一張批kap 一通電話：第三篇台文作品
一張批kap 一通電話：1994/2第三篇台文作品
一張批kap 一通電話（生活母語）----台文習作第四篇1994.2.5寫2001.3.18修正
阿城：
過年tih-beh 到，寄兩張禮券，拜託你包一個紅包hō͘ 阿母硩年，順紲替阿兄講兩句仔好話，kā 伊老大人祝福，「新年恭喜，歡歡喜喜，身體勇健，頭殼好記智！」
雖然講歲頭已經50 外，m̄-koh 逐一擺若tn̄g著過年，攏會hō͘ 人感覺祝歡喜--ê ，ká-ná 囡仔共款。往過細漢時過年，歡喜穿新衫穿新鞋，若閣有一雙新襪仔thang 穿，ah hit-ê 過年暝，包領歸暝睏bē 去，歸暝睏bē 落眠，連眠夢都會夢著hit 雙襪仔。等到較大漢以後，tiō 較愛kap 一寡少年囡仔伴，相及去外面四界chhit-thô ，hong-so hàiⁿ狗母騷。
Chit-mái 過年，嘛是共款歡喜在心內，看著厝內大細平安過日，囡仔一日一日大漢，閣攏會順父母令，乖乖讀冊，bē kap 人冤家量債，實在hō͘ 人心安bē 掛慮。雖然m̄ 知影In 大漢了後，會食啥物款頭路，事業會有啥物成就，但是看In 做人處事，攏不止仔有主見，做啥物代誌攏會有家己ê 看法，按呢tiō hō͘ 人較放心。
想著家己細漢時，有影散kah 驚--矣，所以大漢師範出業了後，感覺有淡薄仔出頭，tiō 想beh 有淡薄仔享受，滿足淡薄仔慾望，就hō͘ 人認為人生若有按呢thang 過日，tiō 真正會凍過一世人--ā ，想法有夠單純，思想有夠條直，無親像一寡朋友按呢，認為細漢既然散過頭，chit-mái 有機會，tiō 應該扑拼閣讀冊，參加考試，thang 昇官發財，趁卡濟錢--leh ，hiau-hiau pai-pai 過一生，無.是beh 如何kap 人比 phēng ？可能是按呢，m̄-chiah 教chit-mái 猶原是一個虔誠ê 囡仔頭王，烏枋杙仔。
其實，我m̄ 是欣羨人leh 做大官趁大錢，我只是leh 怨嘆冊讀傷少niā-niā ，好佳哉，序細ê 思想較bē 像我按呢貪享受， pün-töaⁿ 讀冊。In 除了用心tī學業以外，嘛知影啥物叫做學問，平常tiō 常常kā In 講，讀冊一定著學阿城叔hit 款精神，無嫌濟，mî-nōa 讀，bē 厭倦，有定性，範圍闊，有深度，chiah 是真正做學問ê kioh-siàu 。若kan-nā會曉讀教科書niā-niā ，he 可能tiō 是hông keng-thé ê 冊蟲，戇書獃而已。
愈講愈濟，希望你看有，以後有閑chiah 閣來開講。順紲kā 阿碧祝平安，兩個姪仔身體健康，新正有轉外家，會記得安排時間來我遮，thang 好phò-tāu 講chē 話，抑是唱KTV 消遣一下。
1994.02.05 tī田中厝裡 平治寫
Liang ……liang ……
爸：喂~ 國華西裝社，咱.叨位？
女：Pah！hio͘h ！（阿爸是 --無？）我.慈蓉--啦！足久無敲電話--hō͘ 恁ā ，ah 媽（mah ）轉來--未？
爸：早tiō 轉--來à ，攏已經十點外，chit-chün tī邊也teh 看報紙，聽咱leh 講電話。恁母--à 最近嘛真無閒，3 年國中夜補，tih-beh 出業，除了讀冊以外，chit-mái 猶閣teh 為In 班內設計紀念冊，做kah 無閒chhih-chhih ，嘛做kah 歡喜tang-tang ！ah 你--leh ？準備考碩士班ê 功課，讀到啥物坎站--ā ？敢有把握？ah 抑是考過--à ！
女：爸！猶未啦！我chit-mái tng-leh 認真阮學校ê 數學班，報名ê 人真濟，m̄ 知考會tiâu --無？只好認真扑拼看覓。台北師大考ê 內容kap 阮成大--ê 無啥仝款，差足濟--ê ，考試時間相差chiah 1 禮拜，beh 準備嘛bē 赴，我無報名。彰化化師大ê 考試較慢，tī 5 --月，阮學校若考煞，chiah 來準備，爸！你看按呢好--無！著啦！爸！彰化化師大ê 簡章提著也未？
爸：幾工前，阿爸ê 學生有送來1 份招生廣告單，伊講簡章若出來，chiah beh 提來hō͘ 我，到 taⁿ 攏無消息，大概是猶未ê 款。你家己嘛愛斟酌--一下。爸kā 你講--h¬hⁿ ，讀冊著愛認真讀，若想講以後beh chhōe 較好ê 頭路，做較理想ê 事業，chit-mái 就愛好好仔準備計畫，上好是chhōe 1 條卡有前途閣較好行ê 路。m̄-koh 愛知影，世間事無hiah 呢簡單，嘛無hit-lö 大碗閣滿墘ê 代誌，若想beh 將來有理想ê 前途，無拚是bē 使得，beh 拚趁chit-mái ，猶未結婚晉前，chiah 拚有路來，結婚了後，chiah 想beh 閣讀冊，實在是chiâⁿ 困難ê 代誌。
像恁母--à ，細漢時外公無hō͘ 伊讀外濟冊，怨嘆30 幾冬，到chit-mái chiah beh 完成國中學業，猶還hôan-ná 著阿爸ê 支持chiah 有法度達成。閒話mài 講傷濟，按呢好--無，為著俺--查某囝，咱做夥來做1 ê 投資，你計畫我來鼓勵，你出時間kap 青春，爸出金錢kap 期待，你講好--m̄ ？
女：爸！我知影啦，我知影你ê 用心啦！chiah 大漢--à ，我會好好扑算，儘最大ê 氣力氣認真扑拼，有消息chiah kā 你講，多謝爸爸關心kap 鼓勵，再會！
爸：再會！（笑笑--a kap 伊ê 牽手繼續開講。）1994.04.25暗
