咱攏leh ioh字：台文通訊47期

咱攏leh ioh字：1996/09台文通訊47期

 

咱.攏teh「ioh」字：開講一寡仔台語聲韻kap標調e5重要（蕭平治1996.4.1.）

    講tioh8讀台語，無論是看歌仔冊，讀台文作品，看字幕唱K.T.V，抑是讀無標調e5羅馬字，大多數e5人，攏講In看有看bat。我ti7-chia beh提出意見補充講，In講e5意思是：大部份看有，小部份是用「ioh」.「ioh」--tioh8-e3！咱攏知影，beh用100％e5漢字來表達台語ho7-lo2話，是無可能e5代誌，Ah遐e5借意借音e5字，是m7是tioh8愛靠讀者來「ioh」--lou3！（翻譯）讀無標調e5羅馬白話字,照講嘛是仝款！別人我m7知影，對我個人來講，讀無標調e5羅馬字，比「ioh」漢字卡難，因為台語有八調，閣有誠複雜e5變調，音調若走精去，tioh8無法度掠出一句話e5意思。對一個會曉講純正台語e5人，都有這種e5困難，Ah對講台語講be7好勢e5青少年人，閣卡免講--lou3！

    Ho7-Lo2話e5 sui2.雅.有氣質，會受外國人e5欣賞o-lo2 e5所在，上重要e5是Ho7-Lo2話e5聲韻，充滿了音樂性，有這八調e5變化，才有懸低調，長短聲，講話be7輸那leh唱歌。所以早前e5人，唱歌m7講唱歌，講號做「念歌」，免音樂伴奏，干乾用念--e7就真好聽--a！

    有人講語言應該愛toe3時勢變化，適用--e5.留--落來，無合潮流--e5愛予死去，無夠用tioh8閣創造--出來；無m7-tioh8，chia-e5變化應該是指語言「詞彙」e5加減創新，m7是「聲韻」e5變形。無符合Ho7-Lo2台語聲韻e5語言，是外來語，m7是Ho7-Lo2話。台語Ho7-Lo2話有18個聲母，45個韻母，8種聲調，2種輕聲，閣有變調，實在誠複雜誠歹學，tioh8是因為伊有chiah複雜e5聲韻規則，才產生chiah-nih8優美好聽e5 Ho7-Lo2話，這是伊e5特質，伊e5優點。總是be7用得講伊誠歹學，tioh8-beh來ka7簡化，chiong聲符韻符減少，抑是ka7聲調留剩像北京語e5四聲tioh8好，（誠濟人bat 按呢kah我討論過）無!嘛ka7聲調e5調號省掉mai3寫，省去一寡仔麻煩，我想這是講be7-thong--e！

    假使講我e5看法有正確，tioh8請各位先進，自chit-mai2起，逐家mai3嫌麻煩，mai3貧惰，若是tng7著寫羅馬字e5時陣，一定愛標聲調，m7-thang be7記得。

    無同意我看講法e5人，心內定著會按呢想：人英語日語都攏無標聲調，講英語日語e5人，m7是講kah hiah liu2-liah8好勢；根據聲韻專家e5研究，英語並無聲調e5分別，講英語只分輕重音--nia7-nia7！日本話嘛只分兩調，當然m7免標調，嘛會使得分得清楚。我m7是聲韻家，m7-ku2這種分析，我會瞭解同意。會曉英語日語e5朋友，In beh學唱英語歌抑是日本歌，一定學tioh8真緊，閣會當唱tioh8真好聽；m7-ku2會曉講Ho7-Lo2話e5人，tioh8無一定--a7！除了伊自細漢tioh8講Ho7-Lo2話,講kah誠好勢誠滑溜，抑是用誠濟時間誠大e5氣力去練習，若無，boeh唱kah真合韻，真好聽，就無簡單--lou3！

    解嚴後e5 Ho7-Lo2台語歌親像雨後e5麻竹筍，一車一車載出來賣，雖然誠濟，m7-ku2 beh chhoe7一支仔卡幼字卡合味--e7，就無偌濟thang揀--啊！我bat-ti7電視頂頭，看著兩三個少年歌星，講In m7敢唱台語歌曲，講In掠be7準台語歌e5韻味，這實在是真有見識e5話，其實In愛講掠be7準台語Ho7-Lo2話e5聲韻才著。聲韻若掠be7準，是beh按怎唱出有Ho7-Lo2味e5台語歌--neh！Chit-ma2 e5青少年人，若想beh將台語歌唱予好聽，抑是beh寫有合聲韻e5台語歌(詞kap曲)，一定愛好好學台語e5聲韻；歌詞e5內容mai3講，江蕙e5台語歌，聲韻e5掌握實在無話講，其他像陳昇.五百--e7.豬頭皮chia-e5少年人，In-e5作品有e5已經跳出老台語歌e5韻味kap旋律，走向西洋e5熱門，搖滾抑是藍調，可取e5是In-e5歌曲中並無走失台語e5聲韻，閣唱kah hiah-nih8緊快，hiah-nih8滑溜，實在值得o-lo2 鼓勵，當然幕後e5作詞者，作曲者才是厲害，仝款值得咱e5尊敬誇獎。In e5用心寫詞作曲，有法度將台語聲韻kap音樂旋律結合kah hiah-neh8擺好勢，hiah合音，實在誠無簡單。

