柿硞柿硞

十二、20140508_Khi̍h-kho̍k khi̍h-kho̍k       1951_Lah-jih

「Khi̍h-kho̍k khi̍h-kho̍！Khi̍h-kho̍k khi̍h-kho̍！」想起細漢時，家己儉番仔火橐[火柴盒]做Khi̍h-kho̍k khi̍h-kho̍k ê玩具來thit-thô，m̄-nā好sńg koh真有成就感，往過物資欠缺，經濟困難，囡仔ê thit-thô物m̄是大人做hō͘咱sńg，較濟是家己DIY，家己做家己sńg。

材料：硬紙枋芳茶箍盒仔2-kâi，A4薄紙1張，雙面膠布，鉸刀。

做法1：薄紙鉸3-liau，闊1公分，長茶箍盒仔2培長。kā 3-liau紙平均排tiàm 疊做伙ê 2-kâi茶箍盒仔中間。雙爿thóng出紙liau。

做法2：正爿兩爿邊紙liau用雙面膠布黏tiàm茶箍盒仔頂面；倒爿中央紙liau mā用雙面膠布黏tiàm茶箍盒仔頂面。

做法3：kā疊做伙ê 2-kâi茶箍盒仔顛倒反--過來，chiah koh kā thóng--出來ê紙liau，kap做法2 仝款黏hō͘好勢。

做法4：完成。Ē使得「Khi̍h-kho̍k khi̍h-kho̍！Khi̍h-kho̍k khi̍h-kho̍！」sńg thit-thô--ā。

進階做法：2-kâi茶箍盒仔是上簡單上好sńg ê組合。進一步ē使得3-kâi、4-kâi、5-kâi→10-kâi；紙liau內ē使得chhàng彩色紙花，紙花需要用koh-khah薄ê紙。