1-kâi。

「看我ê。」Lah-jih kā 3-kâi銅錢仔小可lia̍p-lia̍p--leh，「あとびき顛倒giú。」tàn--出去，乖乖3-kâi ngâu做伙，可惜一下失覺察soah kā「óng」khàm-tī窟仔，3-kâi趁無著koh了1-kâi。

「看我ê！」Khah-chuh--è笑kah嘴仔li̍h-sai-sai，伊kā 4-kâi銅錢仔小可lia̍p-lia̍p--leh，「あとびき顛倒giú」tàn--出去，乖乖4-kâi 銅錢仔ngâu做2堆，óng安全入格仔內，結束第一局。

「Boeh koh--bò͘？」

「當然mā boeh！」

「來！番仔火支thùi-thùi--leh chiah-koh開始。」A-chiàng無輸無贏，A-pêⁿ輸4支，Lah-jih贏2支，Khah-chuh--è贏5支，A-ba̍k輸3支，番仔火支換銅錢仔，每人恢復5-kâi，繼續第二局。

「A-ba̍k換你第一个，pò ho͘入--ō͘！」

A-ba̍k kā 10-kâi銅錢仔lia̍p-lia̍p--leh，to̍h像he散chí phah鳥仔án-ne「cho̍k」--出去，ngâu 3-kâi tī格仔內，7-kâi 騎三輪車仔liàn-tī外口，óng pò--出去，安全趁3-kâi。「A-pêⁿ！著你。」：A-ba̍k有贏to̍h-ē大聲。

A-pêⁿ有夠飯桶，又閣輸1-kâi。

頂局失覺察輸Khah-chuh--è，chit局Lah-jih加真sé-jī，伊kā 8-kâi銅錢仔lia̍p-lia̍p so-so--leh，koh用雙手大pû翁kap kí指4支指頭仔tēⁿ leh chūn-chūn--leh，8-kâi銅錢仔真tú好tháⁿ，雙腳徛tī後sûn，目睭siòng四角格仔，sìm 3下，「あとびき顛倒giú」cho̍k--出去，倒爿ngâu 4-kâi，正爿ngâu 3-kâi，1-kâi tī窟仔後壁，有夠好運。

「Lah-jih！boeh總食--bò͘？」

總食to̍h是ài用「óng」pò hit-kâi 無ngâu ê銅錢仔，pò有著to̍h總食，pò無著to̍h-ài賠1-kâi，若無ài總食，安全pò-tiàm空位to̍h好。Lah-jih真知，he厝角頭ê土腳m̄是kài-tēng，mā m̄是kài軟，小可軟軟khiū-khiū ê塗肉，用hit步「あとびき顛倒giú」一定真有效果。

「好！boeh總食，看特技表演！」

Lah-jih kā「óng」仝款用3支指頭仔ni--leh，仝款sìm 3下，「あとびき顛倒giú」pò--出去，顛倒giú ê手勢特別大，m̄是tiau-kang leh表演，是實在ê需要。

「óng」飛到格仔位，m̄是平平落地，看ho͘好，看ho͘清楚，是chhu-chhu落地，「乾隆通寶」一頭落地，tok一下koh跳倒轉來，「khiăk」一聲，tú好khap-tī hit-kâi銅錢仔面頂，總食。「Oă！ná-ē chiah厲害！」Phok-á聲表示o-ló，紲落去繼續第三局、第四局…。

猶未sńg到「日頭落海，鬼仔出來放屎」，A-pêⁿ ê番仔火支已經無半支，Khah-chuh--è mā講無ài koh sńg，從án-ne結束去chhoē別人thit-thô。

Cho̍k窟仔雖罔帶有跋筊性質，m̄-koh sńg--起來chiâⁿ趣味chiâⁿ公平，需要靠個人技巧，koh有番仔火支thang贏，所以Lah-jih足ài-sńg。 20111019_Lah-jih