    國民中小學e5母語教育，ti7八十五年度就beh全面開始，做為一個推sak Ho7-Lo2台文e5工作者，特別是徛在為人師e5立場，對台語聲韻一定需要用心去研究，若無！我真正擔心，幾年後推sak台語e5成果，可能會像國民黨e5語言教育仝款，本來是beh推行標準e5北京語，無疑誤推sak到chit-mai2，煞變成無像北京語e5台北華語，（卡早e5囡仔，笑大人講無標準e5北京語，號做台灣國語）哪會按呢生?國民黨e5語言教育，到底失敗ti7叨位--neh!，「國語直接教學法」是上大e5兇手：坐ti7台腳--e是be7曉北京語e5學生，徛站台頂--e3是講be7標準北京語e5老師，每日ti7-hia teh直接對答，年久月深，台北華語就按呢造成。所以今後e5台語教育，一定m7-thang閣犯著chit種e5錯誤，教學者一定愛先學會曉台語聲韻，然後才去教--人，若tng7-tioh8講be7輪轉e5學生，才有法度分析聲韻e5原理，比較台語kap北京語無共e5所在，去改正錯誤。

    ti7-chia簡單舉一個例：一位tu2-teh學台語e5少年老師，問講魚仔kap耳仔beh按怎講，我一直示範幾偌遍予伊聽，伊猶原一直講是魚仔（hi5-a2），耳仔（hi5-a2），最後我教伊將鼻管小teN--leh，閣叫伊講魚仔，結果伊講出純正e5「耳仔」，原來少年老師是m7-bat啥物是「鼻音」。（chit種鼻音kap聲符e5 m n [ㄇ ㄋ]無共）另外像台語特有e5入聲調，嘛會使得用英語e5 K.K音標來做比較發聲，若無，任你老師按怎教「Ap迫.At柴仔.Ak水.Ah母」有啥物無仝，我相信大部份e5少年學生，一定kap張小燕仝款，講he是「Ah迫.Ah柴仔.Ah水.Ah母」，誠gau5！「四字，tioh8一音。」Che是be7-hiau2入聲調e5關係。

    有人會講這種看法傷過嚴重，推sak北京語e5「直接教學法」敢有影hiah恐怖？若是講著伊e5威力，到現在，台灣全島，m7管伊是叨一族群，m7管伊是囡仔抑是老歲仔，差不多百分之九十以上e5人攏會曉講chit種e5「台北華語」，（聽予好，是台北華語，m7是標準北京語--ou7！）chit種e5成果你敢會當m7承認。除了「音」有正無正e5問題以外，我beh問講台北華語e5台灣人，恁會曉kah人相諍相罵--無？用北京語,我敢講你一定罵輸--人，用Ho7-Lo2話,我嘛敢講你一定講kah不答不七，人ka7你誤會，ka7你欺負蹧蹋，你連相罵相諍，相辯解e5機會都無，你講是m7是悲哀e5代誌？相罵相諍m7是好代誌，m7-ku2

等到頷頸仔生瘤，拄著無相罵相諍be7使得e5時陣，三字經我m7敢罵，beh按怎？只有忍氣吞聲，m7!tioh8嘴仔開開，表示無言e5抗議！（當然對有語言天才kap認同台北華語是母語e5人，我就m7敢加講話--啊！）

    卡早e5父母教囝講話，（台灣話）嘛無teh教聲韻，完全用誠直接e5「直接教學法」teh教，In m7是教kah足好勢足標準，你哪會講「直接法」m7好？tioh8！che 就是關鍵e5所在，卡早e5父母，一代一代傳教--落來e5攏是標準e5台灣Ho7-Lo2話，In-e5子弟學tioh8-e5當然嘛是原味e5台語。恁講，我e5見解是m7是有正確！

    最後，beh ka7逐家呼喝--一聲！tioh8認識下面遮e5代誌：(一)漢字無法度完全表達台語Ho7-Lo2話；(二)beh寫純正e5Ho7-Lo2話，濟少參一寡仔羅馬字是真好e5方式；(三)beh寫羅馬字，mai3嫌麻煩，標出聲調，卡be7走音閣卡好讀；(四)beh推sak台語Ho7-Lo2話e5有志，特別是負責教學e5老師，請恁趕緊學台語聲韻。請逐家共同鼓勵拍拚！

彰化縣田中國小教師蕭平治寫   1996.4.1.

 

良光兄:

接tioh8 A-hui7寄來e5稿,希望我校對好勢,一時間予我霧sa3-sa3!看幾偌擺,攏掠be7出你e5意思,我只好用ioh--e3!是我用字用詞無適當,愛我改,抑是你e5電腦copy了有亂碼,我ioh be7出--來!最後決定閣校對一擺,自an-ne先E-mail予--你,隨尾後閣用air mail寄去Bi2-Kok.

1996.4.15暝小弟蕭平治